ކޮމިޝަނާ އޮފް ރިފޯމްގެ މަގާމަށް އަސްމާ
ކޮމިޝަނާ އޮފް ރިފޯމް ޖަވާބުދާރީވާން ޖެހޭނީ ފިނޭންސް މިނިސްޓަރަށާއި މިނިސްޓަރުގެ އެޑްވައިޒަރަށަށެވެ.
ކޮމިޝަނާ އޮފް ރިފޯމްގެ މަގާމަށް ކުރީގެ ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަން، އަސްމާ ޝަފީއު އައްޔަނު ކޮށްފި އެވެ.
އިކޮނޮމިކް ރިފޯމް އޮފީހުގެ ކޮމިޝަނަރަކަށް އަސްމާ އައްޔަނު ކޮށްފައިވާކަން ރޭ އިއުލާނުކޮށްފައި ވަނީ ފިނޭންސް މިނިސްޓްރީންނެވެ. އެ އޮފީހަކީ ދައުލަތުގެ މާލީ ނިޒާމު ހަރުދަނާކުރުމުގެ މަސައްކަތްތަކުގެ ޒިންމާ ހަވާލުކޮށްފައިވާ އޮފީހެވެ.
އެގޮތުން ދައުލަތު މާލީ ކަންކަން ހަރުދަނާ ކުރުމާއި،ހަރަދު ކުޑަކުރުމާއި އަދި އާމްދަނީ އިތުރުކުރުމަށް ސަރުކާރުން ގެންނަން ނިންމާފައިވާ އިސްލާހީ ބަދަލުތައް ތަންފީޒު ކުރުމުގެ މަސައްކަތް ކުރާނީ އެ އޮފީހުންނެވެ.
އެ އޮފީހަށް ކޮމިޝަނަރަކު ހޯދަން އިއުލާނު ކޮށްފައި ވަނީ މި މަހުގެ ހަތަރު ވަނަ ދުވަހު އެވެ.
ކޮމިޝަނާ އޮފް ރިފޯމްގެ މަސްއޫލިއްޔަތުތަކުގެ ތެރޭގައި، އިސްލާހީ ބަދަލުތަކުގެ އިސްތިރާޖުތައް އެކުލަވާލުމާއި، ސަރުކާރު ހިއްސާވާ ކުންފުނިތަކާއި އަދި ފިސްކަލް ރިފޯމުތައް ކުރިއަށްދާ ގޮތުގެ ރިޕޯޓުތައް އެކުލަވާލުން ހިމެނެ އެވެ. އަދި އެކަމާ ގުޅޭ ފްރޭމްވޯކްތައް އެކުލަވާ ރޭވުމުގެ މަސައްކަތް ވެސް ކުރާނީ ކޮމިޝަނަރުގެ ބެލުމުގެ ދަށުންނެވެ.
ކޮމިޝަނާ އޮފް ރިފޯމް ޖަވާބުދާރީވާން ޖެހޭނީ ފިނޭންސް މިނިސްޓަރަށާއި މިނިސްޓަރުގެ އެޑްވައިޒަރަށަށެވެ.
އެ މަގާމަށް އައްޔަނުކޮށްފައިވާ އަސްމާއަކީ ގިނަ ދުވަސްތަކެއް ވަންދެން މީރާގައި މަސައްކަތް ކުރައްވާފައިވާ ބޭފުޅެކެވެ. ޑެޕިއުޓީ ކޮމިޝަނާ އޮފް ޓެކްސޭޝަންގެ މަގާމަށް އޭނާ އައްޔަނު ކޮށްފައި ވަނީ 2019 ވަނަ އަހަރު އެވެ. ދައުރު ހަމަވެފައި ވަނީ މިދިޔަ އޮކްޓޯބަރު މަހު އެވެ.
ކޮމެންޓް
Republic of Maldives