އެޗްޑީސީގެ މާލީ މުއާމަލާތްތަކާއި ބިންވެރިޔާއާ ގުޅުންހުރި މަސައްކަތްތައް ހުއްޓައިލަން އަންގައިފި

އެޗްޑީސީއަށް ކުރެވިފައިވާ ކޮރަޕްޝަނުގެ ތުހުމަތުތަކާ ގުޅިގެން އެ ކުންފުނިން ކުރަމުން އައި ބައެއް މަސައްކަތްތަކާއި މާލީ މުއާމަލާތްތައް ވަގުތީ ގޮތުން ހުއްޓައިލުމަށް ކުންފުނީގެ އިންޓާނަލް އޮޑިޓަރު އަންގަވައިފި އެވެ. 

ކުންފުނީގެ އިންޓާނަލް އޮޑިތަރު އަހްމަދު އަސްބާހު ސޮއިކުރައްވަައި ނެރުއްވި އިންޓާނަލް މެމޯއެއްގަައި ބުނެފައިވަނީ އެ މުއާމަލާތްތަކާއި މަސައްކަތްތައް ވަގުތީ ގޮތުން ހުއްޓައިލަން ނިންމީ ކުންފުނީގެ ޑިރެކްޓަރުންގެ ބޯޑުގެ އޮޑިޓު ކޮމިޓީގެ އެންގުމުގެ މަތިން ކަމަށެވެ. 

ހުއްޓައިލަން ނިންމި މަސައްކަތްތަކުގެ ތެރޭގައި ބިންވެރިޔާ ސްކީމާ ގުޅޭ ހުރިހާ މަސައްކަތްތަކާއި، ބިންތަކާއި ފުލެޓުތަކުގެ ކޮމާޝަލް ޔުނިޓުތަކާއި ދިރިއުޅެން ދޫކުރާ ހައުސިން ޔުނިޓުތައް ދޫކުރުންވެސް ހިމެނެ އެވެ. 

އަދި ޕްރޮކިއުމެންޓު މުއާމަލާތްތަކުގެ ތެރެއިން ކުއްލި ހާލަތުގައި ކުރަންޖެހޭ މުއާމަލާތްތަކާއި ކޮންމެހެން ވަގުތުން ވަގުތަށް ކުރަންޖެހޭ މުއާމަލާތްތައް ފިޔަވައި އެހެން މުއާމަލާތްތައް އަދި ކުންފުނިން އެކި ފަރާތްތަކަށް ދައްކަންޖެހޭ ފައިސާގެ ތެރެއިން އެމެޖެންސީކޮށް ނުވަތަ ވަގުތުން ވަގުތަށް ދައްކަންޖެހޭ ފައިސާއާއި މުވައްޒަފުންނާ ގުޅުންހުރި ފައިސާ ނޫނީ ނުދައްކަންވަނީ އަންގަވާފަ އެވެ. 

މުވައްޒަފުން ވަޒީފާއަށް ނެގުމާއި ވަޒީފާއިން ވަކިކުރުން ހުއްޓައިލުމާއެކު، ވަގުތީ ގޮތުން ހުއްޓައިލަން އެންގެވި މުއާމަލާތްތަކާއި ގުޅޭ ގޮތުން އައިޓީން ކުރަންޖެހޭ އެއްވެސް މަސައްކަތެއް ކުރުންވެސް އިންޓާނަލް އޮޑިޓަރުގެ މެމޯގައި މަނާކުރައްވާފައިވެ އެވެ. 

އިއްޔެ މީސްމީޑިޔާއަށް ލީކުވި ލިޔެކިޔުންތަކަށް ބަލާއިރު ބިންވެރިޔާ ސްކީމުގެ ދަށުން ބިން ނުލިބޭ ބައެއް ފަރާތްތަކަށް ބިން ދޫކޮށް، އެ ބިންތަކުގައި އިންފާރު ރޭނުމުގެ ހުއްދަ އެޗްޑީސީން ދީފައިވެ އެވެ. އެ ހުއްދަ ލިބުނު ފަރާތްތަކުގެ ތެރޭގައި ކުންފުނީގެ އެމްޑީ ފަޒުލްގެ ބޭބެއެއްވެސް ހިމެނެ އެވެ.

އެ ފަރާތްތަކަށް ހުއްދަ ދިނުމަށްފަހު، އެއީ ބިންވެރިޔާ ސްކީމުގެ ދަށުން ގޯތި ލިބުނު ބައެއްކަން ކަށަވަރުކުރުމަށް އެޗްޑީސީންވަނީ ހައުސިން މިނިސްޓްރީއަށް ސިޓީ ފޮނުވާފަ އެވެ. ނަމަވެސް އެ މިނިސްޓްރީން އެ ފަރާތްތަކަށް އެ ސްކީމުގެ ދަށުން އެއްވެސް ގޯއްޗެއް ނުލިބޭކަން އަންގާފައިވެ އެވެ. 

މި މައްސަލާގައި ފަޒުލް ހިމެނިވަޑައިގަންނަވާހެން އެޗްޑީސީ ބޯޑުގެ ހުރިހާ މެންބަރުން ސަސްޕެންޑުކޮށްފައިވެ އެވެ. ސަސްޕެންޑުނުކުރަނީ ކުންފުނީގެ ޗެއާމަންކަމާ މި މަހުގެ ހަވަނަ ދުވަހު ހަވާލުވެވަޑައިގެންނެވި އަހްމަދު ނާސިފު ދީދީ އެކަންޏެވެ.