މާޅޮހު ކައުންސިލުން ގެއްލުނު ބައި މިލިއަން | އިދާރީ މުވައްޒަފަކު ހިންގި ޖަރީމާއެއް

އއ.މާޅޮހު ކައުންސިލުގެ ފައިސާގެ ތެރެއިން 492،867 ރުފިޔާ ގެއްލިފައިވާކަން އޮޑިޓާ ޖެނެރަލްގެ އޮފީހުން ނެރުނު އޮޑިޓު ރިޕޯޓެއްގައި ހާމަކޮށްފި އެވެ. 

މާޅޮހު ކައުންސިލުގެ އޮޑިޓަކީ ދިވެހި ފުލުހުންގެ ހިދުމަތުން އެދިގެން އޮޑިޓާ ޖެނެރަލްގެ އޮފީހުން ހަދާފައިވާ އޮޑިޓެކެވެ. މި އޮޑިޓުގައި ފާހަގަކުރި ފައިސާއަކީ 2017 ވަނަ އަހަރާއި 2018 ވަނ އަހަރުގެ ތެރޭގައި ކަައުންސިލުގެ އިދާރާގެ ބޭނުމަށް ނަގާފައިވާ ނަގުދު ފައިސާގެ ތެރެއިން ގެއްލުނު ފައިސާ އެވެ. 

އެ ފައިސާގެ ތެރޭގައި ހިމެނެނީ ކައުންސިލުގެ އިދާރާގެ ބޭންކު އެކައުންޓުން ނެގި ފައިސާގެ ތެރެއިން އެ ކައުންސިލުގެ ތިޖޫރީއަށް ވައްދާފައިނުވާ 255،584 ރުފިޔާއާއި، ކައުންސިލު އިދާރާގެ ބޭނުންތަކަށް ކަމުގައި ބުނެ އޮޅުވާލައިގެން ކައުންސިލުގެ އެކައުންޓުތަކުން ނެގި 112،500 ރުފިޔާއަކާއި، މުވައްޒަފުންގެ އެލަަވެންސް ފައިސާގެ ގޮތުގައި ދޭންޖެހޭ އަދަދަށްވުރެ އިތުރަށް ނެގި 82،579 ރުފިޔާއަކާއި، ތިޖޫރީގައި ހުރި ފައިސާއިން އެކައުންޓަށް ޖަމާކުރަން ކަމުގައި ބުނެ ނެގުމަށްފަހު އެކައުންޓަށް ޖަމާކޮށްފައިނުވާ 42،204 ރުފިޔާ އެވެ. 

މި ފައިސާގެ ތެރެއިން 255،584 ރުފިޔާ އެކައުންޓުން ނަގާފައިވަނީ އަށް ޗެކު މެދުވެރިކޮށެވެ. އެ ފައިސާ ނެގި ބޭނުމާއި ބޭނުންކުރި ގޮތް އެނގޭނެ އެއްވެސް ލިޔުމެއް ނެތްކަން އޮޑިޓު ރިޕޯޓުގައި ފާހަގަކޮށްފައިވެ އެވެ. އެގޮތުން ފައިސާ ހަރަދުކުރުމުގެ ކުރިން ހަދަންޖެހޭ ޕޭމަންޓު ވައުޗަރުތަކާއި ފައިސާ ހަރަދުކުރުމުގެ ކުރިން ތައްޔާރުކުރަންޖެހޭ ސަޕޯޓިން ޑޮކިއުމެންޓުތައް ކައުންސިލު އިދާރާގައި ނެތްކަމަށް އޮޑިޓު ރިޕޯޓުގައި ބުނެފައިވެ އެވެ. 

