ވަގަށް ގޯތި ވިއްކުން؛ ކުރީ ސަރުކާރަށް އަމާޒުކުރާ ހުރިހާ ތުހުމަތެއް ދޮގުކޮށްފި

"އަޅުގަނޑު ޔަގީންކޮށްދޭން ބޭނުންވަނީ 'ބިންވެރިޔާ' އަދި 'ގެދޮރުވެރިޔާ' ސްކީމްގެ ދަށުން އެއްވެސް ލިޔުމެއް އުސޫލުން ބޭރުން އަދި ގަވާއިދާ ހިލާފަށް އެއްވެސް ފަރާތަކަށް ދޫކޮށްފައެއް ނޯންނާނެ. އެ ސިސްޓަމް ތެރެއިން ދުލެއް ވެސް ނުކުރެވޭނެ،"

ކުރީގެ ސްޓޭޓް މިނިސްޓަރު އަކްރަމް ކަމާލުއްދީން އަދި އެމްޑީޕީގެ ތަރުޖަމާނު އަނަސް އަބްދުއްސައްތާރު --

ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު އިސްކޮށް ހުންނަވައި ގަވާއިދާ ހިލާފަށް ހިންގަމުން ދިޔަ "ޖަރީމާތަކާ" ގުޅިގެން ރައީސް ޑރ. މުހައްމަދު މުއިއްޒުގެ ސަމާލުކަމަށް އޭރުގެ ޗެއާޕާސަން އަހުމަދު ޒުހޫރު ގެންނެވި މައްސަލަތައް އެއްފަރާތްކޮށް، ކުރީ ސަރުކާރަށް ތުހުމަތުތަކެއް ކުރުމުން އެމްޑީޕީން ނުރުހުން ފާޅުކޮށްފި އެވެ.

"ބިންވެރިޔާ" ސްކީމްގެ ދަށުން ދޫކޮށްފައިވާ ގޯތިތަކެއް އުސޫލުން ބޭރުން ބަޔަކަށް ވިއްކި މައްސަލައިގެ ތުހުމަތު، އެޗްޑީސީގެ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދަށާއި ބޯޑު މެންބަރުންނަށް ކުރަން ފެށުމާއެކު ސޯޝަލް މީޑިއާގައި ވަނީ ޒުހޫރު މިދިޔަ ޖުލައި މަހު ރައީސަށް ފޮނުއްވި ސިޓީއެއް އާންމުވެފަ އެވެ. އެ ސިޓީގައި މި ގޯތިތައް ވިއްކަން އުޅޭކަމުގެ މައުލޫމާތުތައް ވަރަށް ތަފްސީލުކޮށް ރައީސްއާ ހިއްސާކޮށްފައިވެ އެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ތަރުޖަމާނު އަނަސް އަބްދުއްސައްތާރު ވިދާޅުވީ ފުލުހުން ބުރާސްފަތި ދުވަހުގެ ރޭ ބޭއްވި "ސިޔާސީ" ނޫސްވެރިންގެ ބައްދަލުވުމުގައި ކުރީ ސަރުކާރަށް އެކަމުގެ ތުހުމަތުވާ މޭރުމުން ވާހަކަ ދެއްކުމަކީ ބަލައިގަނެވޭނެ ކަމެއް ނޫން ކަމަށެވެ.

"އަޅުގަނޑުމެންގެ ސުވާލަކީ ޕޮލިސް ސާވިސް އިން އެޗްޑީސީގެ ޗެއާމަން ފޮނުވާފަ އޮތް ސިޓީއާ ގުޅިގެން ޗެއާމަން [ޒުހޫރު] ފާހަގަކުރައްވާފަ ހުރި ކަންތައްތަކާމެދު އެއްވެސް ފިޔަވަޅެއް އަޅުއްވާފަ އެބައޮތްތޯ؟ ބޯޑުގެ ހުރިހާ މެންބަރުންގެ ޕާސްޕޯޓު ހިފެހެއްޓި، ހައުސިން މިނިސްޓްރީގަ މިހާރު ތިބި ބޭފުޅުންގެ ޕާސްޕޯޓް ހިފެހެއްޓިފަ ހުރީ، ދެން ކީއްވެގެންތޯ ހަމައެކަނި ސަރުކާރުގެ ރަސްމީ ޑޮކިއުމެންޓެއް ފޯޖުކޮށްފަ ހުރި ބޭފުޅެއްގެ ބަސް ގަބޫލުކުރައްވަންވީ؟" އަނަސް ސުވާލު އުފެއްދެވި އެވެ.

