އަލިފާނުގެ ހާދިސާއާ ގުޅިގެން ދައުރުން ބޭރު ޖަލްސާއެއް ބާއްވަން އެމްޑީޕީން އެދެނީ

ބުރާސްފަތި ދުވަހު ހައުސިން މިނިސްޓްރީ ހިންގި އިމާރާތުގައި ރޯވެ ކައިރީ ހުރި އެންވަޔަރަމެންޓު މިނިސްޓްރީގެ އިމާރާތަށް އަލިފާންގަނޑު ފެތުރުނު މައްސަލައާ ގުޅިގެން ރައްޔިތުންގެ މަޖިލީހުގެ ދައުރުން ބޭރުގައި ޖަލްސާއެއް ބާއްވައިދިނުމަށް ހުށަހަޅަން އިދިކޮޅު އެމްޑީޕީން ނިންމައިފި އެވެ. 

ބުރާސްފަތިހު ފަތިހު 6:00 ހާއިރު ރޯވި އަލިފާންގަނޑު ކޮންޓުރޯލުކުރެވުނީ އަލިފާން ރޯވިތާ ގާތްގަނޑަކަށް ހަ ގަޑިއިރުފަހުން އެ ދުވަހު މެންދުރުފަހު ވަަގުތެއްގަ އެވެ. އެ އަލިފާންގަނޑު ހަންމަތަކުރެވުނުއިރު ހައުސިން މިނިސްޓްރީ ހިންގަމުން އައި އިމާރާތާއި އެ އިމާރާތާ އިންވެގެން ވަކިން ހުން އެންވަޔަރަމެންޓު މިނިސްޓްރީ ހިންގަމުން އައި އިމާރާތްވެސް ހުރީ އަނދައި ހުލިވެފަ އެވެ.

އެ ހާދިސާއާ ގުޅިގެން މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެ ޕާޓީންވަނީ ސަރުކާރަށް އިހުމާލުގެ ބޮޑެތި ތުހުމަތުތަކެއް ކޮށްފަ އެވެ. ހައުސިން މިނިސްޓްރީ ހިންގަމުން އަައި އިމާރާތަކީ އިމާރާތްކުރުމުގެ މިންގަނޑުތަކާ އެއްގޮތަށް ހުރި އިމާރާތެއް ނޫން ނަމަވެސް އެ އިމާރާތާ ވަކިން ހުރި އެންވަޔަރަަމެންޓު މިނިސްޓްރީއާއި އީޕީއޭ ހިންގަމުންދިޔަ ގްރީން ބިލްޑިންއަކީ ޒަމާނީ ފެންވަރަށް ހަދާފައިވާ އިމާރާތެއްކަން ފާހަގަކޮށް އެ އިމާރާތުގައި އަލިފާން ރޯވާން މެދުވެރިވި ގޮތާމެދު އެމްޑީޕީން ސުވާލު އުފެއްދި އެވެ. 

އޭގެ އިތުރަށް އަލިފާން ރޯވިތާ ވަރަށް ކުޑަ ވަގުތުކޮޅެއްގެ ތެރޭގައި ސިފައިންނަށް އެ މައުލޫމާތު ލިބި ފަޔާ އެންޑް ރެސްކިއުއިން އެތަނަށް އެޓެންޑުވި ނަމަވެސް އަލިފާންގަނޑު ނިއްވައިލުމަށް ހަ ގަޑިއިރެއްހައިއިރު ހޭދަވި ސަބަބާމެދު އެމްޑީޕީންވަނީ ސުވާލުތަކެއް އުފައްދާފަ އެވެ. އަދި އެފަދައިން މެދުވެރިވީ އެމްއެންޑީއެފްއިން އިހުމާލުވުމުންކަމަށް އެ ޕާޓީން ތުހުމަތުކުރި އެވެ. 

