އަރުހަމް މަރާލިތާ 12 އަހަރު: ސަލާމަތްވި މީހުންގެ ޝަރީއަތް އަލުން ފަށައިފި

މީގެ 11 އަހަރު ކުރިން، ކުއްލިއްޔާގެ އިރަށް އޮންނަ ލޮރެންޒޯ ޕާކް ތެރޭގައި ހއ. ހޯރަފުށީ ނޫރީގޭ އަހުމަދު އަރުހަމް މަރާލި މައްސަލައިގައި ކުށް ސާބިތު ނުވި ތިން މީހުންގެ މައްސަލަ އަލުން ކްރިމިނަލް ކޯޓުން ބަލަން ފަށައިފި އެވެ.

މި މައްސަލައަކީ ޑިސެމްބަރު 4، 2023 ގައި ހައިކޯޓުން ކްރިމިނަލް ކޯޓަށް ތަހުވީލު ކޮށްފައިވާ މައްސަލައެކެވެ. 

އުމުރުން 16 އަހަރުގެ އަރުހަމް މަރާލާފައި ވަނީ މޭ 30، 2012 ގަ އެވެ. މި މައްސަލައިގައި ގަސްދުގައި މީހަކު މެރުމުގެ ކުށުގެ ދައުވާ އުފުލި ހަތަރު މީހުންގެ ތެރެއިން ތިން މީހުން ވަނީ ސަލާމަތް ވެފަ އެވެ. އެއީ، ގދ. ގައްދޫ ގުންޒަރު މުހައްމަދު ސުފްޔާނާއި، ލ. މާވަށު އަސަރީގޭ މަންސޫރު ޔޫސުފްގެ އިތުރުން މއ. ސީނަރީވިއު އާތިފް ރަޝީދެވެ.

ދަށު ކޯޓުން 2016 ވަނަ އަހަރު ކުރި ހުކުމުގައި ކުށް ސާބިތުވާ ކަމަށް ކަނޑައަޅާފައި ވަނީ ލ. މާވަށު އެވާބްލޫގޭ، މުހައްމަދު ވިސާމްގެ މައްޗަށެވެ. ކްރިމިނަލް ކޯޓުން ވަނީ އޭނާ މަރަން ހުކުމްކޮށްފަ އެވެ.

ސުފްޔާނާއި، މަންސޫރު އަދި އާތީފުގެ މައްޗަށް ކުށް ސާބިތު ނުވާ ކަމަށް ކުރި ހުކުމް ދައުލަތުން ވަނީ ހައިކޯޓުގައި އިސްތިއުނާފް ކޮށްފަ އެވެ. ހައިކޯޓުން ވަނީ އޭރު ދަށު ކޯޓުން ކުރި ހުކުމް ބާތިލުކޮށް އަލުން މައްސަލަ ބަލަން އެ ކޯޓަށް އަންގާފަ އެވެ.

އެހެންވެ، އަލުން މައްސަލަ ބެލުމަށް މިއަދު ވަނީ ފުރަތަމަ ޝަރީއަތުގެ އަޑުއެހުން ކްރިމިނަލް ކޯޓުގައި ބާއްވާފަ އެވެ. މައްސަލައިގެ އަޑުއެހުމަށް ހާޒިރުވީ ދައުވާ ލިބޭ އާތިފް އެކަންޏެވެ. ސުފްޔާން ބަލިވެ އުޅޭތީ ހާޒިރެއް ނުވެ އެވެ. އަދި މަންސޫރު ރަށުގައި ހުރުމުން އޮންލައިންކޮށް ބައިވެރިވާން މަސައްކަތް ކުރި ނަމަވެސް ދަތިތަކެއް ހުރުމުން ބައިވެރި ނުވެވުނީ އެވެ.

މިއަދުގެ އަޑުއެހުމުގައި އާތިފް ބުނެފައި ވަނީ ކުރިއަށް ދާން ބޭނުންވަނީ ވަކީލަކާ އެކުގައި ކަމަށެވެ. އެހެންކަމުން ވަކީލަކު އައްޔަނު ކުރުމުގެ ފުރުސަތު ގާޒީ އިބްރާހިމް ޒިހުނީ ވަނީ ދެއްވާފަ އެވެ. އަދި އަނެއް ދެ ފަރާތަށް ވެސް އެ ފުރުސަތު ދެއްވާނެ ކަމަށް ވިދާޅުވި އެވެ.

މި މައްސަލަ އަވަހަށް ކުރިއަށް ގެންދަވާނެ ކަމަށް ވެސް ގާޒީ ވަނީ ވިދާޅުވެފަ އެވެ.

ހައިކޯޓުން މި މައްސަލަ ކްރިމިނަލް ކޯޓަށް ތަހުވީލު ކުރި ހުކުމުގައި ބުނެފައި ވަނީ އެ ތިން މީހުންގެ މައްޗަށް ކުށް ސާބިތު ނުވާ ކަމަށް ކަނޑައަޅާފައި ވަނީ ކާފީ ހެކި ދައުލަތަށް ދެއްކިފައި ނުވާތީ ކަމަށް ބަޔާންކޮށް ނަމަވެސް، މި ތިން މީހުންގެ މައްޗަށް ކޮށްފައިވާ ތުހުމަތުތަކާ ގުޅިގެން އެއްވެސް އެހެން ނުކުތާއެއްގައި ދަށު ކޯޓުގެ ފަނޑިޔާރު އެއްވެސް ކަމަކަށް ރިއާޔަތް ކޮށްފައި ނުވާ ކަމަށެވެ.

އަދި، މި މައްސަލައިގައި ދައުލަތުގެ ފަރާތުން ގިނަ ހެކިތަކެއް ހުށަހަޅާފައިވާއިރު، އެ ތިން މީހުންނާ ގުޅޭ ވާގިއާތައް ކަށަވަރު ކުރުމުގެ ގޮތުން، ހެއްކަށް ރިއާޔަތް ކުރެވުނު ގޮތެއް، ހެކި ވަޒަން ކުރި ގޮތެއް އަދި ކުށް ސާބިތު ނުވާ ކަމުގެ ނިންމުމަށް ވާސިލްވި ގާނޫނީ ސަބަބެއް މައްސަލަ ނިމުނު ގޮތުގެ ރިޕޯޓުން ވެސް އެނގެން ނެތް ކަމަށް ހުކުމުގައިވެ އެވެ.