ބީއެމްއެލްގައި ހުރި އާންމުންގެ ފައިސާއަށް ކަށަވަރު ކަމެއް ނެތް، ނަގާ ބަހަން އެބަ ރާވާ: ސޯލިހް

ގައުމީ ބެންކު -- ބެންކު އޮފް މޯލްޑިވްސް ގައިވާ ރައްޔިތުންގެ ސޭވިންސް އެކައުންޓްތަކުގައި ހުރި ފައިސާއާމެދު ކަށަވަރު ކަމެއް ނެތް ކަމަށް ކުރީގެ ރައީސް އިބްރާހިމް މުހައްމަދު ސޯލިހް މިރޭ ވިދާޅުވެއްޖެ އެވެ.

އެެމަނިކުފާނު މިހެން ވިދާޅުވީ "ގާނޫނު އަސާސީގެ ދިފާއުގައި" ނަމުގައި އެމްޑީޕީން މިރޭ ކާނިވާ ސަރަހައްދު ގައި ބޭއްވި ބޮޑު ޖަލްސާ ގައި ވާހަކަފުޅު ދައްކަވަމުންނެވެ. ސޯލިހް ވިދާޅުވީ މި ސަރުކާރުގެ އަމާޒު ހުރީ ރާއްޖޭގައި ހުދުމުހުތާރު ވެރިކަމެއް ގާއިމު ކުރުމަށެވެ. އެކަމަށް މަގު ފަހި ކުުރުމަށް ހުރިހާ ބާރުތަކެއް ރައީސް މުއިއްޒުގެ އަތްޕުޅަށް ޖަމާ ކުރައްވަމުން ގެންދަވާ ކަމަށް ވިދާޅުވި އެވެ.

އެއް ކަމަކަށް ފާހަގަ ކުރެއްވީ ބެންކު އޮފް މޯލްޑިވްސްއަށް ސަރުކާރުން ނުފޫޒު ފޯރުވާ ކަމަށެވެ. އެމަނިކުފާނު އެހެން ވިދާޅުވީ ބެންކުގެ ބޯޑަށް ގެނެސްފައިވާ ބަދަލުތަކަށް އިޝާރާތް ކުރައްވަ އެވެ. އަދި ބެންކުގެ ނިންމުމަކާއި ގުޅިގެން ސަރުކާރުން އެޅުއްވި ބައެއް ފިޔަވަޅުތަކަށެވެ. ރައީސް ސޯލިހް ވިދާޅުވީ މި ސަރުކާރުން ބެންކުގެ ތެރެއަށް އަތްބާނާފައިވާ ކަމަށާ އެހެން ކަމުން ބެންކުގައިވާ ރައްޔިތުންގެ ފައިސާއަށް އޮތް އިތުބާރު ގެއްލިފައިވާ ކަމަށެވެ.

"ބެންކު އޮފް މޯލްޑިވްސްގެ ތެރެއަށް އަތްބާނައިފި. އެ ބެންކުގައި ހުރި ރައްޔިތުންގެ ސޭވިންސްގ އެކައުންޓްތަކުގައި ހުރި ފައިސާއާ ދޭތެރޭގައި މިއަދު ކަށަވަރު ކަމެއް ނެތް. ނަގާ ބަހަން އެ ތައްޔާރު ވަނީ،"

އެމަނިކުފާނު ވިދާޅުވީ އިންތިހާބުތަކުގައި ވޯޓްލާ އާ ސަރުކާރެއް ރައްޔިތުން އިންތިހާބު ކުރަނީ ކުރިއަށް ވުރެ ހެޔޮ ގޮތްތަކެއް ހޯދުމަށް ނަމަވެސް އަހަރު ދުވަސްވީއިރު މި ސަރުކާރަށް -- ރައީސް މުއިއްޒަށް އޮތް އިތުބާރު ގެއްލިއްޖެ ކަމަށެވެ. ދައްޗެއް އުނދަގުލެއް ދިމާނުވާ އެކަކުވެސް ނެތް ކަމަށް ވިދާޅުވެ ރައީސް ވިދާޅުވީ ގައުމު އެންމެ މީހެއްގެ މުށުތެރެއަށް ލުމަށް މަސައްކަތް ފަށާފައިވާ ކަމަށެވެ.

އޭސީސީއާ އިލެކްޝަންސް ކޮމިޝަނަށް ނުފޫޒެއްގެ ތެރެއަށް ގެންގޮސް މަނިޓަރީ ޕޮލިސީގެ އުސޫލު ބަދަލުކޮށް މަޖިލީސް އެއްކޮށް ހިސާރުކޮށް މަޖިލީހުގައި އޮތް ރައްޔިތުންގެ ބާރު އެއްކޮށް ދުއްވާލައިފި ކަމަށެވެ. އަދި ޓޫރިޒަމް އިންޑަސްޓްރީއަށް ގެއްލުންވާނެ ހެން އަމަލު ކުރަމުންދާ ކަމަށް ވިދާޅުވި އެވެ.

ސޯލިހް ވިދާޅުވީ އެކަންކަމާއި ދެކޮޅަށް އަވަހަށް ތެދުވެ ފިޔަވަޅު އަޅަން ޖެހޭ ކަމަށެވެ. އެހެން ނޫންނަމަ ގައުމު ސަލާމަތް ނުކުރެވޭނެ ކަމަށް ވިދާޅުވި އެވެ.