ގާނޫނުއަސާސީއަށް ގެނައި ބަދަލުން ގޮނޑި ގެއްލިއްޖެނަމަ އެމްޑީޕީން ގޮނޑި ހޯދައިދޭން ވައުދުވެއްޖެ

ގާނޫނުއަސާސީއަށް ސަރުކާރުގެ ފަރާތުން ހުށަހެޅި އިސްލާހާއެކު ގެނައި ބަދަލުގެ ސަބަބުން ގޮނޑި ގެއްލޭ މެންބަރުންނަށް ބައި-އިލެކްޝަނުގައި އިިދިކޮޅު އެމްޑީޕީން ތާއީދުކުރުމަށް ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)އިން ފާސްކޮށްފި އެވެ. 

މިރޭ ކާނިވަލުގައި އެމްޑީޕީން ކުރިއަށްގެންދިޔަ އެ ޕާޓީގެ ގައުމީ މަޖިލީހުގެ ޖަލްސާއަށް އެ ގަރާރު ހުށަހެޅުއްވީ ކޮލަމާފުށީ ދާއިރާގެ ރައީސް މަހުފޫޒު ސައީދެވެ. މަހުފޫޒު ގަރާރު ހުށަހެޅުއްވުމުގެ ކުރިން ދެއްކެވި ވާހަކަފުޅުގައި ފާހަގަކުރެއްވި ގޮތުގައި މިހާރު އުފެދިފައި އޮތް ހާލަތަކީ މީގެ އެތައް އަހަރެއް ކުރިން 18 ވަނަ ރައްޔިތުންގެ މަޖިލީހުގައިވެސް އުފެދުނު ފަދަ ހާލަތެކެވެ. 

އެގޮތުން އެއިރު ރާއްޖޭގެ ބިން ވިއްކައިލެވޭ ގޮތަށް ގާނޫނުއަސާސީއަށް ބަދަލެއް ގެނައިކަމާއި، ފަހުން މަޖިލީހުގެ މެންބަރުންގެ ގޮނޑި ގެއްލޭ ގޮތަށް ގާނޫނެއްވެސް އެކުލަވައިލަައި މެންބަރުންތަކެއް ހާލުގައި ޖެއްސިކަމަށް މަހުފޫޒު ވިދާޅުވި އެވެ. އޭނާ ފާހަގަކުރެއްވީ އެއިރު އެ މެންބަރުން ހާލުގައި ޖެހުމުން އެ މެންބަރުންގެ ހައްގުގައި ވަކާލާތުކުރެއްވީ އެމްޑީޕީގެ ވަކީލުންކަމާއި، އެ މެންބަރުންގެ ހައްގުގައި އަޑުއުފުލީ އެ ޕާޓީގެ އާންމު މެންބަަރުން ކަމެވެ. 

މަހުފޫޒު ހުށަހެޅުއްވި ގަރާރުގައި ބުނެފައިވަނީ، ދިވެހި ދައުލަތުގެ ބާރުތައް ފެށެނީ އަދި ދެމިއޮންނާނީ ރައްޔިތުންގެ ކިބައިގައި ކަމަށް ގާނޫނުއަސާސީގައި ބުނެފައިވާއިރު، ގާނޫނުއަސާސީއަށް ގެނައި ބަދަލަކީ އެ މާއްދާއިން ރައްޔިތުންނަށް ލިބިދޭ ބާރު ނިގުޅައިގަންނަ އިސްލާހެއް ކަމަށެވެ. 

އިތުރަށް ގަރާރުގައި ބަޔާންކުރި ގޮތުގައި ގާނޫނުއަސާސީގެ 75 ވަނަ މާއްދާގެ ދަށުން މަޖިލީހުގެ މެންބަރުން މަސައްކަތްކުރަންޖެހެނީ ހުރިހާ ރައްޔިތުންގެ އަދި މުޅި ރާއްޖޭގެ މަސްލަހަތަށް ބަލައިގެންކަމަށްވީ ނަމަވެސް މިހާރު ގެނައި ބަދަލުގެ ސަބަބުން ރައްޔިތުންގެ މަސްލަހަތާ އެއްގޮތަށް ސިޔާސީ ޕާޓީއަކުން އަންގާ ގޮތަށް އަމަލުނުކޮށްގެން މަޖިލީހުގެ މެންބަރުންގެ މެންބަރުކަން ގެއްލިގެންދާނެ ހާލަތެއް އުފަންކުރީ އެ މާއްދާއާ ހިލާފަށެވެ. 

އަދި ގާނޫނުއަސާސީގެ 90 ވަނަ މާއްދާގައި މަޖިލީހުގައި މެންބަރަކު އަމަލަުކުރާ ގޮތަކުން ނުވަތަ ދައްކާ ވާހަކައަކާ ގުޅިގެން އެ މެންބަރަކާމެދު އެއްވެސް ތަހުގީގެއް ހިންގައިގެން ނުވާނެ ކަމަށް ބުނެފައިވީ ނަމަވެސް ގެނައި ބަދަލުގެ ސަބަބުން މަޖިލީހުގެ މެންބަރުން ރައްޔިތުންގެ މަސްލަހަތުގައި މަސައްކަތްކުރުމުގެ އިހުތިޔާރު ނިގުޅައިގަންނަ އިސްލާހެއް ކަމަށެވެ. 

އެ ކަންކަން ފާހަގަކޮށް އެ ގަރާރުގައިވަނީ އިހު އޮތް ގޮތަށް އެ އިސްލާހު ރުޖޫއަކުރަން ރައްޔިތުންގެ މަޖިލީހާއި ސަރުކާރަށް ގޮވައިލުމަށާއި، އެ މާއްދާ ރުޖޫއަކުރަންދެން ސިޔާސީ ހަރަކާތްތައް ހިންގައި ރައްޔިތުން ހޭލުންތެރިކަން އިތުރުކުރުމަށް ފުޅާ ދާއިރާއެއްގައި މަސައްކަތްކުރުމަށާއި، އެކަމުގައި ބައިވެރިވުމަށް ޕާޓީތަކާއި މަދަނީ ޖަމްއިއްޔާތަކާއި ފަރުދުންނަށް ދައުވަތުދީ، އެ ފަރާތްތަކާ ގުޅިގެން އިހުތިޖާޖުތައް ރާވައި ހިންގަން ގަރާރުގައި ހުށަހަޅާފައިވެ އެވެ. 

އަދި ރައްޔިތުންގެ މަޖިލީހުގެ މެންބަރަކު ރައްޔިތުންގެ ހައްގުގައި އަމަލުކުރި ގޮތުގެ ސަބަބުން ޕާޓީން ވަކިކޮށްފިނަމަ، ނުވަތަ އެމްޑީޕީގެ ހަރަކާތްތަކުގައި ބައިވެރިވުމަށް ޕާޓީއާ ވަކިވެގެން އެ ޕާޓީއާ ގުޅުމުގެ ސަބަބުން ގޮނޑި ގެއްލިއްޖެނަމަ އެ މެންބަރު އިންތިހާބުކުރަން މަސައްކަތްކުރަން އިގުރާރުވުމަށް ގަރާރުގައި ހުށަހަޅާފައިވެ އެވެ. 

މި ގަރާރު އެމްޑީޕީގެ ގައުމީ މަޖިލީހުގެ މިރޭގެ ޖަލްސާގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާގުން ފާސްކޮށްފައިވެ އެވެ.