ޝުޖާ ދެ ބިން ބައްލަވައިގަތް ވާހަކައަކީ ދޮގެއް | ބައްލަވައިގަތީ އުސޫލުގެ ތެރެއިން އެއް ބިން

ހުޅުމާލޭ ދެވަނަ ފިޔަވަހިން ބާރަށު ދާއިރާގެ މަޖިލިސް މެންބަރު އިބްރާހީމް ޝުޖާ ދެ ބިން ބައްލަވައިގަނެފައިވާކަމަށް ބައެއް ފަރާތްތަކުން ކުރާ ތުހުމަތު އޭނާ ދޮގުކުރައްވައިފި އެވެ. 

ހާއްސަ އުސޫލެއްގެ ތެރެއިން ހުޅުމާލެއިން ހަ މިލިއަނެއްހައި ރުފިޔާއަށް ދެވަނަ ބިމެއް ޝުޖާ ބައްލަވައިގަތްކަމަށް ބުނެ ސޯޝަލް މީޑިޔާގައި ފަތުރަމުން އަންނަ ވާހަކަތައް ދޮގުކުރައްވައި އެކްސްގައި އޭނާ ކުރެއްވި ޕޯސްޓެއްގައި ވިދާޅުވެފައިވަނީ އޭނާ ބިމެއް ބައްލަވައިގަތީ އެޗްޑީސީން އަމަލުކުރާ އުސޫލުގެ ތެރެއިން ބީލަން ހުށަހެޅުމަށް ހުޅުވައިލި ފުރުސަތުގައި ކަމަށެވެ. 

"މިރާ"އަށް އިތުރު މައުލޫމާތު ދެއްވަމުން ޝުޖާ ވިދާޅުވީ ބިން ބައްލަަވަައިގަތީ ބިން ވިއްކުމަށް އެޗްޑީސީން އަމަލުކުރަމުން އައި އުސޫލުގެ ތެރެއިން ހުށަހަޅަންޖެހޭ ބިޑް ސެކިއުރިޓީއާއި، އެކްސްޕެރެޝަން އޮފް އިންޓަރެސްޓު ހުށަަހަޅުއްވައިގެން އެ ހަމަތަކުގެ ތެރެއިން ކަމަށެވެ. 

ހުޅުމާލެއިން ބިން ވިއްކުމުގައި ފާއިތުވި ދައުރުން ފެށިގެން އެޗްޑީސީން އަމަލުކުރަމުން އަންނަަ އުސޫލުގައި ބަޔާންކުރަނީ ބީލަމަށް ބިންތަކެއް ހުޅުވައިލުމުން އެކްސްޕްރެޝަން އޮފް އިންޓެރެސްްޓު ހުށަހަޅަން ބޭނުންވާ ފަރާތްތަކަށް 500،000 ރުފިޔަގެ ބިޑް ސެކިއުރިޓީއެއް ހުށަހަޅަންޖެހޭނެ ކަމަށެވެ. 

އަދި އެ ބިޑް ސެކިއުރިޓީ އެޕްރޫވްކުރުމުން ދެން އެކްސްޕްރެޝަން އޮފް އިންޓަރެސްޓުގެ ގޮތުގައި ބިމަށް ހުށަހެޅޭނެ އެންމެ ކުޑަ އަގު ނުވަތަ އެއަށްވުރެ ބޮޑު އަގެއް ހުށަހެޅުމަށް ފުރުސަތު ލިބޭނެ ކަމަށް އުސޫލުގައި ބަޔާންކުރެ އެވެ. 

ޝުޖާ ވިދާޅުވީ އޭނާ ބައްލަވައިގަތް ބިން ބައްލަަވައިގަތީ އެ އުސޫލުގެ ތެރެއިން ބިޑް ސެކިއުރިޓީ ހުށަަހަޅުއްވައި އެއަށް އެޕްރޫވަލް ލިބިވަޑައިގަތުމުން، އެކްސްޕްރެޝަން އޮފް އިންޓަަރެސްޓު ފޯމު ހުށަހަޅުއްވައިގެން ކަމަށެވެ. ޝުޖާ ވިދާޅުވި ގޮތުގައި އޭނާ އީއޯއައިގަ ހުށަހަޅުއްވާފައިވާ އަގަކީ ބީޗް ސައިޑް ބިމަކަށް ހުށަހެޅޭނެ އެންމެ ކުޑަަ އަގެވެ. 

