ގޯއްޗާއި ފްލެޓާ ބެހޭ މައްސަލަތައް ތަހުގީގުކުރަން ޕީޖީ އަމުރުކޮށްފި

ސަރުކާރުން ހިންގާ "ބިންވެރިޔާ'' އަދި ''ގެދޮރުވެރިޔާ'' ސްކީމަށް އެދި ފޯމު ބަލައިގަތުމުގައާއި ގޯއްޗާއި، ފްލެޓް ލިބޭ ފަރާތްތައް ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި، ކަނޑައެޅިފައިވާ އުސޫލުތަކާއި ގަވާއިދުތަކާ ހިލާފަށް އަމަލުކޮށްފައިވާކަމަށް ތުހުމަތުތައް ބެލުމަށް ޖިނާއީ ތަހުގީގެއް ހިންގަން ޕްރޮސެކިއުޓާ ޖެނެރަލް އައްބާސް ޝަރީފު ކަމާ ގުޅުން ހުރި އިދާރާތަކުގެ މައްޗަށް އަމުރުކުރައްވައިފި އެވެ.

ޕްރޮސެކިއުޓާ ޖެނެރަލްގެ އޮފީހުން ބުނީ ބުނީ މި މައްސަލަތަކާމެދު ހުރި ކަންބޮޑުވުންތައް ޕީޖީގެ ސަމާލުކަމަށް އައިސްފައިވާ ކަމަށެވެ. މި ކަމަކީ އާންމު މަސްލަހަތު މަތީ މިންވަރަކަށް އެކުލެވޭ ކަމަކަށްވާތީ، މިއީ ފުރިހަމަ ޖިނާއީ ތަހުގީގެއް ހިންގަންޖެހޭ ކަމެއްކަމަށް ޕީޖީ ދެކިވަޑައިގަންނަވާ ކަމަށް އެ އޮފީހުން ބުންޏެވެ.

އެ އަމުރު ކޮށްފައި ވަނީ ގާނޫނުއަސާސީގެ 223 ވަނަ މާއްދާގެ (ޅ) ގެ ދަށުން ޕްރޮސިކިއުޓާ ޖެނެރަލްއަށް ލިބޭ ބާރުގެ ދަށުންނެވެ. އެގޮތުން، "ބިންވެރިޔާ" އަދި "ގެދޮރުވެރިޔާ" ސްކީމްގެ މަސައްކަތް ފެށުނީއްސުރެ މިއަދާ ހަމައަށް ހިނގާފައިވާ އެންމެހައި ކަންކަންމުގެ ފުރިހަމަ ޖިނާއީ ތަހުގީގެއް ހިންގުމަށްފަހު، އެކަމުގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭނެމަ، އެކަން ތަހުގީގު ކުރުމަށްފަހު  ދައުވާކުރުމަށްޓަކައި އެ އޮފީހަށް ހުށަހެޅުމަށް، ފުލުހުންނަށާއި އެންޓި ކޮރަޕްޝަން ކޮމިޝަން (އޭސީސީ)ގެ މައްޗަށް ޕީޖީ އައްބާސް ވަނީ އަމުރުކުރައްވާފަ އެވެ.

"މި މައްސަލައިގެ ތަހުގީގު ހިނގަމުންދާ ގޮތް، ކޮންމެ ހަފްތާއަކު އެއް ފަހަރު ޕްރޮސިކިއުޓާ ޖެނެރަލްއާ ހިއްސާކުރަމުން ގެންދިއުމަށާއި، މި މައްސަލައިގެ އަވަސް ތަހުގީގެއް ހިންގުމަށް ޕްރޮސިކިއުޓާ ޖެނެރަލް ވަނީ އަމުރުކުރައްވާފަ،" އެ އޮފީހުން ބުންޏެވެ.

ގޯއްޗާއި ފްލެޓްތަކުގެ މައްސަލަތައް ތަހުގީގު ކުރުމަށް ޕީޖީ އަމުރުކޮށްފައި މިވަނީ ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން އުސޫލާ ހިލާފަށް ލިޔެކިޔުން ފޯޖުކޮށްގެން ބަޔަކަށް ގޯތި ދިން ކަމުގެ ތުހުމަތުގައި ފުލުހުންނާއި އޭސީސީން ތަހުގީގު ފަށާފައި ވަނިކޮށެވެ. އެ މައްސަލައިގައި އެޗްޑީސީގެ ވެރިން ވަނީ ސަސްޕެންޑް ވެސް ކޮށްފަ އެވެ.