ހައުސިން މިނިސްޓްރީގެ ދަށުން ކުރިއަށްގެންދާ މި މަސައްކަތުގެ މަގުސަދަކީ ކުރިއަށް އޮތް 20 އަހަރު ދުވަހުގެ ތެރޭގައި ރާއްޖޭގެ ދެމެހެއްޓެނިވި އިގްތިސޯދާއި، އިޖްތިމާއީ، ތިމާވެށި، އަދި އާބަން ޑިވެލޮޕްމަންޓު ގައުމީ ތަރައްގީގެ ޕްލޭނެއް އެކުލަވާލުމެވ
ކުރިއަށް އޮތް 20 އަހަރުގެ ގައުމީ ތަރައްގީގެ މާސްޓާ ޕްލޭން އެކުލަަވައިލުމުގެ މަސައްކަތްކޮށްދޭނެ ލޯކަލް ކޮންސަލްޓެންސީ ފާމެއް ހޯދުމަށް ފިނޭންސް މިނިސްޓްރީން އިއުލާނުކޮށްފި އެވެ.
މިމަހުގެ ފުރަތަމަ ދުވަހު ކުރި އެ އިއުލާނު އިސްލާހުކޮށް މިއަދު އަލުން ވަނީ ގެޒެޓްކޮށްފަ އެވެ. އެ އިއުލާނުގައި ބުނެފައި ވަނީ މި ޕްލޭން އެކުލަވާލުމުގެ މަސައްކަތް ކޮށްދިނުމަށް ޝައުގުވެރިވާ ފަރާތްތަކުގެ ތެރެއިން ޝަރުތު ހަމަވާ ފަރާތްތަކުން އެކްސްޕްރެޝަން އޮފް އިންޓްރެސްޓް (އީއައިއޯ) ހުށަހެޅުމަށް ހުޅުވާލާފައިވާ ކަމަށެވެ.
ހައުސިން މިނިސްޓްރީގެ ދަށުން ކުރިއަށްގެންދާ މި މަސައްކަތުގެ މަގުސަދަކީ ކުރިއަށް އޮތް 20 އަހަރު ދުވަހުގެ ތެރޭގައި ރާއްޖޭގެ ދެމެހެއްޓެނިވި އިގްތިސޯދާއި، އިޖްތިމާއީ، ތިމާވެށި، އަދި އާބަން ޑިވެލޮޕްމަންޓު ގައުމީ ތަރައްގީގެ ޕްލޭނެއް އެކުލަވާލުމެވެ.
މި ޕްލޭންގައި، ނެޝަނަލް ޑިވެލޮޕްމަންޓް ޕްލޭން ފައިދާހުރި ގޮތެއްގައި ތަންފީޒުކުރުމާއި، މޮނިޓާކުރުމާއި، އިވެލުއޭޓްކުރެވޭނެ މެކޭނިޒަމްތައް ހިމަނަންވާނެ ކަމަށް އިއުލާނުގައިވެ އެވެ.
އިއުލާނުގައި ބުނެފައި ވަނީ ޝައުގުވެރިވާ ފަރާތްތަކުން މަސައްކަތް ކުރުމުގެ ގާބިލްކަން ސާބިތުކޮށްދޭ ލިޔެކިޔުން ހުށަހަޅަން ވާނެ ކަމަށެވެ. އޭގެ ތެރޭގައި ކުންފުނީގެ ފަންނީ ގާބިލުކަމާއި، ދާއިރާއިން ކޮށްފައިވާ މަސައްކަތްތަކުގެ ތަފްސީލް މަސައްކަތްތަކުގެ އަގު އެނގޭނޭހެން ބަޔާންކޮށްފައި ހުންނަންވާނެ އެވެ. އަދި ކުންފުނީގެ މުވައްޒަފުންގެ އެފަދަ މަސައްކަތްތަކުގެ ހުނަރާއި ގާބިލުކަން އަދި ކުންފުނީގެ އެފަދަ މަސައްކަތުގެ މައުލޫމާތުވެސް ހުންނަން ވާނެ އެވެ.
މި މަސައްކަތްތަކަށް ޝައުގުވެރިކަން ފާޅުކުރާ ފަރާތްތަކުގެ ތެރެއިން ޝޯޓް ލިސްޓް ކުރެވޭ ފަރާތްތަކަށް ޕްރޮޕޯސަލް ހުށަހެޅުމުގެ ދައުވަތު ފިނޭންސް މިނިސްޓްރީން ދޭނެ އެވެ. ޝައުގުވެރިވާ ފަރާތްތަކުން އަންނަ މަހުގެ ހަތްވަނަ ދުވަހުގެ މެންދުރު 2:00 ގެ ކުރިން އީއައިއޯ ހުށަހެޅުމަށް އިއުލާނުގައިވެ އެވެ.
ކުރިއަށް އޮތް 20 އަހަރުގެ މާސްޓާ ޕްލޭން އެކުލަވައިލުމުގެ މަސައްކަތް ސަރުކާރުން ފަށާފައި ވަނީ މިދިޔަ މަހުގެ ހަވަނަ ދުވަހު އެވެ. މި ޕްލޭންވާނީ ދެމެހެއްޓެނެވި ގޮތެއްގައި ރާއްޖޭގެ ތަރައްގީ ބައްޓަންކޮށް، މުސްތަގުބަލުގައި ގައުމު ދަތުރުކުރާނެ ގޮތުގެ މިސްރާބު ކަނޑައެޅުމުގައި މުހިއްމު މަގުޗާޓަކަށް ކަމުގައި ސަރުކާރުން ކުރިން ބުނެފައިވެ އެވެ.