ސޯލިހާ ފައްޔާޒާމެދު ޖިނާއީ ތަހުގީގު ހިންގަން އުޅެނީ ސަމާލުކަން އަނބުރައިލުމަށް: ޝާހިދު

ޝާހިދު ސިފަކުރެއްވި ގޮތުގައި ސޯލިހާއި ފައްޔާޒާމެދު ޖިނާއީ ތަހުގީގެއް ހިންގަަން އުޅެނީ ސަރުކާރުގެ ނާކާމިޔާބީއާއި ގެއްލެމުންދާ މަގުބޫލުކަމުން ރައްޔިތުންގެ ސަމާލުކަން އެހެން ދިމާލަކަށް އަނބުރައިލުމުގެ މަގުސަދުގަ އެވެ.

އެމްޑީޕީގެ މަހާސިންތާގައި އަބްދުﷲ ޝާހިދު ވާހަކަދައްކަވަނީ، ފޮޓޯ: އެމްޑީޕީ

ރައްޔިތުންގެ މަޖިލީހުން ފާސްކޮށްގެން އިދިކޮޅު އެމްޑީޕީގެ މުސްތަޝާރުގެ މަގާމުގައި ހުންނެވި ކުރީގެ ރައީސް އިބްރާހީމް މުހައްމަދު ސޯލިހާއި އެ ޕާޓީގެ ޗެއާޕާސަން ފައްޔާޒު އިސްމާއީލާމެދު ޖިނާއީ ތަހުގީގެއް ހިންގަން އުޅެނީ ސަރުކާރުގެ ނާގާބިލުކަމުން ރައްޔިތުންގެ ސަމާލުކަން އެހެން ދިމާލަކަށް އަނބުރައިލުމުގެ މަގުސަދުގައިކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ. 

ރައީސް ސޯލިހާއި ފައްޔާޒުގެ މައްޗަށް ޖިނާއީ ތަހުގީގެއް ހިންގައިދޭން އެދުމަށް މަޖިލީހަށް ހުށަހެޅީ މަޖިލީހުގެ މާލިއްޔަތު ކޮމިޓީންނެވެ. އެއީ ރައީސް ސޯލިހުގެ ވެރިކަމުގައި ރައީސް އޮފީހުގައި އެކުލަވައިލި ސެޓްލްމެންޓު ކޮމިޓިން އެތައް ބަޔަކަށް ބަދަލުގެ ގޮތުގައި ގިނަ އަދަދެއްގެ ފައިސާއާއި ފަޅާއި ފަޅުރަށް ދިނުމަށް ނިންމި މައްސަލާގައި ވަކި ބަޔަކަށް މަންފާ ހޯދައިދިނުމުގެ މަގުސަދުގައި އަމަލުތަކެއް ހިންގަވާފައިވާ ކަމަށް ތުހުމަތުކޮށެވެ. 

އިއްޔެ ރައްޔިތުންގެ މަޖިލީހުންވަނީ ސޯލިހާއި ފައްޔާޒުގެ އިތުރަށް ރައީސް އޮފީހުގެ ކުރީގެ މިނިސްޓަރު އަލީ ޝިޔާމުގެ މައްޗަށް ޖިނާއީ ތަހުގީގެއް ހިންގުމަށް ކަމާ ގުޅުންހުރި އިދާރާތަކަށް އެންގުމަށް މާލިއްޔަތު ކޮމިޓީން ލަފާދިން ގޮތަށް ފާސްކޮށްފަ އެވެ. 

ޝިޔާމަކީ ރައީސް އޮފީހުގައި އެކުލަވައިލި ސެޓްލްމެންޓު ކޮމިޓީގެ ޗެއާއެވެ. ނަމަވެސް ފައްޔާޒަކީ ކޮމިޓިގައި އެއްވެސް ދައުރެއް އަދާކުރެއްވި ބޭފުޅެއް ނޫނެވެ. މާލިއްޔަތު ކޮމިޓީން ތުހުމަތުކުރި ގޮތުގައި ފައްޔާޒަކީ ސެޓްލްމެންޓު ކޮމިޓީން ބަދަލު ދިނުމަށް އެކި ފަރާތްތަކާއެކު އެއްބަސްވުންތައް ހެދުމުގައި މެދުވެރިއެއްގެ ދައުރު އަދާކުރެއްވި ބޭފުޅެކެވެ. 

މިކަމާ ގުޅިގެން ޝާހިދު ކުރެއްވި ޕޯސްޓުގައި ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އަޣުލަބިއްޔަތު އޮތް މަޖިލީހުން ރައީސް ސޯލިހާއި ފައްޔާޒު އަދި ޝިޔާމާ ދެކޮޅަށް ޖިނާއީ ތަހުގީގެއް ހިންގުމަށް އެންގީ އެއްވެސް އަސާސެއް ނެތް ތުހުމަތުތަކެއްގެ މައްޗަށް ބިނާކޮށް ކަމުގަ އެވެ. އަދި އެ ނިންމުމާމެދު ކަންބޮޑުވެވަޑައިގަންނަވާކަން ހާމަކުރައްވައި އެ ނިންމުން ޝާހިދު ކުށްވެރިކުރެއްވި އެވެ. 

އިތުރަށް ޝާހިދު ވިދާޅުވީ އެ ނިންމުމަކީ ރައީސް ސޯލިހުގެ ވެރިކަމުގައި ގާއިމުކުރެވުނު ހެޔޮވެރިކަމާއި ޑިމޮކްރަސީގެ ރީތި އުސޫލުތައް ނައްތައިލުމަށް ކުރާ މަސައްކަތެއް ކަމަށެވެ. އޭނާ ސިފަކުރެއްވި ގޮތުގައި އެއީ ސަރުކާރަށް ކުރިމަތިވެފައިވާ ނާކާމިޔާބާއި ގެއްލިފައިވާ ތާއީދު ފޮރުވައި، ރައްޔިތުންގެ ސަމާލުކަން އެހެން ދިމާލަކަށް އަނބުރައިލުމަށް ހިނގި އަމަލެކެވެ. 

"މިއީ މިއަދުގެ ސަރުކާރަށް ކުރިމަތިވެފައިވާ ނާކާމިޔާބީ އާއި، ގެއްލިފައިވާ ތާޢީދު ފޮރުވައި، ރައްޔިތުންގެ ސަމާލުކަން އެހެން ދިމާލަކަށް އަނބުރާލުމަށް ކުރާ ފިނޑި މަސައްކަތެއް.،" ޝާހިދު ވިދާޅުވި އެވެ. 

އަދި ޝާހިދު ވިދާޅުވީ އެ ނިންމުމުގެ ބޭނުމަކީ ދައުލަތުގެ ދަރަނިތައް އިތުރުވަމުންދިއުމާއި، ރައްޔިތުންނަށް ލިބިފައވާ މިނިވަންކަމާއި ހައްގުތައް ނިގުޅައިގަންމުންދާ މައްސަަލާގައި ރައްޔިތުންނަށް ޖަވާބުދާރީނުވުން ކަމަށެވެ. 

"މިއީ އިންސާފާއި ކުރިއެރުމާއި ގައުމާ ރައްޔިތުންނާ ގުޅުންހުރި ކަމެއް ނޫން. މިއީ ޑިމޮކްރަސީ އެއްފަރާތްކޮށް ބާރުތައް ޖަމާކުރުމަށް ކުރަމުންދާ މަސައްކަތެއް،" ޝާހިދު ވިދާޅުވި އެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.