ކްރިސްމަސް ފާހަގަކުރުމަކީ ހުއްދަ ކަމެއް ނޫން: ހުތުބާ

ނަސާރާ ދީނުގެ އީދުތަކުގެ ތެރޭގައި ހިމެނޭ ކްރިސްމަސް ފާހަގަކުރުމަކީ މުސްލިމުންނަށް ހުއްދަވެގެންވާނެ ކަމެއް ނޫންކަމަށް މިއަދުގެ ހުކުރު ހުތުބާގައި ބަޔާންކޮށްފި އެވެ. 

ހުތުބާގައި ބުނެފައިވަނީ އަޅުކަމުގެ ގޮތުން ޣައިރު މުސްލިމުން ކުރާ ކަންކަން ނަކަލުކުރުމަކީ އިސްލާމީ އުންމަތުގެ ޝަހުސިއްޔަތު ފުނޑުފުނޑުވެ އެ ދީނުގެ އަމިއްލަވަންތަކަން ގެއްލިގެން ހިނގައިދާނެ ކަމެއް ކަމަށެވެ. އަދި މުސްލިމުން ޣައިރު މުސްލިމުންގެ ދީނީ ޝިއާރުތަކުގައި ބައިވެރިވުމަކީ އިލްމުވެރިން ވިދާޅުވާ ގޮތުން ކަނޑައެޅިގެން ހަރާމް ކަމެއްކަން ހުތުބާގައި ފާހަގަކުރި އެވެ. 

ހުތުބާގައި ބުނެފައިވާ ގޮތުން ޣައިރު މުސްލިމުންގެ ޝިއާރުތަކުގައި ބައިވެރިވުމުގެ ތެރޭގައި އެމީހުންގެ އީދުތައް ފާހަގަކުރުމާއި އެކަމުގައި ބައިވެރިވެ ތަހުނިޔާ ކިޔުން ހިމެނޭނެ އެވެ. އަދި ގުރުއާނުގައި ސޫރަތުލް ފުރުގާނުގައި މާތްﷲ ބަޔާންކުރައްވާފައިވާ ދޮގު ހެކިބަހަކީ މުޝްރިކުންގެ އީދުތައްކަމަށް އިބްނު އައްބާސްގެ އަރިހުން ވާރިދުވެފައިވާކަން ހުތުބާގައި ފާހަގަކޮށްފައިވެ އެވެ. 

އަދި އިބްނު އައްބާސްގެ ތަފުސީރުގެ މުރާދަކީ މުސްލިމުންނަކީ ޣައިރު މުސްލިމުންގެ އީދުތަކަށް ހާޒިރުވެ، އެ އިހުތިފާލުތަކުގަ މުސްލިމުން ބައިވެރިނުވަނީ އެފަދަ އިހުތިފާލުތަކުގައި މާތް ފިޔަވައި އެހެނިހެން ފަރާތްތައް މަތިވެރިކޮށް މާތްކުރާތީ ކަމަށްވެސް ހުތުބާގައި ބުނެފައިވެ އެވެ. 

ކްރިސްމަސް ފާހަގަކުރުމުގައި ބައިވެރިވުމަކީ އިސްލާމްދީން ހުއްދަކުރާ ކަމެއް ނޫންކަން ފާހަގަކޮށް ހުތުބާގައި ބުނެފައިވަނީ ކްރިސްމަސް ގަހާއި ސެންޓަ ކްލޯސް ފަދަ ނަސާރާއިން އެމީހުންގެ ދީނަށް ނިސްބަތްކޮށް ކުރާ އެތައް ކަމެއް ކްރިސްމަސްގެ އިހުތިފާލުތަކުގައި ހިމެނޭ ކަމަށެވެ. 

ޣައިރު މުސްލިމުންގެ އީދުތައް އިހުތިފާލުކުރުން މުސްލިމުންނަށް ހުއްދަނުވާނެކަން ކީރިތި ގުރުއާނާއި ސަލާމާއި ސަލަވާތްލެއްވުނު ނަބިއްޔާގެ ސުންނަތުން އެނގޭކަން ބަޔާންކޮށްދެމުން ހުތުބާގައި ބުނެފައިވަނީ ރާއްޖޭގެ މުޖުތަމައު އެފަދަ ކަންކަމުން ސަލާމަތްކުރަންޖެހޭ ކަމަށެވެ. 

އަދި އިސްލާމްދީނުގެ އަދާވާތްތެރިން މުސްލިމުން އެމީހުންގެ ދީން މަނާކުރާ ކަންކަމުގެ ތެރެެއަށް ވައްޓައިލުމަށް އަބަދުވެސް މަސައްކަތްކުރަމުންދާކަމަށް ހުތުބާގައި ބުނެފައިވެ އެވެ. 

ހުތުބާގަައި ފާހަގަކުރި ގޮތުގައި ޣައިރު މުސްލިމުންގެ އީދުތަކުގައި ބައިވެރިނުވި ނަމަވެސް އެމީހުންނާމެދު އިހުސާންތެރިވެ އަދުލުވެރިވުން އިސްލާމްދީން މަނައެއް ނުކުރެ އެވެ. އަދި ކިއެއްތަ އަނިޔާވެރިނުވާ ހިނދެއްގައި ޣައިރު މުސްލިމުންނާ މުއާމަލަތްކުރުމުގެ އަސްލަކީ ސުލްހަވެރިކަމައި އަދުލުވެރިކަންކަމަށް ހުތުބާގައި ފާހަގަކުރި އެވެ. 

ކީރިތި ގުރުއާނުން ދަލީލު ދައްކަމުން ހުތުބާގައި ފާހަގަކުރީ ސުލްހަވެރިކަމާއެކު އުޅޭ ޣަައިރު މުސްލިމުންނަށް އިހުސާންތެރިކޮށް އަދަލުވެރިވުމަކީ އިސްލާމްދީނުގެ ތެރެއިންވާ ކަމެއް ކަމަށެވެ. އިސްލާމީ ހަޟާރަތުގައި ޣައިރު މުސްލިމުން އުޅެމުންދިޔައީ ރައްކާތެރިކަމާއެކު އަމާންކަމުގައި ކަމަށް ހުތުބާގައި ފާހަގަކުރި އެވެ.