ކުރީ ސަރުކާރުން ބަދަލުދޭން ނިންމި ނުވަ އެއްބަސްވުމެއް ބާތިލު ކޮށްފި

ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކުރުމަށް ނިމިދިޔަ ސަރުކާރުން ސޮއިކޮށްފައިވާ ސެޓްލްމަންޓް ނުވަ އެއްބަސްވުމަކީ ބާތިލް އެއްބަސްވުންތަކެއް ކަމާއި އެ އެއްބަސްވުންތަކަށް އަމަލުކުރަން ނުޖެހޭ ކަމަށް ބަންޑާރަނައިބު ނިންމަވާ އެކަން ކަމާބެހޭ ދައުލަތުގެ އިދާރާތަކަށް މިއަދު އަންގަވައިފި އެވެ.

ބަދަލުދޭން ކުރީ ސަރުކާރުން އުފެއްދި "މައްސަލަ ހައްލުކުރުމަށް ލަފާދޭ ކޮމިޓީ" ރައީސް މުއިއްޒު ވަނީ އުވާލައްވާފަ އެވެ. އަދި އެ އުސޫލުގެ ދަށުން ސެޓްލްމަންޓް އެއްބަސްވުމުގައި ސޮއިކޮށްފައިވާ މައްސަލަތައް ދިރާސާކުރުމަށް ބަންޑާރަ ނާއިބުގެ އޮފީހަށް ވަނީ ފޮނުވާފަ އެވެ.

ބަންޑާރަ ނާއިބުގެ އޮފީހުން ބުނީ އުސޫލުގެ ދަށުން ސޮއިކޮށްފައިވާ އެއްބަސްވުންތަކާ ގުޅޭ މައްސަލަ ރައްޔިތުންގެ މަޖިލީހުގެ މާލިއްޔަތު ކޮމިޓީން ދިރާސާ ކުރުމަށް ފަހު އެ އެއްބަސްވުންތަކަކީ އުފެދުމުގައިވެސް ބާތިލް އެއްބަސްވުންތަކެއް ކަމަށް އެ ކޮމިޓީއަށް ފެންނާތީ އެ އެއްބަސްވުންތައް ބާތިލު ކުރުމަށް ގާނޫނީގޮ ތުން ކުރަންޖެހޭ އެންމެހައި ކަންކަން ކުރުމަށާ އެ އުސޫލާއި އެއްބަސްވުންތަކުގެ ދަށުން އެއްވެސް ބަދަލެއް ދީފައިވާނަމަ އެ ބަދަލެއް އަނބުރާ ހޯދުމުގެ ކަންކަން ކުރުމަށް އެ އޮފީހަށް އަންގާފައިވާ ކަމަށެވެ.

އަދި މިކަމުގައި ހިމެނޭ ފަރާތްތަކުގެ މައްޗަށް އަޅަންޖެހޭ ފިޔަވަޅުތައް އެޅުމަށް ބަންޑާރަނައިބަށާއި ކަމާ ގުޅުންހުރި އިދާރާތަކަށް ދެންނެވުމަށް ފެންނަ ކަމަށް އެ ކޮމިޓީން ނިންމަވާ ރައްޔިތުންގެ މަޖިލީހުން އެކަން އަންގާފައިވާ ކަމަށެވެ.

މި މައްސަލަތައް ބަންޑާރަ ނާއިބުގެ އޮފީހުން ދިރާސާކުރިއިރު އެ އުސޫލަކީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީ އާއި ގާނޫނާ ހިލާފަށް އެކުލަވާލާފައިވާ އުސޫލެއް ކަމާއި އެ އުސޫލުގެ ދަށުން ނިންމާފައިވާ ނިންމުންތަކާއި ސޮއިކޮށްފައިވާ ސެޓްލްމަންޓް އެއްބަސްވުންތަކަކީ ވެސް ދައުލަތުގެ އޮޑިޓާ ޖެނެރަލްގެ ބަހެއް ނެތި ތައައްސިފީ ގޮތެއްގައި ވަކި ފަރާތްތަކަކަށް ނުހައްގު މުއްސަނދިކަމެއް ލިބޭގޮތަށް ނިންމާފައިވާ ނިންމުންތަކެއް ކަން ފާހަގަ ކުރެވިފައިވާ ކަމަށް ބުންޏެވެ.

".. އެހެންކަމުން،އެ އުސޫލުގެ ދަށުން ނިމިދިޔަ ރިޔާސީ ދައުރުގެ ތެރޭގައި ސޮއިކޮށްފައިވާ ނުވަ ސެޓްލްމަންޓް އެއްބަސްވުމަކީ، ގާނޫނީ ގޮތުން ބަނދެވޭ އެއްބަސްވުންތަކެއް ނޫންކަމާއި އެއީ ބާތިލް އެއްބަސްވުންތަކެއް ކަމާއި އެ އެއްބަސްވުންތަކަކީ އަމަލުކުރަންނުޖެހޭ އެއްބަސްވުންތަކެއް ކަން ކަމާބެހޭ ދައުލަތުގެ އިދާރާތަކަށް ބަންޑާރަނައިބު ވަނީ މިއަދު އަންގަވާފައެވެ،"

އެ އެއްބަސްވުންތަކަކީ؛

މީގެ ތެރެއިން ޔޫމެޓް ކޮންސްޓްރަކްޝަން ޕްރައިވެޓް ލިމިޑެޓަށް ގެއްލުމުގެ ބަދަލުގެ ގޮތުގައި 26 މިލިއަން ދީބާޖާ އިންވެސްޓްމަންޓް ޕްރައިވެޓް ލިމިޑެޓަށް 64 މިލިއަން ދިނުމަށް އޮތީ ނިންމާފަ އެވެ. އަމްސަން އެންޑް ފުޑް ބެވަރެޖަސް ޕްރައިވެޓް ލިމިޑެޓަށް ފަސް މިލިއަން އެއްލައްކަ ރުފިޔާގެ ބަދަލެއް  ދިނުމަށް ނިންމާފައިވެ އެވެ.

