ލައިވްގައި ގުރުއާނުގެ ބައެއް އުނިކޮށް ދެއްކުމުން ޕީއެސްއެމް އިން މާފަށް އެދިއްޖެ، ޑިއުޓީގައި ތިބި މުވައްޒިފުން އެކަހެރި

ޕީއެސްއެމް އިން ބުނީ އެ ވަގުތު ޑިއުޓީގައި ތިބި މުވައްޒފިުން އެ މީހުން ކުރަމުން އައި މަސައްކަތުން މިހާރު އެކަހެރި ކޮށްފައިވާ ކަމަށެވެ.

ޓީވީ ބިލްޑިންގ -- އެޑިޝަންގެ ފޮޓޯއެއް

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައިވެރިވެވަޑައިގެންނެވި ޖަލްސާއެއްގެ ލައިވް ޕީއެސްއެމްއިން ގެނެސްދިންއިރު އެ ޖަލްސާ ފެށުމުގެ ގޮތުން ކިޔެވި އާޔަތްތަކުގެ ތެރެއިން އާޔަތެއްގެ ބައެއް އުނިވެފައި ވަނީ އިހުމާލުގެ މައްސަލައެއްގެ ސަބަބުން ކަމަށް ޕީއެސްއެމް އިން ބުނެފި އެވެ.

ބައެއް ފަރާތްތަކުން މީސްމީޑިޔާގައި ދައުރުކުރަމުންދަނީ ރައީސް ރަސްދޫއަށް ވަޑައިގެންނެވި ދަތުރުފުޅުގައި އެ ރަށު ރައްޔިތުންނާ ބައްދަލުކުރެއްވުމަށް ބޭއްވެވި ޖަލްސާގައި ކިޔެވި އާޔަތްތަކުގެ ތެރެއިން ފާސިގަކު ހަބަރަކާއިގެން އަތުވެއްޖެނަމަ އެކަމުގެ ތެދުދޮގު ބެލުމަށް އަންގަވާފައިވާ އާޔަތުގެ ފާސިގު އެލަފުޒު އުނިކޮށްފައިވާ ވީޑިޔޯއެކެވެ.  

ރައްޔިތުންގެ މަޖިލީހުގެ ކުރީގެ ބައެއް މެންބަރުންނާއި ކާކުކަން ނޭނގޭ ގޮތަށް މީސްމީޑިޔާގައި ވާހަކަ ފަތުރާ ބައެއް ފަރާތްތަކުން މިވާހަކަތައް ފަތުރައި މިވީޑިޔޯ މީސްމީޑިޔާ އެކި މަންސަތަކުގައި ވަރަށް ބޮޑަށް ދައުރުކުރި އެވެ.

އެކަން ދިމާވިގޮތް ސާފުކޮށްދީ ޕީއެސްއެމް އިން ނެރުނު ބަޔާނެއްގައި ބުނެފައި ވަނީ އެކަން ހިނގާދިޔަ ގޮތް ސީރިއަސް މައްސަލައެއްގެ ގޮތުގައި އެ ކުންފުނީގެ އިސް މުވައްޒިފުން ހިމެނޭ ކޮމެޓީއަކުން ބަލާފައިވާ ކަމަށެވެ. އަދި އެކަން ބެލި ބެލުމުން އެ ކުންފުނީގެ ޗެނަލްތަކުން ގެނެސް ދިން ކޮންޓެންޓް ގައި ކީރިތި ގުރުއާނުގެ ބައެއް އުނިވެފައިވާތީ ރައްޔިތުންގެ އަރިހުން މާފަށް އެދޭ ކަމަށެވެ.

އެ މައްސަލަ ބެލުމުން އެކަން ހިނގާ ދިޔަ ގޮތް ސާފުވެފައިވާ ކަމަށާ އެއީ ލައިވްކޮށް ގެނެސްދިން ކޮންޓެންޓެއްގެ ޓެކްނިކަލް މައްސަލައަކުން ދިމާވި ކަމެއް ކަމަށް ބުނެފައިވެ އެވެ. އެކަން ހިނގާދިޔައީ ކޮންޓްރޯލް ރޫމްގައި އެވަގުތު ތިބި މުވައްޒިފުންގެ އިހުމާލުން ކަމަށް ވާތީ އެ މުވައްޒިފުން ވެސް ވަނީ މާފަށް އެދިފައި ކަމަށް ބުންޏެވެ. އަދި ބުނީ އެ ވަގުތު ޑިއުޓީގައި ތިބި މުވައްޒފިުން އެ މީހުން ކުރަމުން އައި މަސައްކަތުން މިހާރު އެކަހެރި ކޮށްފައިވާ ކަމަށެވެ.

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.