ސީރިޔާގެ އައު ލީޑަރު ހައްޔަރުކުރަން ކަނޑައަޅާފައިވާ 10 މިލިޔަން ޑޮލަރުގެ އިނާމު އަނބުރާ ގެންގޮސްފި

ސީރިޔާގެ ކުރީގެ ރައީސް ބަޝާރުލް އަސަދުގެ ވެރިކަން ވައްޓާލުމަށްފަހު، ވެރިޔަކަށް އިސްވި އަހުމަދު އަލް ޝަރައު ހައްޔަރުކުރުމަށް ކަނޑައަޅާފައިވާ 10 މިލިއަން ޑޮލަރުގެ އިނާމު ބާތިލުކޮށްފައިވާކަމަށް އެމެރިކާގެ އިސް ޑިޕްލޮމެޓެއް އިއުލާންކުރައްވައިފިއެވެ. މިކަން އިއުލާނުކުރައްވާފައިވަނީ ސީރިޔާގެ އައު ސަރުކާރާއެކު ދިމިޝްގުގައި ބޭއްވުނު ވާހަކަތަކަކަށްފަހު، އެސިސްޓަންޓް ސެކްރެޓަރީ ފޯރ ނިއަރ އީސްޓަރން އެފެއަރޒް، ބާބަރާ ލީފްއެވެ.

މިޒިޔާރަތަކީ މިމަހު ކުރީކޮޅު ހަޔާތު ތަހްރީރް އަލް ޝާމް (އެޗްޓީއެސް) އިން އިސްވެ، ބަޝާރު ވެރިކަމުން ދުރުކުރިފަހުން އެމެރިކާގެ ޑިޕްލޮމެޓުން ސީރިޔާއަށް ކުރެއްވި ފުރަތަމަ ޒިޔާރަތެވެ. އެމެރިކާއިން 2018 ވަނަ އަހަރުވަނީ އެޗްޓީއެސް އަކީ "ނިރުބަވެރި" ޖަމާއަތެއްކަމަށް ކަނޑައަޅާފައެވެ. އަލް ޝަރާ؛ ނުވަތަ އަބޫ މުހައްމަދު އަލް ޖުލާނީ އަކީ މިޖަމާއަތުގެ ލީޑަރެވެ. އަދި ކުރިން އަލްގައިދާގެ މެމްބަރެކެވެ.

ލީފް ވިދާޅުވެފައިވަނީ މި އިނާމު ބާތިލުކުރަން ނިންމާފައިވަނީ ހުކުރުދުވަހު ބޭއްވުނު މަޝްވަރާތަކުން ފައްސި ނަތީޖާތަކެއް ނެރެވިފައިވާތީ ކަމަށާއި، މީގެތެރެއިން އެއްކަމަކީ "ނިރުބަވެރި" ޖަމާއަތްތަކުގެ އެއްވެސް ބިރެއް ނޯންނާނެކަން ކަމަށެވެ.

ފާހަގަކޮށްލެވޭގޮތުން، ސީރިޔާއަށް ކަނޑައަޅުއްވާފައި ހުންނަވާ ކުރީގެ ސްޕެޝަލް އެންވޯއި ޑެނިއަލް ރޫބިންސްޓައިން އަދި އެމެރިކާގެ ޗީފް އެންވޯއި ފޯރ ހޮސްޓޭޖް އެފެއަރޒް ރޮޖަރ ކާސްޓެންސްގެ އަރިހުގައި ލީފް ސީރިޔާއަށް މިކުރެއްވި ދަތުރުފުޅު ދިމާވެފައިވަނީ އެޗްޓީއެސްއަކީ "ނިރުބަވެރި" ޖަމާއަތެއްކަމަށް ކަނޑައަޅާފައި އޮތް އޮތުން ބަދަލުކުރަން ހުޅަނގުގެ ގައުމުތަކުގެ މެދުގައި މަޝްވަރާކުރެވެމުންދާ ދަނޑިވަޅަކާއެވެ.

އަލް ޖަޒީރާގެ ރޮސިލަންޑް ޖޯޑަން ހުކުރުދުވަހު ރިޕޯޓުކޮށްފައިވާގޮތުން އެމެރިކާއިން ގަބޫލުކުރާގޮތުގައި މިނިންމުމަކީ ބިނާކުރަނިވި، އަމާން ސީރިޔާއެއް ގާއިމްކުރުމަށް އެޅިގެންދިޔަ ފާލެކެވެ. ޖޯޑަން އިތުރަށް ބުނެފައިވާގޮތުން މިކަމަކީ އޭގެ ފައިދާ ވަގުތުން ވަގުތަށް ކުރާނެ ކަމެއް ނޫންކަމަށާއި އެހެންނަމަވެސް ސީރިޔާގެ ދާޚިލީ ހަނގުރާމައިގެތެރެއިން ގެއްލުނު އެމެރިކާ ރައްޔިތުންނަށް (2012 ވަނަ އަހަރު ދިމިޝްގެ ކައިރިން ގެއްލުނު ނޫސްވެރިޔާ އޮސްޓިން ޓައިސް ހިމެނޭހެން) ވީގޮތެއް ހޯދުމަކީ ވޮޝިންގޓަންގެ އަމާޒެއްކަމަށެވެ. 

ޖޯޑަން އިތުރަށް ބުނިގޮތުން އެމެރިކާގެ ޑިޕްލޮމެޓުންނާއި އެޗްޓީއެސް އާއި ކުރެވުނު މަޝްވަރާތަކުގެ ތެރެއިން އޮސްޓިން ޓައިސް ހޯދާ، އާއިލާއަށް ރައްދުކުރަން އެޗްޓީއެސްއަށް ކުރެވުނު ހުރިހާކަމެއް ކުރާނެކަމުގެ ޔަގީންކަން ދީފައިވެއެވެ.