ކްރިސްމަސް ރަމްޒުކޮށްދޭ ތަކެތި ހަރުކުރުމުން ފުލުހުންް ގޮސް ނަގައިފި

ނަސާރާ ދީނުގެ އީދުތަކުގެ ތެރޭގައި ހިމެނޭ ކްރިސްމަސް ފާހަގަކުރުމަށް އެ އީދުގެ ކަންކަން ރަމްޒުކޮށްދޭ ތަކެއްޗާއި ޝިއާރު ހަރުކުރުމުން ފުލުހުން ގޮސް އެ ތަކެތި ނަގައިފި އެވެ.

ކްރިސްމަސް ފާހަގަކުރުމަށް އެ އީދުގެ ކަންކަން ރަމްޒުކޮށްދޭ ތަކެއްޗާއި ޝިއާރު ހަރުކޮށްފައި ހުރީ ހިޔާ އަވަށުގައި ހުޅުވާފައިވާ ޗައިނާގެ ކެއުންތަކަށް ހާއްސަ ރެސްޓޯރަންޓެއް ގަ އެވެ. އެ ތަނުގެ ބޭރާއި އެތެރޭގައި އެފަދަ ތަކެތި ބަހައްޓާ ހަރުކޮށްފައިވެ އެވެ.

އެކަން އާންމުންނާއި ކަމާބެހޭ އިދާރާތަކުގެ ސަމާލު ކަމަށް ގެނައީ ދީނީ އިލްމުވެރިޔާ އައްޝައިހް ޒަމްޒަމް ފާރިސް އެވެ. ޝެއިހް ވަނީ އެ ރެސްޓޯރަންޓަށް ގޮސް އެއީ ރާއްޖޭގެ ގާނޫނާއި ހިލާފު ކަމެއްކަން އަންގާ އެކަން އެގޮތަށް ނުކުރުމަށް އަންގާފަ އެވެ.

ފުލުހުން ބުނީ އެ ރެސްޓޯރަންޓަށް ގޮސް އެތަކެތި މިހާރު ނަގާފައިވާ ކަމަށެވެ.

މުސްލިމުން ޣައިރު މުސްލިމުންގެ ދީނީ ޝިއާރުތަކުގައި ބައިވެރިވުމަކީ އިލްމުވެރިން ވިދާޅުވާ ގޮތުން ކަނޑައެޅިގެން ހަރާމް ކަމެކެވެ. ޣައިރު މުސްލިމުންގެ ޝިއާރުތަކުގައި ބައިވެރިވުމުގެ ތެރޭގައި އެމީހުންގެ އީދުތައް ފާހަގަކުރުމާއި އެކަމުގައި ބައިވެރިވެ ތަހުނިޔާ ކިޔުން ހިމެނޭނެ ކަމަށް އިލްމުވެރީން ވިދާޅުވެ އެވެ.

ގުރުއާނުގައި ސޫރަތުލް ފުރުގާނުގައި މާތްﷲ ބަޔާންކުރައްވާފައިވާ ދޮގު ހެކިބަހަކީ މުޝްރިކުންގެ އީދުތައް ކަމަށް އިބްނު އައްބާސްގެ އަރިހުން ވާރިދުވެފައިވެ އެވެ. ކްރިސްމަސް ފާހަގަކުރުމުގައި ބައިވެރިވުމަކީ އިސްލާމްދީން ހުއްދަކުރާ ކަމެއް ނޫންކަން އިލްމުވެރީން ފާހަގަ ކުރެ އެވެ. ކްރިސްމަސް ގަހާއި ސެންޓަ ކްލޯސް ފަދަ ނަސާރާއިން އެމީހުންގެ ދީނަށް ނިސްބަތްކޮށް ކުރާ އެތައް ކަމެއް ކްރިސްމަސްގެ އިހުތިފާލުތަކުގައި ހިމެނެ އެވެ.

ޣައިރު މުސްލިމުންގެ އީދުތައް އިހުތިފާލުކުރުން މުސްލިމުންނަށް ހުއްދަނުވާނެކަން ކީރިތި ގުރުއާނާއި ސަލާމާއި ސަލަވާތްލެއްވުނު ނަބިއްޔާގެ ސުންނަތުން އެނގެ އެވެ.