ފުރަތަމަ ކުއާޓާގެ ފަހުން ޕީސީބިން ކުންފުނިތަކުގެ މާލީ ހާލަތާ ގުޅޭ ރިޕޯޓުތައް ނުނެރޭ

އަހަރުގެ ކޮންމެ ކުއާޓާއެއްގައި ދައުލަތުގެ ކުންފުނިތަކުގެ މާލީ ހާލަތާ ގުޅޭ ގޮތުން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ނެރުމުންދާ ކުއާޓާލީ ރިޕޯޓުތައް މި އަހަރުގެ ފުރަތަމަ ކުއާޓާގެ ފަހުން ނުނެރެ އެވެ. 

ޕީސީބީން ކޮންމެ ކުއާޓާއެއް ނިމުމުން އާންމުކުރަމުން އަންނަ ރިޕޯޓުތަކުގައި ދައުލަތުގެ ކުންފުނިތަކުގެ އާމްދަނީއާއި ހަރަދުތަކުގެ އިތުރަށް ކުންފުނިތަކުގައި މުވައްޒަފުން ތިބި އަދަދު ފަދަ ގިނަ މައުލޫމާތުތަކެއް ހިމަނަ އެވެ. މީގެ ކުރިން އާންމުކޮށް ކޮންމެ ކުއާޓާއެއް ނިމޭތާ ދެމަހެެއްހައި ދުވަސް ތެރޭގައި އެ ރިޕޯޓުތައް އާންމުކުރެ އެވެ. 

ނަމަވެސް މި އަހަރު ނިމުމަކާ ގާތަށް ގޮސްފައިވާއިރު މިހާތަނަށް އެ ކުންފުނިން ނެރެފައިވަނީ އެންމެ ރިޕޯޓެކެވެ. އެއީ މި އަހަރުގެ ފުރަތަމަ ކުއާޓާގެ ރިޕޯޓެވެ. އޭގެ ފަހުން އެއްވެސް ކުއާޓާއެއްގެ ރިޕޯޓު އެ ބޯޑުން މިހާތަނަށް އާންމުކޮށްފައިނުވެ އެވެ. 

މި ރިޕޯޓުތައް އާންމުނުކުރާތީ ދައުލަތުގެ ކުންފުނިތަކުގެ މާލީ ހާލަތަށް ފާއިތުވި ދުވަސްތަކުގައި އައި ބަދަލުތައް ނޭނގެ އެވެ. އެގޮތުން އެކި ކުންފުނިތަކުގައި މުވައްޒަފުން ތިބި އަދަދާއި ހަރަދާއި އާމްދަނީއަށް އައި ބަދަލުތައް ފަދަ އެއްވެސް މައުލޫމާތެއް ސާފުނުވެ އެވެ. 

ޕީސީބީން އެންމެ ފަހުން ޝާއިއުކުރި ރިޕޯޓަށް ބަލާއިރު މި އަހަރުގެ ފުރަތަމަ ކުއާޓާގައި ދައުލަތުގެ ކުންފުނިތަކަށް 17 ބިލިއަނަށްވުރެ ބޮޑު އާމްދަނީއެއް ލިބުނުއިރު ކުންފުނިތަކަށް ފައިދާގެ ގޮތުގައި ލިބިފައިވަނީ 1.6 ބިލިއަން ރުފިޔާއެވެ. ނިމުނު އަހަރަަށްވުރެ މި އަހަރުގެ ފުރަތަމަ ކުއާޓާގައި ދައުލަތުގެ ކުންފުނިތަކަށް ލިބުނު އާމްދަނީވަނީ 20 އިންސައްތަ ދަށްވެފަ އެވެ. 

އެ ރިޕޯޓުން އެނގޭ ގޮތުގައި ކުންފުނިތަކުން ނަގާފައިވާ ދަރަނީގެ އަދަދު 33.82 ބިލިއަން ރުފިޔާއަށް އަރަ އެވެ. އަދި ކުންފުނިތަކުގެ މުވައްޒަފުންގެ އަދަދު 33،284 މުވައްޒަފުންނަށް އިތުރުވެފައިވެ އެވެ.

މި އަދަދުތަކަށް ފާއިތުވި ދެ ކުއާޓާގައި ބޮޑެތި ބަދަލުތަކެއް އަންނާނެ ކަމުގައި ބެލެވުނު ނަމަވެސް އެ ރިޕޯޓުތައް އާންމުނުކުރާތީ އެ ބަދަލުތައް ދެނެގަނެވޭނެ ގޮތެއް ނޯވެ އެވެ.