ވައްކަން ހުއްޓުވޭނީ އަތްކަނޑަން ކެރޭވަރުގެ މީހަކު އައިސްގެން: އުމަރު
ވިދާޅުވީ އެ ވައްކަންތައް ހުއްޓުވޭނީ ތިންވަނަ ފަރާތަކަށް ފުރުސަތު ދީގެން ކަމަށެވެ. އަދި އެ ބޭފުޅަކީ އަތްކަނޑަން ކެރޭވަރުގެ ވެރިއަކަށް ވާން ޖެހޭ ކަމަށް ވިދާޅުވި އެވެ.
ވައްކަން ހުއްޓުވޭނީ އަތްކަނޑަން ޖެހޭވަރުގެ ބޭފުޅަކު ގައުމުގެ ވެރިކަމާއި ހަވާލުވެވަޑައިގެންނެވުމުން ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
އުމަރު މިހެން ވިދާޅުވީ ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ހުޅުމާލެއިން ގޯތިތަކެއް ދިންކަމަށް ތުހުމަތުވާ މައްސަލައެއް ފެންމަތިވެފައި ވަނިކޮށެވެ. އެ މައްސަލާ ގައި ވަރަށް ގިނަ ބައެއްގެ ކަންބޮޑުވުން އެބަ އޮތެވެ. އާންމުންގެ ބަޔަކު ދަނީ އެކަމާ ގުޅިގެން އިހުތިޖާޖު ވެސް ކުރަމުންނެވެ.
މުޅި ސޯޝަލް މީޑިއާ ގައި ވެސް އޮތީ އެ ވާހަކަ އެވެ. އާންމުންގެ ކަންބޮޑުވުމާއި ފާޑުކިޔުމެވެ. ފުލުހުން މިހާރު ވަނީ މައްސަލަގައި ޖިނާއީ ތަހުގީގެއް ފަށާފަ އެވެ. އަދި ފުލުހުންގެ ޓީމެއް ވަނީ އެޗްޑީސީއަށް ވެސް ވަދެފަ އެވެ.
އެ މައްސަލައަށް އިޝާރާތް ކުރައްވާ އުމަރު ވިދާޅުވީ ރާއްޖޭގެ ސިޔާސީ މައިދާނުގައި އިސްކޮށް އޮތް ދެ ޕާޓީ އަކީ ވެސް ވައްކަމާއި ކޮރަޕްޝަން ގައި އެއްބަޔަކު އަނެއް ބަޔަކަށް ދޫނުކުރާ ވަރުގެ ވާދަވެރި ދެ ޕާޓީ ކަމަށެވެ. ވައްކަމާއި ކޮރަޕްޝަނަކީ އެ ޕާޓީތަކުގެ ވެރީން ހިންގާ ކަންކަން ކަމަށް ވެސް ތުހުމަތު ކުރެއްވި އެވެ.
އަދި ވިދާޅުވީ އެ ވައްކަންތައް ހުއްޓުވޭނީ ތިންވަނަ ފަރާތަކަށް ފުރުސަތު ދީގެން ކަމަށެވެ. އަދި އެ ބޭފުޅަކީ އަތްކަނޑަން ކެރޭވަރުގެ ވެރިއަކަށް ވާން ޖެހޭ ކަމަށް ވިދާޅުވި އެވެ.
އުމަރު ވަނީ ދެ ފަހަރަކު ރިޔާސީ އިންތިހާބު ގައި ވާދަ ކުރައްވާފަ އެވެ. އުމަރު ގެންދަވަނީ ރާއްޖޭގައި އިސްލާމީ ޝަރިއަތް ފުރިހަމައަށް ތަންފީޒު ކުރައްވާނެ ކަމަށް ވައުދުވެވަޑައިގަންނަވަމުންނެވެ. ވައްކަން ކުރާ މީހުންނަށް އަތް ކެނޑުމުގެ އަދަބު ދިނުމާއި މަރުގެ ހުކުމް އޮތް މައްސަލަތަކުގައި އެ ހުކުމް ތަންފީޒު ކުރައްވާނެ ކަމަށް ވެސް އުމަރު ވިދާޅުވެ އެވެ.
ކޮމެންޓް
Republic of Maldives