ރައްޔިތުންގެ މަޖިލީހުގެ ގަވާއިދުގައި އޮންނަ ގޮތުން ދައުރުން ބޭރު ޖަލްސާއެއް ބޭއްވެނީ މަޖިލީހުގެ 31 މެންބަރަކު ސޮއިކުރައްވައިގެން މަޖިލީހަށް ހުށަހަޅުއްވައިގެންނެވެ. އެމްޑީޕީއަށް ނިސްބަތްވެވަޑައިގަންނަވާ މަޖިލީހުގެ މެންބަރުންގެ އަދަދަކީ 12 އެވެ. އެހެންކަމުން އެ ޕާޓީއަށް އެކަނި މަޖިލީހުގެ ދައުރުން ބޭރު ޖަލްސާއެއް ބާއްވަން ހުށަނޭޅޭނެ އެވެ. 

އެމްޑީޕީގެ ނޫސްވެރިންގެ ބައްދަލުވުމުގައި އެޕާޓީގެ ޕާލިމަންޓަރީ ގުރޫޕުގެ ލީޑަރު އިބްރާހީމް ނާޒިލު ވިދާޅުވީ އެ މައްސަލާގައި ރައްޔިތުންގެ ގިނަ ކަންބޮޑުވުންތަކެއް ހުރުމާއެކު، އެ މައްސަލައާ ގުޅިގެން މަޖިލީހުގެ ދައުރުން ބޭރު ޖަލްސާއެއް ބޭއްވުމަށް ހުށަހަޅަން ޕީއެންސީގެ އެހީތެރިކަމަށް އެދި އެ ޕާާޓީގެ ޗެއާޕާސަން އަދި މަޖިލީހުގެ ރައީސް އަބްދުއްރަހީމް އަބްދުﷲއަށް ސިޓީއެއް ފޮނުއްވާނެ ކަމަށެވެ. 

"މަޖިލީހުގެ ގަވާއިދު ބަދަލުކޮށްފައި އޮތުމުން 31 މެންބަރުންގެ ސޮއި އެބަ ބޭނުންވޭ ހާއްސަ ޖަލްސާއެއް ބާއްވަން. އަޅުގަނޑުމެން އެމްޑީޕީއަށް އެކަނި އެ އަދަދު ހަމައެއް ނުކުރެވޭނެ. އެހެންވެ، ޕީއެންސީގެ ވެސް އެހީތެރިކަމަށް މި އެދެނީ. އެ ކަމަށް އެދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއަށް އަޅުގަނޑުމެންގެ ޕާލިމެންޓްރީ ގްރޫޕުން ސިޓީއެއް ފޮނުވާނަން،" ނާޒިލު ވިދާޅުވި އެވެ. 

އެ މައްސަލާގައި ގިނަ އިހުމާލުތަކެއް ހުރިކަމަށް ތުހުމަތުކޮށް އެމްޑީޕީން ބުނެފައިވަނީ އެ މައްސަލައާ ގުޅޭ ޖިނާއީ ތަހުގީގެއް ހިންގަން ފުލުހަށް ހުށަހަޅާފައިވާނެ ކަމަށެވެ. އަދި އިހުމާލުގެ ގިނަ ތުހުމަތުތަކެއް ކުރެވޭތީ އެ މައްސަލަތައް ތަހުގީގުކުރަން ނޭޝަނަލް އިންޓަގްރިޓީ ކޮމިޝަނަށްވެސް ހުށަހަޅާނެ ކަމަށް އެ ޕާޓީން ބުންޏެވެ. 

ކޮމިޝަނާ އޮފް ޕޮލިސް އަލީ ޝުޖާއުވަނީ އިއްޔެ ބޭއްވި ނޫސްވެރިންގެ ބައްދަލުވުމެއްގައި އެ މައްސަލައިގެ ތަހުގީގު ފަށާފައިވާކަން ހާމަކުރައްވައި، އެ ތަހުގީގައި ބޭރުގެ ޓީމެއްގެ އެހީތެރިކަން ހޯދުމަށް ނިންމަވާފައިވާކަން އިއުލާނު ކުރައްވާފަ އެވެ.