އެއިރު އެޗްޑީސީން ކުރި އިއުލާނުގައިވާ ގޮތުން ބީޗް ސައިޑް ބިމަކަށް އެންމެ ކުޑަ އަގެއްގެ ގޮތުގައި ހުށަހެޅޭނީ 4،000 ރުފިޔާ އެވެ. ޝުޖާ އީއޯއައި ހުށަހެޅުއްވި ބިމަކީ 2,196.37 އަކަފޫޓުގެ ބިމެކެވެ. އެބިމަށް ހުށަހެޅުއްވި އަގާއެކު ޖެހޭނީ ޖުމްލަ 8،785480 (އަށް މިލިއަން ހަތްސަތޭކަ އަށްޑިހަ ފަސްހާސް ހަތަރުަސަތޭކަ އަށްޑިހަ) ރުފިޔާ އެވެ. 

އެ އަގު އަދާކުރާއިރު އޭގެ އިތުރަށް ޖީއެސްޓީގެ ގޮތުގައި 702،838.4 ރުފިޔާ ދައްކަވަންޖެހޭނެ އެވެ. އެއާއެކު ބިމުގެ ޖުމްލަ އަގަކަށްވާނީ 9.4 މިލިއަން ރުފިޔާ އެވެ. މިހާތަނަށް މީޑިޔާގައި ޝުޖާ ބައްލަވައިގަތްކަމަށް އަޑުއަރާފައި އޮތް ބިން ބައްލަވައިގަތް އަގެއްގެ ގޮތުގައި ރިޕޯޓުކޮށްފައި އޮތީވެސް 9.4 މިލިއަން ރުފިޔާ އެވެ. 

އުސޫލު އޮންނަ ގޮތުން އީއޯއައި ހުށަހަޅާ މުއްދަތުން ފެށިގެން ދިހަ ދުވަހުގެ ތެރޭގައި އެ ބިމަށް އިތުރު ފަރާތަކުން އީއޯއައި ހުށަނާޅާނަމަ އެތަނެއް ބީލަމެއް ނެތި އީއައިއޯ ހުށަހެޅި ފަރާތަކަށް ވިއްކާނެ އެވެ. ޝުޖާ ވިދާޅުވީ އޭނާ ބިން ބައްލަވައިގަތީ އެ އުސޫލުން އިތުރު ފަރާތަކުން އެ ބިމަށް އީއޯއައި ހުށަހަޅާފައި ނެތުމުން އިތުރު ބީލަމަކަށް ވަޑައިނުގެންނެވެ. 

ޝުޖާ ވިދާޅުވީ ބިން ބައްލަވައިގަތީ އަތްޕުޅުގައި އެއްކުރެވިފައި ހުރި ފައިސާގެ އިތުރަށް އޭނާ ބޭންކަކުން ލޯނެއްވެސް ނަންގަވައިގެންނެވެ. އަދި އޭނާއަކީ ވަރަށް ދުވަހު ވިޔަފާރިކުރެއްވި ބޭފުޅަކަށްވާތީ އެއްކުރެއްވިފައި ހުރި ފައިސާއާއި ލޯނުން ބިން ބައްލަވައިގެންނެވޭ ވަރުގެ ފައިސާ ހަަމަޖެއްސެވުނު ކަމުގައި ފާހަގަކުރެއްވި އެވެ. 

އޭނާ ހާއްސަ އުސޫލަކުން ބައްލަވައިގަތްކަމަަށް ބުނެ ސޯޝަލް މީޑިޔާގައި ފަތުރާ ބިމަކީ އުސޫލުގެ ތެރެއިން ބައްލަވައިގަތް ބިންކަމަށްވެސް ޝުޖާ ވިދާޅުވި އެވެ. އެއީ ލޮޓު ނަންބަރު 20339 އެވެ. ޝުޖާ ވިދާޅުވީ އެ ނޫން ބިމެއް ހުޅުމާލެއިން ބައްލަވައިގަނެފައި ނޯންނާނެ ކަމުގެ ޔަގީންކަން ދެއްވާ ކަމަށެވެ. އަދި އުސޫލުން ބޭރުން އެއްވެސް ކަމެއް ނުކުރައްވާކަމުގެ ޔަގީންކަން ދެއްވި އެވެ. 

"އަޅުގަނޑު ބިމެެއް ހޯދާކަށް ފަޒުލްއަކަށް އަދި އެޗްޑީސީގެ އެހެން ވެރިޔަކަށްވެސް ގުޅާފައެއް ނޯންނާނެ. ބިން ގަތީ އޮންނަ އުސޫލުގެ ތެރެއިން. އެ އުސޫލަކީ މި ސަރުކާރު އައުމުގެ ކުރިންވެސް އަމަލުކުރަމުން އައި އުސޫލެއް،" ޝުޖާ ވިދާޅުވި އެވެ.