އޮޑިޓު ރިޕޯޓުގައި ފާހަގަކުރި ގޮތުގައި އެ ފައިސާ ނެގުމަށް ބޭނުންކުރި އަށް ޗެކުގެ ތެރެއިން އެއް ޗެކުން ނެގި 48،298 ރުފިޔާ ފިޔަވައި ބާކީހުރި ފައިސާ ނަގާފައިވަނީ އެ ކައުންސިލުގެ އެޑްމިނިސްޓްރޭޓިވް އޮފިސަރުގެ މަގާމުގައި ކުރިން ހުރި މުވައްޒަފެކެވެ. އެ ފައިސާ ތިޖޫރީއަށް ނުވައްދާކަން ލިޔެކިޔުމުން އެނގޭކަން އޮޑިޓު އޮފީހުން ފާހަގަކުރި އެވެ. 

112،500 ރުފިޔާއަކީ ލިޔެކިޔުން ފޯޖުކޮށް ލިޔުންތައް އޮޅުވާލައިގެން ނަގަންޖެހޭ އަދަދަށްވުރެ އިތުރަށް ބޭންކު އެކައުންޓުން ނަގާފައިވާ ފައިސާ އެވެ. އެ ފައިސާ ކައުންސިލުގެ ތިޖޫރީއަށް ވެއްދިކަން އެނގޭނެ ލިޔުމެއް ނެތްއިރު، އެ ފައިސާ ބޭނުންކުރީ ކިހިނެއްކަން އަދި ބޭނުންކުރީ ކައުންސިލުގެ ބޭނުންތަކަށްކަން އެނގޭނެ ލިޔުމެއްވެސް ކައުންސިލު އިދާރާގައި ނެތްކަން އޮޑިޓު އޮފީހުން ފާހަގަކުރި އެވެ. 

މި މައްސަލަތަކުގައި ޝާމިލުވާ ކައުންސިލުގެ އެޑްމިނިސްޓްރޭޓިވް އޮފިސަރުވަނީ ކައުންސިލުގެ އިންޓާނަލް އޮޑިޓުގައި އެ ކައުންސިލުގެ ފައިސާގެ ތެރެއިން ދެލައްކައެއްހައި ރުފިޔާ އަމިއްލަ ބޭނުމަށް ބޭނުންކުރިކަމަށް އިއުތިރާފުވެފަ އެވެ. އަދި ކައުންސިލުގެ ބޭނުންތަަކަށް ފައިސާ ނަގާއިރު ލިޔެކިޔުން އޮޅުވައިލާ ކައުންސިލުގެ ވެރިންގެ ސޮއި ފޯޖުކޮށްގެން ނަގަންޖެހޭ އަދަދަށްވުރެ އިތުރަށް ފައިސާ ނެގުމަށްފަހު، އިތުރަށް ނަގާ ފައިސާ އަމިއްލަ ބޭނުންތަކަށް ބޭނުންކުރިކަމަށް އޭނާ އެއްބަސްވެފައިވެ އެވެ. 

އޮޑިޓު އޮފީހުން ފާހަގަކުރި ގޮތުގައި އެ މުވައްޒަފަށް އެ ޖަރީމާ ހިންގުނީ ކައުންސިލުގެ މާލީ ޒިންމާދާރުވެރިޔާ އޭނާގެ ގާނޫނީ ޒިންމާ އަދާނުކުރުމުންނެވެ. އަދި ލިޔެކިޔުންތައް ހުރީ ރަނގަޅަށްތޯ ބަލަންޖެހޭ ކައުންސިލުގެ ވެރިން އެކަންވެސް ބަލާފައި ނެތުމުގެ ސަބަބުންނެވެ. 

އެ މައްސަލާގައި އޮޑިޓު އޮފީހުންވަނީ ޖިނާއީ ތަހުގީގެއް ހިންގުމަށް ލަފާދީފަ އެވެ. އަދި އޭގެ އިތުރަށް އިސްލާހުކުރުމުގެ ގޮތުން އަޅަންޖެހޭ ފިޔަވަޅުތައް އޮޑިޓު ރިޕޯޓުގައި ފާހަގަކުރި އެވެ. މީގެ ކުރިންވެސް ބައެއް ކައުންސިލުތަކުން ފައިސާ ގެއްލުމުގެ މައްސަލަތައް ފެންމަތިވެފައިވެ އެވެ.