އުފަންވި ކުދިންގެ އަދަދު ދަށަށް | އެންމެ ގިނަ މީހުން މަރުވަނީ ހިތުގެ ބަލިތަކުގަ

ފާއިތުވި އަހަރުތަކުގައި ރާއްޖޭގައި އަލަށް ކުދިން އުފަންވި ނިސްބަތް ދަށަށް ގޮސްފައިވާކަމާއި އެންމެ ގިނަ ބަޔަކު ރާއްޖެއިން މަރުވީ ހިތުގެ ބަލިތަކުގައިކަން ތަފާސްހިސާބުތަކުން ދައްކައިފި އެވެ. 

ތަފާސްހިސާބާ ބެހޭ ގައުމީ އިދާރާއިން އާންމުކޮށްފައިވާ ވައިޓަލް ސްޓެޓިސްޓިކްސް ރިޕޯޓް އޮފް 2024 ގައި ބަޔާންކޮށްފައިވާ ގޮތުން 2019 ވަނަ އަހަރާ އަޅާބަލާއިރު 2021 ވަނަ އަހަރު ކުދިން އުފަންވި މިންވަރުވަނީ 3.3 އިންސައްތަ ދަށްވެފަ އެވެ. 

އެގޮތުން 2019 ވަނަ އަހަރާ އަޅާބަލާއިރު 2020 ވަނަ އަހަރު އުފަންވި ކުދިންގެ އަދަދު އިތުރުވިއިރު 2021 ވަނަ އަހަރު އެ އަދަދުވަނީ ވަރަށް ބޮޑަށް ދަށްވެފަ އެވެ. އެ ތިން އަހަރު ކުދިން އުފަންވި އަދަދުތަކަކީ: 

ތަފާސްހިސާބާ ބެހޭ ގައުމީ އިދާރާއިން ފާހަގަކުރި ގޮތުގައި 2020 ގައި ކޮންމެ އެއްހާސް މީހަކަށް 13 ކުދިން އަލަށް އުފަންވިއިރު 2021 ގައި އެ ނިސްބަތްވަނީ ކޮންމެ ހާހަކަށް 10 ކުދިންނަށް ދަށްވެފަ އެވެ. 

ޖުމްލަކޮށް ކުދިން އުފަންވާ ނިސްބަތް އެ ތިން އަހަރުވެސް އެއް މިންވަރެއްގައި ހުރި ނަމަވެސް އެއީ ރިޕްލޭސްމެންޓު ލެވެލް ނުވަތަ އެވެރެޖުކޮށް އަންހެނަކު އޭނާއާއި އޭނާގެ ޖީލުގެ ބަދަލުގައި އަައު ޖީލެއް އުފެއްދުމަށް ދަރިން ވިހަންޖެހޭ މިންވަރަށްވުރެ ދަށް އަދަދެއް ކަމުގައި އެ ބިއުރޯއިން ފާހަގަކުރި އެވެ. 

މަރުތަކަށް ބަލާއިރު 2019 ވަނަ އަހަރު 1،132 މަރު ރެކޯޑުކުރެވުނުއިރު ކޮވިޑުގެ އާލަމީ ވަބާގެ ތެރޭގައި އެ އަދަދު 2020 ގައި 1،280 އަށް އަދި 2021 ގައި 1،448 އަށް އިތުރުވި އެވެ. 

ރާއްޖޭގައި ގިނަ މަރުތަކުގެ ސަބަބެއްކަމަށް ރެކޯޑުކުރެވިފައިވަނީ ގައިންގައަށް ނާރާ ބަލިތަކެވެ. ރާއްޖޭގައި މަރުވާ ކޮންމެ ތިން މީހަކުން އެކެއް މަރުވަނީ ގައިންގައަށް ނާރާ ބައްޔެއްގެ ސަބަބުން ކަމަށް ތަފާސްހިސާބުތަކުން ދައްކަ އެވެ. 

އަދި ތަފާސްހިސާބުތައް ދައްކާ ގޮތުން 2019 ވަނަ އަހަަރު މަރުވި މީހުންގެ 33.7 އިންސައްތަ އަދި 2020 ވަނަ އަހަރު މަރުވި މީހުންގެ 38.1 އިންސައްތަ އަދި 2021 ގައި މަުރވި މީހުންގެ 30.1 އިންސައްތަ މީހުން މަރުވީ ލޭ ދައުރުކުރުމުގެ ނިޒާމުގެ އެކި ބަލިތަކުގެ ސަބަބުންނެވެ. 

ނަމަވެސް 2021 ވަނަ އަހަރު އެންމެ ގިނަ މީހުން މަރުވީ ކޮވިޑް-19އާ ގުޅުންހުރި އެކި ސަބަބުތައް މެދުވެރިގެންނެވެ. އެއީ އެ އަހަރު މަރުވި މީހުންގެ 18 އިންސައްތަކަމަށް ތަފާސްހިސާބުތަކުން ދައްކަ އެވެ.