އެމްޑީޕީން ޓެރަރިޒަމަށް ހިތްވަރު ދިން ކަމަށް ބުނެ މައްސަލަ ތަހުގީގު ކުރަން ޕީއެންސީން ގޮވާލައިފި

ރާއްޖޭގެ ފުރަތަމަ ރައީސް، މުހައްމަދު އަމީން ސިޔާސީ ބަޔަކު އުފެއްދި ނަފުރަތާއި ރުޅިވެރިކަމުގެ ސަބަބުން މާލޭގައި ހަވަރު އެއްވެ، އެމަނިކުފާނު ރާއްޖެއިން ބޭރުން މާލެއަށް ވަޑައިގަތުމުން ހަށިކޮޅަށް އަނިޔާކޮށް، އަވަހާރަކޮށްލި ގޮތަށް، މިހާރުގެ ރައީސް ޑރ. މުހައްމަދު މުއިއްޒާމެދު އަމަލުކުރުމަށް އެމްޑީޕީން ހިތްވަރު ދީފައިވާ ކަމަށް ބުނެ، އެ މައްސަލަ ބެލުމަށް ތަހުގީގީ އިދާރާތަކަށް ޕީއެންސީން ގޮވާލައިފި އެވެ.

ޕީއެންސީން ނެރުނު ބަޔާނެއްގައި ބުނެފައި ވަނީ ރައީސް އަމީނަށް ހެދި ގޮތަށް ހަދާނެ ކަމަށް ބުނެ ރައީސް މުއިއްޒަށް ހަދާނެ ކަމަށް އެމްޑީޕީގެ ޕޯޑިއަމްތަކުގައި އެ ޕާޓީގެ އާންމު މެންބަރުންނާއި އިސްވެރިން ދައްކަވަމުންދާ ވާހަކަތައް ކުށްވެރި ކުރާ ކަމަށެވެ.

އެ ބަޔާނުގައި ވަނީ، ރައީސް އަމީނާމެދު ކަން ހިނގައިދިޔަ ގޮތަކީ ރާއްޖޭގެ ސިޔާސީ ތާރީހުގައި އަނދިރި ސޮފްހާއެއް ކަމަށެވެ. އަދި މިއަދު ގާއިމުކުރެވިފައިވާ ދުސްތޫރީ ނިޒާމުގެ އެންމެ މުހިއްމު އެއް ބޭނުމަކީ ސިޔާސީ ކަންކަމުގެ ތެރެއަށް އަނިޔާވެރިކަމާއި، ހަމަނުޖެހުމާއި، ނަފުރަތު ވަނަނުދީ، ސިޔާސީ މަސައްކަތްތައް ޑިމޮކްރެޓިކް ހަމަތަކުގެ ތެރެއިން ކުރިއަށްގެންދެވޭނެ އިންތިޒާމުތައް ހަމަޖެއްސުން ކަމަށެވެ. 

"އެއީ އިހުގައި ދިވެހި ސިޔާސީ މަސްރަހުން ފެނިފައިވާ އަނިޔާވެރި އަމަލުތައް އިޢާދަވިޔަނުދިނުމަށް ތަރުތީބުކުރެވިފައިވާ ނިޒާމެކެވެ.: ޕީއެންސީގެ ބަޔާނުގައިވެ އެވެ.

އެ ޕާޓީން ބުނީ އެ ނިޒާމުގެ އަސާސްތަކާ ހިލާފަށް އަނިޔާވެރިކަމަށް ހިތްވަރުދީ އެމްޑީޕީގެ ޕޯޑިއަމެއްގައި ޕާޓީގެ އާންމު މެންބަރަކު ދެއްކި ވާހަކަ ކުށްވެރިކުރެއްވުމުގެ ބަދަލުގައި، އެ ޕާޓީގެ ޗެއާޕާސަން ފައްޔާޒު އިސްމާއީލް އެ ވާހަކައަށް އިތުރު ހިތްވަރު ދެއްވައި ވާހަކަދެއްކެވުމަކީ ނުރައްކާތެރި އަމަލެކެވެ.

"މިފަދައިން މީހަކާމެދު އަނިޔާވެރި އަމަލުތައް ހިންގުމަށް ބާރުދީ ވާހަކަދެއްކުމަކީ ޓެރަރިޒަމް މަނާކުރުމުގެ ގާނޫނުގައި ބަޔާންކޮށްފައިވާ ކުށަކަށްވާތީ، ފައްޔާޒު އަދި އެމްޑީޕީގެ އާންމު މެންބަރު ހިންގެވި މި އަމަލު ގާނޫނު ތަންފީޒުކުރާ އިދާރާތަކުން ތަހުގީގުކޮށް، ގާނޫނީ އިމުގެ ތެރެއިން އަޅަންޖެހޭ ފިޔަވަޅުތައް އެޅުމަށް މި ޕާޓީން ގޮވައިލަމެވެ." ޕީއެންސީން ބުންޏެވެ.

އެމްޑީޕީގެ އާންމު މެންބަރަކު ދެއްކި އެ ވާހަކައަކީ ޓެރަރިޒަމަށް ހިތްވަރުދޭ އަމަލެއް ކަމަށް ޕީއެންސީގެ އިސްވެރިންނާއި ރައްޔިތުންގެ މަޖިލީސް މެންބަރުން ވެސް ވަނީ ވިދާޅުވެފަ އެވެ. ނަމަވެސް ފައްޔާޒް ވިދާޅުވެފައި ވަނީ އެއީ ރައީސަށް ނަސޭހަތެއް ދިނުމުގެ މޭރުމުން ދެއްކި ވާހަކައެއް ކަމަށެވެ.