ރާއްޖޭގައި އިންވެސްޓުކުރަން ހުރި ފުރުސަތުތަކުގެ މައުލޫމާތު އޮމާންއާ ހިއްސާކުރައްވައިފި
އޮމާނުގެ މާލީ ވަޒީރާ ބައްދަލުކުރައްވައި މިނިސްޓަރު ހަލީލުވަނީ ދެ ގައުމުގެ މެދުގައި އެކި ދާއިރާތަކުން ގުޅުން ބަދަހިކުރުމާމެދު މަޝްވަރާކުރައްވަައި ރާއްޖޭގައި ހުރި އިންވެސްޓުމެންޓު ފުރުސަތުތަކުގެ މައުލޫމާތު ހިއްސާކުރައްވާފަ އެވެ.
ރާއްޖޭގައި އިންވެސްޓުކުރަން ހުރި ފުރުސަތުތަކުގެ މައުލޫމާތު ދިވެހި ސަރުކާރުން އޮމާންއާ ހިއްސާކޮށްފި އެވެ.
ދިވެހިރާއްޖޭގައި އިންވެސްޓުކުރަން ހުރި ފުރުސަތުތަކާ ގުޅޭ ގޮތުން އޮމާން ސަރުކާރާ މަޝްވަރާކުރީ ހާރިޖީވަޒީރު އަބްދުﷲ ހަލީލު އޮމާނަށް ކުރައްވަމުންދާ ދަތުރުފުޅުގެ ތެރެއިން އެ ގައުމުގެ މާލީ ވަޒީރު ސުލްޠާން ބިން ސާލިމް ބިން ސާއިދު އަލްހަބްސީއާ ބައްދަލުކުރެއްވި ކުރެއްވުމުގަ އެވެ.
މިނިސްޓަރު ހަލީލުވަނީ މި ބައްދަލުވުމުގައި ދިވެހި ސަރުކާރުން ގެންގުޅޭ ތަރައްގީގެ ސިޔާސަތުތަކުގެ އިތުރަށް ރާއްޖޭގައި އިންވެސްޓުކުރަން ހުރި ފުރުސަތުތަކުގެ މައުލޫމާތު އޮމާނުގެ މާލީ ވަޒީރާ ހިއްސާކުރައްވާފަ އެވެ.
އަދި ދެ ގައުމުގެ މެދުގައި އެކި ދާއިރާތަކުން ގުޅުން ބަދަހިކުރުމަށް ކުރެވިދާނެ މަސައްކަތްތަކާ ގުޅޭ ގޮތުން މި ބައްދަލުވުމުގައި ދެ ބޭފުޅުން މަޝްވަރާކުރެއްވިކަމަށް ފޮރިން މިނިސްޓްރީން ބުނެފައިވެ އެވެ.
އޮމާނަށް ޑރ.ހަލީލު ކުރައްވާ ދަތުރުފުޅަކީ އެ ގައުމުގެ ހާރިޖީވަޒީރު ސައްޔިދު ބަދްރު ބިން ހަމަދު ބިން ހަމޫދު އަލްބުސައިދީގެ ދައުވަތަކަށް ކުރައްވާ ދަތުފުޅެކެވެ. މި ދަތުރުފުޅު ނިންމަަވައިލައްވާނީ އަންނަ ހުކުރުދުވަހު ކަމަށް މިނިސްޓްރީން ބުނެފައިވެ އެވެ.
މި ދަތުރުފުޅުގައޮި އޮމާނުގެ ހާރިޖީވަޒީރު އަލްބުސައިދީއާ ހަލީލު ބައްދަލުކުރައްވާނެ އެވެ. މިނިސްޓަރު ވިދާޅުވި ގޮތުގައި އެ ބައްދަލުވުމުގައި މުހިންމު މަޝްވަރާތަކެއް ކުރިއަށްގެންދަވަންވަނީ ހަމަޖެހިފަ އެވެ. އެގޮތުން ދެގައުމުގެ ޒަމާންވީ ގުޅުން ބަދަހިކުރުމާމެދު މަޝްވަރާކުރައްވާނެ އެވެ.
މިނިސްޓަރު ވިދާޅުވި ގޮތުގައި މި ދަތުރުފުޅުގައި ރާއްޖެއާއި އޮމާނުގެ މެދުގައި އެކި ދާއިރާތަކުން އެއްބާރުލުން ދިނުން އިތުރުކުރެވޭނެ ގޮތްތައް ހޯދުމަށް އޮމާނުގެ އިސްވެރިންނާ ބައްދަލުކުރައްވަައި މަޝްވަރާކުރައްވަންވަނީ ހަމަޖެހިފަ އެވެ.
މި ދަތުރުފުޅުގައި ޑރ.ހަލީލު އަރިހުގައި ފޮރިން މިނިސްޓްރީގެ ސެކްރެޓަރީ ބައިލެޓްރަލް ޑރ.ހާލާ ހަމީދާއި ސީނިއާ އަންޑަ ސެކްރެޓަރީ ފާތިމަތު ނައީމާ ބައިވެރިވެވަޑައިގަންނަވަ އެވެ.
ކޮމެންޓް
Republic of Maldives