އިސްރާއީލަށް ހަތިޔާރު ވިއްކުން މަނާކުރަން ޑަޗް ކޯޓުން އަމުރުނުކުރި
ޖެނޮސައިޑް ކޮންވެންޝަނާ ހަވާލާދީ ހައްގުތަކަށް މަސައްކަތްކުރާ ޖަމިއްޔާއަކުން ހުށަހެޅި މައްސަލަ ކޯޓުން ވަނީ އެކީއެކައްޗަކަށް ބޭރުކޮށްލާފަ
ފަލަސްތީނުގެ ހައްގުގައި މަސައްކަތްކުރާ 10 އެންޖީއޯއަކުން، ނެދަލޭންޑްސްއިން އިޒްރޭލަށް ހަތިޔާރު ބޭރުކުރުމާއި ވިޔަފާރިކުރުން މަނާކޮށްދިނުމަށްއެދި ހުށަހެޅި މައްސަލަ އެގަައުމުގެ ކޯޓަކުން ބޭރުކޮށްލައިފިއެވެ.
ހުކުރުދުވަހު ހޭގް ޑިސްޓްރިކްޓް ކޯޓުން ބުނެފައިވަނީ ދައުލަތުން ކަނޑައަޅާފައިވާ އުސޫލުތަކާއެއްގޮތަށް އަމަލުކުރުމުގެ މިނިވަންކަން ދައުލަތަށް ލިބިދީފައިވާނެ ކަމަށާއި ކޯޓުތަކުން އެކަމަށް އަތްގަދަކުރަން އަވަސްވެގެން ނުވާނެކަމަށެވެ.
ކޯޓުން ބުނީ ހަތިޔާރާއި އަސްކަރީ އެހެނިހެން އާލާތްތައް ބޭރުކުރުން އެއްކޮށް މަނާކުރަންޖެހޭނެ އެއްވެސް ހާލަތެއް އޮތްކަމަށް ގަބޫލުނުކުރާ ކަމަށާއި ހުރިހާ ދައުވާއެއް ރައްދުކުރެވިފައިވާ ކަމަށެވެ.
އިޒްރޭލުން ފޭރިގަނެފައިވާ ގައްޒާގެ ބިމުގައި މިހާތަނަށް ގަތުލުވެފައިވާ އާންމުންގެ އަދަދު ފާހަގަކޮށް ދައުވާ ހުށަހެޅި ފަރާތުން ބުނެފައިވަނީ 1948 ގެ ޖެނޮސައިޑް ކޮންވެންޝަންގައި ސޮއިކޮށްފައިވާ ދައުލަތެއްގެ ހައިސިއްޔަތުން މި ގަތުލުއާންމު ހުއްޓުވަން ކުރެވެންހުރި ހުރިހާ ކަމެއް ކުރުން ޑަޗް ދައުލަތުގެ މައްޗަށް ލާޒިމުވާނެކަމަށެވެ.
އެންޖީއޯތަކުގެ ފަރާތުން ވާހަކަދައްކަވަމުން ވަކީލު ވޮއުޓް އެލްބަރޒް ވިދާޅުވީ އިޒްރޭލުންދަނީ ޑަޗް ހަތިޔާރު ބޭނުންކޮށްގެން ނަސްލު ނައްތާލުމުގެ ހަނގުރާމައަކާއި ގަތުލުއާންމެއް ހިންގަމުންކަމަށެވެ.
އެންޖީއޯއިން ވަނީ ޖަނަވަރީމަހު އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން އިޒްރޭލުގެ މައްޗަށް ނެރެފައިވާ ގައްޒާގައި ހިންގަމުންދާ ނަސްލު ނައްތާލުމުގެ ހަނގުރާމައަށް ވާގިދޭ އަމަލުތައް ހުއްޓާލުމުގެ އަމުރަށްވެސް ހަވާލާދީފައެވެ. އދގެ އިސް ކޯޓުން ބުނެފައިވަނީ ޖެނޮސައިޑް ކޮންވެންޝަންގެ ދަށުން ފަލަސްތީނުގެ ރައްޔިތުންނަށް ލިބެންޖެހޭ ބައެއް ހައްގުތައް ނުލިބޭކަމަށް ގަބޫލުކުރުމުގެ ފުރުސަތު އެބައޮތް ކަމަށެވެ.
ކޮމެންޓް
Republic of Maldives