ހުޅުމާލެ ކަންނެލި ޖެޓީގެ އިތުރުން ހަތަރު ރަށަކުން އެސްޓީއޯއިން ތެޔޮ ވިއްކަނީ

ހުޅުމާލެ ކަންނެލި ޖެޓީގެ އިތުރުން ހަތަރު ރަށެއްގައި އެސްޓީއޯ ރޭޓުގައި މަސްވެރިންނަށް ތެޔޮ ފޯރުކޮށްދޭން ފަށައިފި އެވެ.

ރައީސް ޑރ. މުހައްމަދު މުއިއްޒުގެ ސަރުކާރުން ވަނީ މަސްވެރިންނަށް އަގު ހެޔޮކޮށް ތެޔޮ ފޯރުކޮށް ދިނުމުގެ މަސައްކަތް މަސްވެރިންގެ ދުވަހާ ދިމާކޮށް ފައްޓަވައި ދެއްވާފަ އެވެ. ކުރިން ހަމައެކަނި މަސްވެރިންނަށް އަގުހެޔޮކޮށް ތެޔޮ ފޯރުކޮށްދެނީ މިފްކޯގެ ބައެއް ފެސިލިޓީތަކުންނެވެ. އަދި ހަމައެކަނި ކަޅުބިލަ މަހުގެ މަސްވެރިންނަށް އެކަނި ތެޔޮ ފޯރުކޮށް ދެމުން ގެންދާނީ ކަންނެލި މަސްވެރިން ޝަކުވާ ކުރިނަމަވެސް އެމީހުންނަށް ތެޔޮ ފޯރުކޮށް ދީފައެއް ނުވެ އެވެ.

ނަމަވެސް ކަންނެލި މަސްވެރިންނަށްވެސް ތެޔޮ ފޯރުކޮށްދޭން ފެށުމާއެކު އެސްޓީއޯއިން މިއަދު ބުނީ މަސްވެރިންނަށް ހެޔޮ އަގުގައި ތެޔޮ ފޯރުކޮށްދިނުމަށް ސަރުކާރުން ގެންގުޅޭ ސިޔާސަތުގެ ދަށުން، ރާއްޖޭގެ ކޮންމެ އަތޮޅެއްގެ މަދުވެގެން އެއް ރަށުން "އެސްޓީއޯ ރޭޓް" ގައި، މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާގެ "ފަހި ހަކަތަ" ޕޯޓަލް މެދުވެރިކޮށް މަސްވެރިންނަށް ތެޔޮ ލިބޭނެ އިންތިޒާމު މި ކުންފުނިން މިދަނީ ހަމަޖައްސަމުންނެވެ.

އެގޮތުން 10 ޑިސެމްބަރު ވީ އަންގާރަ ދުވަހު ފާހަގަކުރި ގައުމީ މަސްވެރިންގެ ދުވަހު ރައީސުލްޖުމްހޫރިއްޔާ އިއުލާން ކުރެއްވި ގޮތަށް، ހުޅުމާލެ ކަންނެލި ޖެޓީގެ އިތުރުން، ކ. ހިންމަފުށި، ޅ. ފެލިވަރު، ގއ. ކޫއްޑޫ، އަދި ސ. ހުޅުމީދޫއިން، މި ދެންނެވި ރޭޓުގައި ތެޔޮ ވިއްކަން މިހާރުވަނީ ފަށާފަ އެވެ. އަދި 2025 ގެ ނިޔަލަށް ރާއްޖޭގެ ކޮންމެ އަތޮޅެއްގައި ފިއުލް ސްޓޯރޭޖް ގާއިމްކޮށް، "އެސްޓީއޯ ރޭޓް" ގައި ތެޔޮ ލިބޭނޭ އިންތިޒާމް ހަމަޖައްސުމަށް މި ކުންފުނިން މަސައްކަތް ކުރަމުންދާ ވާހަކަ ދަންނަވަމެވެ.