ބްލޫ ލެގޫން އިންވެސްޓްމަންޓަށް އއ. މަޑޫގަލި 50 އަހަރަށް ކުއްޔަށް ދިނުމާ އެކު އެ ރަށް ތަރައްގީ ކުރުމަށް ކޮންސްޓްރަކްޝަން މުއްދަތުގެ ގޮތުގައި ހަ އަހަރު ދިނުމަށާއި ކުރީގެ ލީޒް އެގްރީމަންޓާއި ގުޅިގެން އެއްވެސް ފައިސާއެއް ދައްކަން ނުޖެހޭ ގޮތަށް އެއްބަސްވެ ގެއްލުމުގެ ބަދަލުގައި ދިނުމަށް ދިނުމަށް އެއްބަސްވި 20 މިލިއަން ޑޮލަރު ފައިސާ އިން ދިނުމުގެ ބަދަލުގައި ރ. ވިލިނގިލިއްޔާއި ރ. ތާވަތާ އާއި ނ. އޮރިމަސްވަރު 50 އަހަރަށް ދިނުމާ އެކު ކޮންސްޓްރަކްޝަން މުއްދަތުގެ ގޮތުގައި ފަސް އަހަރު ދިނުމަށް ވެސް އޮތީ ނިންމާފަ އެވެ. އަދި ގެއްލުމުގެ ގޮތުގައި ބާކީ ދޭން ޖެހޭ ކަމަށް ކަނޑައެޅި 8،477،000 އެމެރިކާ ޑޮލަރުގެ ބަދަލުގައި  ރ. ވިލިނގިލިއްޔާއި ރ. ތާވަތާ އާއި ނ. އޮރިމަސްވަރުގެ އެޑްވާންސް ކުލީގެ ގޮތުގައި އެ ފައިސާ ހަމަޖެއްސުމަށް އޮތީ ނިންމާފަ އެވެ.

ލެޝާ ބީޗް ޕްރައިވެޓް ލިމިޓެޑަށް ބަދަލުގެ ގޮތުގައި ލ. ފޮއްތެޔޮބޮޑުފުށީގެ ވާކް ޕްލޭން މިނިސްޓްރީއަށް ހުށައެޅި ދުވަހުން ފެށިގެން ސެލްޓްމަންޓް އެއްބަސްވުމުގައި ސޮއިކުރާ ދުވަހާ ހަމައަށް ހިނގާ މުއްދަތު 30 ދުވަހަށް ރައުންޑް އޮފް ކޮށް ލީޒް އެގްރީމަންޓް އިތުރުކޮށްދީ ރަށުގެ ލީޒް އެގްރީމަންޓަށް ގެންނަ އިސްލާހު ގައި ދެ ހަފްތާ ތެރޭ ސޮއިކުރަން ވަނީ އެއްބަސްވެފަ އެވެ.

އެގްޒޯޓިކް ޕްރޮޕަޓީޝް ޕްރައިވެޓް ލިމިޑެޓަށް ނ. ރާފުށީގެ ބަދަލުގައި ނ. އެކުޅިވަރު 99 އަހަރަށް ދިނުމަށާ އެ ރަށުގެ ކޮންސްޓްރަކްޝަން މުއްދަތުގެ ގޮތުގައި ހަ އަހަރު ދިނުމާއެކު ކުރީގެ ލީޒް އެގްރީމަންޓާ ގުޅޭ އެއްވެސް ފައިސާއެއް ދައްކަން ނުޖެހޭ ގޮތަށް އެއްބަސްވުމުގައި ހިމަނަން ވަނީ ނިންމާފަ އެވެ.

މ. ތްރީއޭވިލާ، އަބްދުﷲ އަލީ އަށް ހދ. ހޮނޑާފުށި 50 އަހަރަށް ދިނުމާއެެކު އާ ލީޒް އެގްރީމަންޓްގައި ސޮއިކޮށް ހޮނޑާފުށީގެ ކުއްޔާއި ޖޫރިމަނާގެ އަދަދު މާފު ކުރުމަށް އޮތީ ނިންމާފަ އެވެ. މީގެ އިތުރުން ޖޭއެޗް ރިސޯޓް ހދ. ކުޑަމުރައިދޫ 50 އަހަރަށް ދިނުމާއެެކު އެ ރަށުގެ ކޮންސްޓްރަކްޝަން މުއްދަތުގެ ގޮތުގައި ހަ އަހަރު ދުވަސްވީ ކުރީގެ އެއްބަސްވުމުގެ ދަށުން ކުއްޔާއި ޖޫރިމަނާ ދައްކަން ނުޖެހޭ ގޮތަށް ވަނީ އެއްބަސްވުން ހަދަން ނިންމާފަ އެވެ.