މިއަދު ބޭއްވި ނޫސްވެރިންގެ ބައްދަލުވުމުގައި މުއްތަލިބު ވިދާޅުވީ ރައްޔިތުންގެ ބޯހިޔާވަހިކަމާ ބެހޭ މައުލޫމާތުތައް ސްޓޯކޮށްފައި ހުރީ ކްލައުޑުގައި ކަމުން އެއިން މައުލޫމާތެއް ނުގެއްލޭ ކަމަށެވެ.
ރައްޔިތުންގެ ގެދޮރުވެރިކަމާ ގުޅޭ އެއްވެސް މައުލޫމާތެއް އަލިފާނުގެ ހާދިސާގައި ނުގެއްލޭ ކަމުގެ ޔަގީންކަން ކޮންސްޓްރަކްޝަން މިނިސްޓަރު ޑރ.އަބްދުﷲ މުއްތަލިބު ދެއްވައިފި އެވެ.
ބުރާސްފަތި ދުވަހު ހިނގި އަލިފާނުގެ ހާދިސާއާ ގުޅޭ ގޮތުން މައުލޫމާތު ދިނުމަށް ސަރުކާރުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ.މުއްތަލިބު ވިދާޅުވީ ހައުސިން މަޝްރޫއުތަކުގެ މައުލޫމާތަށް ވެދާނެ ގޮތަކާމެދު ގިނަ ވާހަކަތަކެއް މީހުން ދައްކަމުން އަންނަ ކަމަށެވެ.
ރޭ ދައުލަތުގެ މީޑިޔާ ޕީއެސްއެމްއަށް ދެއްވި ބަސްދީގަތުމެއްގައި ހައުސިން މިނިސްޓަރު ޑރ.އަލީ ހައިދަރު ވިދާޅުވީ އެ އަލިފާނުގެ ހާދިސާގައި މިނިސްޓްރީގެ ހުރިހައި ލިޔެކިޔުމެއްހެން ގެއްލިފައިވާ ކަމަށެވެ. އަދި މިނިސްޓްރީގެ ސާވާވެސް ހަލާކުވެފައިވާތީ މުވައްޒަފުންނާއި މިނިސްޓްރީގެ މަޝްރޫއުތަކާ ގުޅޭ މައުލޫމާތުތައްވެސް ގެއްލިފައިވާކަމަށް މިނިސްޓަރު ވިދާޅުވި އެވެ.
"ވުޒާރާއަށް ބަލާއިރު ވުޒާރާގައި ހުރި ހުރިހާ ލިޔެކިޔުމަކާއި ޑޭޓާއެއް އެއްކޮށް [އަނދައިގެން] އެ ދިޔައީ. ހާއްސަކޮށް އަޅުގަނޑުމެންގެ ސާވާ ސަލާމަތްނުކުރެވޭނެ ކަމަށް މިހާރު އަންދާޒާކުރެވެނީ މިހާރު. އެހެންކަމަށްވެއްޖެއްޔާ އެއީ ވަރަށް ބޮޑު ގެއްލުމެއް. އަޅުގަނޑުމެންގެ އަތުގައި ހުރި ހުރިހާ މައުލޫމާތެއް ގެއްލިގެންދިޔައީ،" މިނިސްޓަރު ވިދާޅުވި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މުއްތަލިބު ވިދާޅުވީ ރައްޔިތުންގެ ބޯހިޔާވަހިކަމާ ބެހޭ މައުލޫމާތުތައް ސްޓޯކޮށްފައި ހުރީ ކްލައުޑުގައި ކަމުން އެއިން މައުލޫމާތެއް ނުގެއްލޭ ކަމަށެވެ. އަދި ގެއްލުނު މައުލޫމާތަކީ ކޮބައިކަން ބެލުމަށް މަސައްކަތްކުރަމުން އަންނަކަމަށްވެސް ވިދާޅުވި އެވެ.
"އަޅުގަނޑުމެން އެސެސް ކުރަމުން މި ގެންދަނީ އަޅުގަނޑުމެން އަތުން މަދުވެގެން ދާނީ ކޮން އެއްޗިއްސެއްތޯ. އޭގެ ތެރޭގައި ރައްޔިތުންނާ ގުޅުންހުރި، ސީދާ ރައްޔިތުންނާ ގުޅުންހުރި ހައުސިންއާ ގުޅުންހުރި އެއްވެސް މައުލޫމާތެއް ގެއްލިފައި ނުވާ ކަމަށް، މިހާރު ވެސް އެބަ ހުރިކަން އަޅުގަނޑުމެންނަށް ޔަގީން ކުރެވޭ،" މިނިސްޓަރު ވިދާޅުވި އެވެ.
ގެދޮރުވެރިކަމުގެ މައުލޫމާތުގެ އިތުރަށް ގެދޮރުވެރިކަމާ ގުޅޭ ލޯނުތަކުގެ މައުލޫމާތުވެސް ނުގެއްލޭ ކަމަށްވެސް މުއްތަލިބު ވިދާޅުވި އެވެ. މިނިސްޓަރު ވިދާޅުވި ގޮތުގައި ރައްޔިތުންނަށް ހިދުމަަތް ދިނުމަށް ދޭން ބޭނުންވާ އެއްވެސް މައުލޫމާތެއް ނުގެއްލެ އެވެ.
މުއްތަލިބު ވިދާޅުވެފައިވަނީ މިހާރު މިނިސްޓްރީތައް ދަރުބާރުގެއަށް ބަދަލުކުރުމުގެ މަސައްކަތް ކުރެވިފައިވާ ކަމަށެވެ. އަދި މާދަމައިން ފެށިގެން ތިން މިނިސްޓްރީގެ ހިދުމަތްތައް އަލުން ރައްޔިތުންނަށް ފޯރުކޮށްދޭނެ ފެށޭނެކަމުގެ ޔަގީންކަން މިނިސްޓަރު ދެއްވި އެވެ.