އައްމަޓީގެ ޕާސްޕޯޓު ވަގުތީގޮތުން ދޫކޮށްލައި، ރާއްޖޭން ބޭރަށްދާން ހުއްދަ ދީފި

މަކަރާއި ހީލަތުން އެތައް ބައެއްގެ އަތުން ފައިސާ ހޯދާފައިވާ ކަމަށް ތުހުމަތުކޮށް ދައުވާކޮށްފައިވާ ސީލައިފް ކުންފުނީގެ މެނޭޖިން ޑިރެކްޓަރު އަހްމަދު މޫސާ (އައްމަޓީ) ގެ ޕާސްޕޯޓް ވަގުތީ ގޮތުން ދޫކޮށްލައިފި އެވެ.

އަންމަޓީގެ މައްޗަށް ކްރިމިނަލް ކޯޓަށް ހުށަހަޅަފައިވާ ހިޔާނާތްތެރި ވުމުގެ ކުށުގެ 42 ދައުވާއާ ގުޅިގެން އެ ކޯޓުން ޖޫން، 16 2021 ގައި ވަނީ ޝަރީއަތް ނިމެންދެން ފުރުން މަނާކޮށް އޭނާގެ ޕާސްޕޯޓު ނުވަތަ ޓްރެވަލް ޑޮކިއުމަންޓް ހިފެހެއްޓުމަށް މޯލްޑިވްސް އިމިގްރޭޝަންގެ މައްޗަށް އަމުރުކޮށްފަ އެވެ. 

ކްރިމިނަލް ކޯޓުން މިއަދު ބުނީ އެ އަމުރު ރިވިއުކޮށްދިނުމަށް އަންނަޓީގެ ފަރާތުން މިމަހުގެ ފަސްވަނަ ދުވަހު އެދިފައިވާ ކަމަށެވެ. އެދުވަހު ބޭއްވި ޝަރީއަތުގެ އަޑުއެހުމުގައި އަންމަޓީގެ ފަރާތުން އެދިފައި ވަނީ ކަފާލާތުގެ ދަށުން މީހަކު ޖާމިނުކުރުމަށްފަހު އަދި ކޯޓުން ކަނޑައަޅާ ޝަރުތުތަކަކާއެކު 14 ދުވަހަށް އޭނާގެ ޕާސްޕޯޓް ދޫކޮށްދިނުމަށެވެ.

ކޯޓުން ބުނީ އަންމަޓީގެ ހުށަހެޅުމަށް ދައުލަތުން އިއުތިރާޒުކޮށްފައި ނުވާ ކަމަށެވެ. އެހެންކަމުން އޭނާގެ ޕާސްޕޯޓު ހިފަހައްޓާފައިވާ ހާލަތު ވަގުތީ ގޮތުން ނިމުމަކަށް ގެނެސް، ރާއްޖޭން ބޭރަށް ފުރުމަށް ހަމަޖެހޭ ދުވަހުން ފެށިގެން 14 ދުވަހަށް އަންމަޓީގެ ޕާސްޕޯޓް ދޫކޮށްލައި، މުއްދަތު ހަމަވުމުގެ ކުރިން އެނބުރި ރާއްޖެއަށް އައުމަށް ކޯޓުން ވަނީ އަމުރުކޮށްފަ އެވެ.

އަންމަޓީގެ ފަރާތުން މީގެ ކުރިން ވެސް ވަނީ ޕާސްޕޯޓު ދޫކޮށްދިނުމަށް އެދިފަ އެވެ. އެގޮތަށް އަމުރުނެރުމުން ދައުލަތުން ސުޕްރީމް ކޯޓުގައި އިސްތިއުނާފުކޮށް، އަލުން ޕާސްޕޯޓް ހިފެހެއްޓުމުގެ އަމުރު ވަނީ ހޯދާފަ އެވެ.

އޭނާގެ ޕާސްޕޯޓު ހިފަހައްޓާފައި ވަނީ މި މައްސަލައިގެ ތަހުގީގު ތެރޭގައި އޭނާ ފިލައިގެން އުޅުމުންނެވެ. އޭނާ ރާއްޖެއައުމާއެކު ހައްޔަރުކޮށް، ގިނަ ދުވަސްތަކެއް ވަންދެން ބަންދުގައި ވެސް ބެހެއްޓި އެވެ.