ޕީއެސްއެމްގެ އެމްޑީއަކަށް ނަސްރީން ހަމަޖައްސަނީ
ޕީއެސްއެމް ގައި ގިނަ ދުވަސްތަކެއް ވީ އަދި މިވަގުތު އެ ސްޓޭޝަންގެ ސޭލްސް އެންޑް މާކެޓިންގެ މަގާމުގައި ހުރި ނަސްރީން އެ މަގާމަށް އައްޔަނު ކުރަން ވަނީ ނިންމާފަ އެވެ.
ޕަބްލިކް ސާވިސް މީޑިއާ (ޕީއެސްއެމް) ގެ މެނޭޖިން ޑިރެކްޓަރުގެ މަގާމަށް އިބްރާހިމް ނަސްރީން އައްޔަނު ކުރަން ނިންމައިފި އެވެ.
ޕީއެސްއެމް ގައި ގިނަ ދުވަސްތަކެއް ވީ އަދި މިވަގުތު އެ ސްޓޭޝަންގެ ސޭލްސް އެންޑް މާކެޓިންގެ މަގާމުގައި ހުރި ނަސްރީން އެ މަގާމަށް އައްޔަނު ކުރަން ނިންމާފައިވާކަން މިރާއަށް ވަނީ އެނގިފަ އެވެ. އަދި މާދަމާ ރަސްމީކޮށް އޭނާ މަގާމަށް ހަމަޖައްސާ އެކަން އިއުލާނު ކުރަން ވަނީ ނިންމާފަ އެވެ.
ސަރުކާރުގެ ވާހަކަތަކަށް އިސްކަން ދީފައި އޮންނަ ދައުލަތުގެ މީޑިއާ ހައުސް -- ޕީއެސްއެމްގެ އެމްޑީގެ މަގާމު ހުސްވީ ކުރީން އެ މަގާމުގައި ހުރި މުހައްމަދު ސައީދު އިސްތިއުފާ ދިނުމުންނެވެ، އޭނާ އިސްތިއުފާ ދިނީ މި މަހުގެ 17 ވަނަ ދުވަހު އެވެ.
ސައީދުގެ ކުރީން އެ މަގާމު ފުރީ ކުރީގެ ނޫސްވެރިޔާ ޒީނާ ޒާހިރެވެ. ޒީނާއާ ސައީދު ވެސް އިސްތިއުފާ ދެއްވީ މަގާމާ ހަވާލުވެ ގިނަ ދުވަސްތަކެއް ނުވަނީސް އެވެ. މަގާމުން އިސްތިއުފާ ދިން ސަބަބާއި ގުޅޭގޮތުން ތަފްސީލުކޮށް ދެ ބޭފުޅުން ވެސް ވާހަކަ އެއް ނުދައްކަ އެވެ.
ނަމަވެސް އެ މަގާމުން އިސްތިއުފާ ދޭނީ ރައީސުލްޖުމްހޫރިއްޔާއަށް އެ ބޭފުޅުން މަގާމުގައި ދެމި ތިއްބަވަން ޖެހޭ ކަމަށް ފެނިވަޑައިނުގަތުމުންނެވެ.
ޕީއެސްއެމް ހިންގާ ގޮތާމެދު ގިނަ ބައެއްގެ ފާޑުކިޔުން އަބަދުވެސް އޮވެ އެވެ. އެ ކުންފުނީގެ ޗެނަލްތަކުން އިދިކޮޅުގެ އެއްވެސް ވާހަކައެއް ނުގެނެސްދީ ސަރުކާރާއި ރައީސުލްޖުމްހޫރިއްޔާ ޕްރޮމޯޓް ކުރުން ނޫން ކަމެއް ނުކުރާ ކަމުގެ ތުހުމަތު އޮވެ އެވެ. އެ ތުހުމަތު މިހާރު އިތުރަށް ބޮޑެވެ.
ކޮމެންޓް
Republic of Maldives