މުދަލު ޒަކާތް؛ ޖުމްލަ %44 އިތުރުވުމެއް، ޑޮލަރުން ދެއްކި މިންވަރު %101 މަތިވެއްޖެ

ފާއިތުވި އަހަރާ އަޅާބަލާއިރު މި އަހަރު މުދަލު ޒަކާތުގެ ގޮތުގައި ލިބުނު ޖުމްލަ ފައިސާގެ ނިސްބަތް %44 އިތުރުވިއިރު މުދަލު ޒަކާތުގެ ގޮތުގައި މީރާއަށް ލިބުނު ޑޮލަރުވަނީ 101 އިންސައްތަ އިތުރުވެފަ އެވެ. 

މަހަަކު އެއްފަހަރު މީރާއިން ހާމަކުރާ އާމްދަނީގެ ހިސާބުތަކަށް ބަލާއިރު ފާއިތުވި ނޮވެންބަރު މަހުގެ ނިޔަލަށް މުދަލު ޒަކާތުގެ ގޮތުގައި އެ އިދާރާއަށް ލިބުނީ 92.2 މިލިއަން ރުފިޔާ އެވެ. 2023 ވަނަ އަހަރުގެ އެ މުއްދަތުގައި މުދަލު ޒަކާތުގެ ގޮތުގައި ލިބުނީ 83.7 މިލިއަން ރުފިޔާ އެވެ. 

އެހެންކަމުން ފާއިތުވި އަހަރާ އަޅާބަލާއިރު މި އަހަރު މުދަލު ޒަަކާތުގެ ގޮތުގައި ލިބުނު ފައިސާގެ އަދަދުވަނީ އަށް މިލިއަން ރުފިޔާއިން އިތުރުވެފަ އެވެ. އެއީ %10.1 ގެ އިތުރުވުމެކެވެ. 

ޖުމްލަކޮށް މުޅި އަހަރު މުދަލު ޒަކާތުގެ ގޮތުގައި ލިބުނު ފައިސާ އިތުރުވި ނަމަވެސް ފާއިތުވި ނޮވެންބަރު މަހުގައި މުދަލު ޒަކާތުގެ ގޮތުގައި ލިބުނު ފައިސާގެ އަދަދު 2023 ވަނަ އަހަރު ނޮވެންބަރާ އަޅާބަލާއިރުވަނީ ދަށްވެފަ އެވެ. 

މީރާގެ ހިސާބުތައް ދައްކާ ގޮތުން 2023 ވަނަ އަހަރުގެ ނޮވެންބަރު މަހު މުދަލު ޒަަކާތުގެ ގޮތުގައި 7.1 މިލިއަން ރުފިޔާ ލިބުނެވެ. މި އަހަރު ލިބިފައިވަނީ 3.9 މިލިއަން ރުފިޔާ އެވެ. އެއީ ގާތްގަނޑަކަށް 44 އިންސައްތައިގެ ދަށްވުމެކެވެ. 

މުދަަލު ޒަކާތުގެ ގޮތުގައި ލިބުނު ޖުމްލަ ފައިސާގެ އަދަދު އިތުރުވިއިރު ޑޮލަރުން މުދަލު ޒަކާތް ދެއްކި މިންވަރުވެސް އިތުރުވެފައިވެ އެވެ. ނިމުނު އަހަރުގެ ނޮވެންބަރުގެ ނިޔަލަށް ޑޮލަރުން މުދަލު ޒަކާތުގެ ގޮތުގައި މީރާއަށް ދައްކާފައިވަނީ 2،888 ޑޮލަރެވެ. މި އަހަރުގެ އެ މުއްދަތުގައި 6،082 ޑޮލަރު މުދަލު ޒަކާތުގެ ގޮތުގައި ދައްކާފައިވެ އެވެ. 

މި ހިސާބުތަކަށް ބަލާއިރު ޑޮލަރުން މުދަލު ޒަކާތް ދެއްކި ނިސްބަތް ފާއިތުވި އަހަރާ އަޅާބަލާއިރު މި އަހަރު %101 ވަނީ އިތުރުވެފަ އެވެ.