އޭނާ ވިދާޅުވީ ޒުހޫރު ރައީސަށް ފޮނުއްވި ސިޓީގައި ވަރަށް ތަފްސީލުކޮށް ފަޒުލް ކުރައްވަމުން ގެންދަވާ ކަންކަން ބަޔާންކުރައްވާފައިވާ ކަމަށެވެ. އޭގެ ތެރޭގައި އެމްޑަބްލިއުއެސްސީގެ ގޯތިތަކެއް ނެގުމަށްފަހު އަމިއްލަ ބަޔަކަށް ދިން ކަމަށާއި އަދި އެޗްޑީސީން އެކި ބޭނުމަށް ބޭރުގެ ފަރާތްތަކަށް ދޫކޮށްފައި ހުރި ފަސް ޕްރޮޖެކްޓަރުން އެއް މިލިއަން ޑޮލަރު ނަގާފައިވާ ކަމަށް ވެސް ތުހުމަތުކޮށްފައިވާ ކަމަށެވެ. މިއިން އެއްވެސް ކަމެއް ރައީސް ބައްލަވާފައި ނުވާއިރު، ފުލުހުންގެ ތަހުގީގުގައި މިކަމާމެދު އެއްވެސް ފިޔަވަޅެއް އަޅާފައިވޭތޯ އަނަސް ވަނީ ސުވާލުކުރައްވާފަ އެވެ.

ކުރީ ސަރުކާރަށް އަމާޒުކުރާ ތުހުމަތުތައް ދޮގު ކުރި

މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަދި ގޯއްޗާއި ފްލެޓްގެ ކަންކަމުގައި ކުރީން އެންމެ އިސްކޮށް އުޅުއްވ އަކްރަމް ކަމާލުއްދީން ވިދާޅުވީ ފުލުހުން ރައްޔިތުންނަށް ކަންކަން އޮޅުވާލަން މަސައްކަތް ކޮށްފައިވާ ކަމަށެވެ.

އޭނާ ވިދާޅުވީ އެޗްޑީސީ އަދި ފަޒުލްގެ ބޭބެ ފަޒީލްއާދެމެދު އެގްރީމަންޓެއް ކަމަށް ދެއްކުމަށް ޓަކައި ތައްޔާރުކޮށްފައިވާ ލިޔުމަކާ މެދު ސުވާލު އުފެދުމުން، އެ ޑޮކިއުމަންޓްގެ ސައްހަކަން ކަށަވަރުކުރުމަށް ފޮރެންސިކް ތަހުލީލެއް ނުހަދައި، އެއީ ކުރީ ސަރުކާރުން ދޫކުރި ލިޔުމެއްކަން ދޭހަވާ މޭރުމަކުން ފުލުހުން އެވާހަކަ ދެއްކީ އޮޅުވާލަން ކަމަށެވެ. 

ފަޒީލާ އޭނާއާ ބައްދަލުކޮށްފައިވާ ކަމަށް ދެކެވޭ ވާހަކަތައް ވެސް އަކްރަމް ވަނީ ދޮގު ކުރައްވާފަ އެވެ. 

"އަޅުގަނޑު ޔަގީންކޮށްދޭން ބޭނުންވަނީ 'ބިންވެރިޔާ' އަދި 'ގެދޮރުވެރިޔާ' ސްކީމްގެ ދަށުން އެއްވެސް ލިޔުމެއް އުސޫލުން ބޭރުން އަދި ގަވާއިދާ ހިލާފަށް އެއްވެސް ފަރާތަކަށް ދޫކޮށްފައެއް ނޯންނާނެ. އެ ސިސްޓަމް ތެރެއިން ދުލެއް ވެސް ނުކުރެވޭނެ،" އަކްރަމް ވިދާޅުވި އެވެ.

މިކަމާ ގުޅޭ ގޮތުން ވާހަކަ ދައްކަވަމުން އަނަސް ވިދާޅުވީ މީ ސިޔާސީ ކުރަން ޖެހޭ މައްސަލައެއް ނޫން ކަމަށެވެ. މި މައްސަލަ ވަރަށް ސީރިއަސް މައްސަލައެއްގެ ގޮތުގައި ބަލައި، ކަމާ ގުޅުންހުރި ހުރިހާ ފަރާތްތަކެއް ފުލުހަށް ހާޒިރުކޮށް މައުލޫމާތު ހޯދަން އޭނާ ވަނީ ގޮވާލައްވާފަ އެވެ.

މި މައްސަލައިގައި ތަހުގީގު ތެރެއިން ފުލުހުން ވަނީ ފަޒުލް ހިމެނޭހެން އެޗްޑީސީގެ އިސްވެރިންނާއި އަކްރަމް ހިމެނޭހެން ކުރީ ސަރުކާރުގައި ގޯއްޗާއި ފްލެޓް ދޫކުރުމުގައި އިސްކޮށް އުޅުނު ހަތަރު ފަރާތެއްގެ ޕާސްޕޯޓު ހިފަހައްޓާފަ އެވެ.

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.