އަލިފާނުގެ ހާދިސާގައި ހައުސިން މިނިސްޓްރީގެ ސާވާ ސަލާމަތްނުވެ ގިނަ ޑާޓާތަކެއް ގެއްލިއްޖެ

ހައުސިން މިނިސްޓްރީގެ މުވައްޒަފުންގެ މައުލޫމާތުތަކާއި މިނިސްޓްރީގެ މަޝްރޫއުތަކުގެ މައުލޫމާތުތައް ރައްކާކޮށްފައި ހުރި ސާވާވެސް އަލިފާނުގެ ސަބަބުން ހަލާކުވެ، އެ ސާވާ ބޭނުންނުކުރެވޭނެ ކަމުގައި ބެލެވޭކަމަށް މިނިސްޓަރު ވިދާޅުވި އެވެ.

ހައުސިން މިނިސްޓަރު ޑރ.އަލީ ހައިދަރު، ފޮޓޯ: ރައީސް އޮފީސް

ބުރާސްފަތިދުވަހު ހިނގި އަލިފާނުގެ ހާދިސާގައި ހައުސިން މިނިސްޓްރީ ހިންގަމުން އައި އިމާރާތް އަނދައި ހުލުވިއިރު އެ މިނިސްޓްރީގެ ލިޔެކިޔުންތަކާއި މައުލޫމާތުތައް ރައްކާކޮށްފައި ހުރި ސާވާ ސަލާމަތްނުކުރެވި އެ ސާވާގައި ހުރި މުހިއްމު ލިޔެކިޔުންތަކާއި ޑާޓާ ގެއްލިއްޖެ އެވެ. 

ދައުލަތުގެ މީޑިޔާ ޕީއެސްއެމްއަށް ދެއްވި ބަސްދީގަތުމެއްގައި ހައުސިން މިނިސްޓަރު ޑރ.އަލީ ހައިދަރު ވިދާޅުވެފައިވަނީ އެ ވުޒާރާގައި ހުރި ހުރިހައި ލިޔެކިޔުމެއް އަދި ޑާޓާއެއްހެން އަލިފާނުގެ ހާދިސާގައި ގެއްލިގެން ގޮސްފައިވާ ކަމަށެވެ. 

މުވައްޒަފުންގެ މައުލޫމާތުތަކާއި މިނިސްޓްރީން ހިންގަމުން އައި މަޝްރޫއުތަކުގެ މައުލޫމާތުތައް ހުންނާނީ އެ މިނިސްޓްރީގެ ސާވާގައިކަން ފާހަގަކުރައްވަމުން މިނިސްޓަރު ވިދާޅުވީ މިހާރު ބޮޑަށް ބެލެވެނީ ސާވާވެސް ސަލާމަތްނުކުރެވޭނެ ކަމަށް ކަމުގަ އެވެ.  އަދި ސާވާއަށް ނުވަދެވޭނަމަ އެ މައުލޫމާތު އަލުން ހޯދޭނެ އެއްވެސް ގޮތެއް ނޯންނާނެ ކަމުގައި މިނިސްޓަރު ވިދާޅުވި އެވެ. 

"ވުޒާރާއަށް ބަލާއިރު ވުޒާރާގައި ހުރި ހުރިހާ ލިޔެކިޔުމަކާއި ޑޭޓާއެއް އެއްކޮށް [އަނދައިގެން] އެ ދިޔައީ. ހާއްސަކޮށް އަޅުގަނޑުމެންގެ ސާވާ ސަލާމަތްނުކުރެވޭނެ ކަމަށް މިހާރު އަންދާޒާކުރެވެނީ މިހާރު. އެހެންކަމަށްވެއްޖެއްޔާ އެއީ ވަރަށް ބޮޑު ގެއްލުމެއް. އަޅުގަނޑުމެންގެ އަތުގައި ހުރި ހުރިހާ މައުލޫމާތެއް ގެއްލިގެންދިޔައީ،" މިނިސްޓަރު ވިދާޅުވި އެވެ. 

"އެ ސާވާއަށް އެކްސެސް ނުލިބެންޏާ އަޅުގަނޑުމެންނަށް އެ މައުލޫމާތު އަލުން ހޯދޭނެ ގޮތެއް ނޯންނާނެ،"

މިނިސްޓަރު ވިދާޅުވި ގޮތުގައި ސާވާއަށް ނުވަދެވުނު ނަމަވެސް ގެދޮރުވެރިޔާއާއި ބިންވެރިޔާ ސްކީމު އަދި އޭގެ ފަހުން ހިންގަން ފެށި ލޯނު ސްކީމުގެ މައުލޫމާތުތައް ނުގެއްލޭނެ އެވެ. އެ ތިން ސްކީމުގެ ހުރިހާ ލިޔެކިޔުމެއް ރައްކާކޮށްފައި ހުރީ ކްލައުޑުގައިކަން ފާހަގަކުރައްވައި މިނިސްޓަރުވަނީ އެ ލިޔެކިޔުންތައް ނުގެއްލޭނެކަމުގެ ޔަގީންކަން ދެއްވާފަ އެވެ. 

"ނަސީބަކުން އަޅުގަނޑުމެން ފްލެޓް ލިސްޓުގެ ހުރިހާ މައުލޫމާތަކާއި ގެދޮރުވެރިކަމުގެ މަޝްރޫއާއި ބިންވެރިކަމުގެ ހުރިހާ މަޝްރޫއެއްގެ މައުލޫމާތެއް ރައްކާކުރަމުންދިޔައީ ކްލައުޑުގައި. އެހެންވީމަ ސާވާއަށް ގެއްލުން ލިބުނަސް އަޅުގަނޑުމެންނަށް އެ މައުލޫމާތު ލިބެން ހުންނާނެ ކްލައުޑުން،" މިނިސްޓަރު ވިދާޅުވި އެވެ. 

މިހާރު މިނިސްޓްރީގެ މަސައްކަތްތައް ދަރުބާރުގެއަށް ބަދަލުކުރުމުގެ މަސައްކަތް ފެށިފައިވާއިރު ހައިދަރު ވިދާޅުވީ މިނިސްޓްރީގެ ހިދުމަތްތައް އަންނަ އާދީއްތަދުވަހުން ފެށިގެން ދަރުބާރުގެއިން ފޯރުކޮށްދޭނެ ފެށޭނެ ކަމަށެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.