ނަންބަރުން ޝާހިދު ވިދާޅުވެ ދެއްވީ ރައްޔިތުންނާ ގުޅުންހުރި ހަރަދުތައް ކުޑަކޮށް ސިޔާސީ ކަންކަމަށް ސަރުކާރުން ކުރި ބޮޑު ހޭދަ

އަހަރު ނިމިގެން ދާއިރު މި ސަރުކާރުގެ މާލީ ހިސާބުތަކުން ދިވެހިންގެ ހިތްތަކަށް ލިބޭ ފިނިކަމެއް / ލިބުނު ހިތްހަމަޖެހުމެއް ނުފެނުނު ކަމަށް ކުރީގެ ފޮރިން މިނިސްޓަރު / އިދިކޮޅު މައި ޕާޓީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

އެކްސްގައި މިއަދު ކުރެއްވި ޕޯސްޓެއް ގައި އެމަނިކުފާނު ވަނީ ސަރުކާރުން، ހަރަދު ކުރުމުގައި ގެންގުޅެފައިވާ ދެކޮޅު ނުޖެހޭ ސިޔާސަތުތައް ފާހަގަ ކުރައްވާ އެކަމަށް ފާޑުވިދާޅުވެފަ އެވެ.

އދގެ އާންމު މަޖިލީހުގެ ރައީސްކަން ވެސް ކުރެއްވި ކުރީގެ މިނިސްޓަރު ޝާހިދު ވިދާޅުވި ގޮތުގައި އެންމެހާ ދިވެހިން، ކޮއްޕަމުން، ލަވަމުން، ވައްދަމުން މި ސަރުކާރުން ގެންދަނީ ނުތަނަވަސްކަމާއި ކަންބޮޑުވުމެއްގެ ތެރެއަށެވެ.

"އަޅުވެތި ކަމުގެ ބަ ނދެލުމަކުން ދިވެހިން ބަނދެލުމަށް މި ސަރުކާރުން އެ ވަނީ މިސްރާބު ހިފާފައި،"

ޝާހިދު ވިދާޅުވީ މިދިޔަ އަހަރާ ބަލާއިރު ދައުލަތަށް ލިބުނު އާމްދަނީ 78 މިލިޔަން އިތުރުވެފައި ވީނަމަވެސް ރައްޔިތުން ބިކަވެ, ވީ ނިކަމެއްޗެވެ. އޭގެ އެއް މިސާލަކަށް ފާހަގަ ކުރެއްވީ ރައްޔިތުންނާއި ގުޅުން ހުރި ކަންކަމަށް ކުރާ ހަރަދު ކުޑަ ކުރުމެވެ. އަދި ސިޔާސީ މަންފާއަށްޓަކާ ކުރާ ހޭދަ އިތުރު ކުރުމެވެ.

ވިދާޅުވީ ސަރުކާރުން އާސަންދައަށް ކުރި ހަރަދު މި އަހަރު ވަނީ 101 މިލިއަން ރުފިޔާ މަދުކޮށްފައި ކަމަށެވެ.

"އިވެމުން ދަނީ ނިކަމެތި ރައްޔިތު މީހާ، އާސަންދައަށް އެދި ރޮއެ ކުރާ އާދޭހުގެ ހިތްދަތި އަޑު،"

ނަމަވެސް ސިޔާސީ މުސާރަ އާއި ގުޅުން ހުރި ހަރަދުތަކަށް 1.4 ބިލިއަން ރުފިޔާ އިތުރަށް ހަރަދުކޮށްފައިވާ ކަމަށް ވިދާޅުވި އެވެ.
އެމަނިކުފާނު ވިދާޅުވީ އާންމު ރައްޔިތުންގެ ވޭނުގެ އަޑު އެހުމާއި ނުލައި ކުރިއަށްދަ ނީ ސަރުކާރުގެ އިސްވެރިންގެ ޒާތީ މަންފާއަށް ކުރާ ބޭކާރު ހޭދަތަކާއި އެމަގަށް ކުރާ މަސައްކަތްތައް ކަމަށެވެ.