ރާއްޖެއިން މަސައްކަތްކުރާނީ ޝަރަފާއި ހަމަހަމަކަމާއި އަދުލުގެ މަތީގައި މުޖުތަމައު ބިނާކުރަން: ރައީސް

ރާއްޖެއިން މަސައްކަތްކުރަމުންދަނީ އެ މުޖުތަމައެއްގެ ޑިމޮކްރަސީގެ އަސާސްތަކުގެ ގޮތުގައި ޝަރަފާއި، ހަމަކަމާއި، އަދުލުވެރިކަން އޮންނަ މުޖުތަމައެއް ބިނާކުރުމަށް ކަމުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. 

ރައީސް މިފަދައިން ވިދާޅުވީ އިންސާނީ ހައްގުތަކުގެ ދުވަހުގެ މުނާސަބަތުގައި އެކްސްގައި މިއަދު ކުރެއްވި ޕޯސްޓެއްގަ އެވެ. އެމަނިކުފާނު ފާހަގަކުރެއްވީ އެންމެންގެ ހައްގުތައް ހުރީ ލާމެހި އެކުވެ ގުޅިފައި ކަމެވެ. އަދި އަމިއްލަ ހައްގުތައް ރައްކާތެރިކުރުމަށް އެހެން މީހުންގެ ހައްގުތަކާއި މިނިވަންކަން ދިފާއުކުރުމަކީ ޒަރޫރީ ކަމެއް ކަމުގައި ފާހަގަކުރެއްވި އެވެ. 

ރައީސް ވިދާޅުވި ގޮތުގައި އެހެން މީހުންގެ ހައްގުތައް ދިފާއުކުރުމުގެ ތެރެއިން އަމިއްލަ މިނިވަންކަމާއި ހައްގުތައް ކަށަވަރުކުރުމުގެ މަބްދައަކީ މީގެ 75 އަހަރު ކުރިން ގާއިމުކުރެވުނު އދގެ އިންސާނީ ހައްގުތަކާ ބެހޭ މުއާހަދާގެ އެންމެ ފުނުގައި އޮތް މަބްދަ އެވެ. 

ދިވެހިރާއްޖޭގެ ޑިމޮކްރަސީގެ އަސާސްތަކުގެ ގޮތުގައި އިއްޒަތާއި، ހަމަހަމަކަމާއި އަދުލުވެރިކަން އޮންނަ މުޖުތަމައެއް ބިނާކުރުމަށް ރާއްޖެއިން އަބަދުވެސް މަސައްކަތްކުރާނެކަން ހާމަކުރައްވައި ރައީސް ވިދާޅުވީ މި ސަރުކާރު އޮތީ ސުލްހަވެރި ޝާމިލު މުޖުތަމައެއް އުފެއްދުމަށް އަޒުމު ކަނޑައަޅައިގެން ކަމަށެވެ. 

ސުލްހަވެރި އެންމެންގެ ބައިވެރިވުން އޮންނަ މުޖުތަމައެއް ބިނާކުރުމަށްޓަކައި އެންމެނަށް ސިއްހީ ފަރުވާއާއި ތައުލީމާއި އަދުލުވެރިކަން ލިބޭ ގޮތަށް ރާއްޖޭގެ ހާއްސަ ތަބީއަތަށް ރިއާޔަތްކޮށްގެން ސަރުކާރުން ސިޔާސަތުތަކާއި ގާނޫނުތައް އެކުލަވައިލަމުންދާކަން ރައީސް ފާހަގަކުރެއްވި އެވެ. 

"އަޅުގަނޑުމެން މިތީ ނޫސްވެރިކަމުގެ މިނިވަންކަމާއި މަސައްކަތްތެރިންގެ ހައްގުތަކާއި މިންތީގެ ހަމަހަމަކަމާއި، އަންނާން އޮތް ޖީލުތަކަށްޓަކައި ދެމެހެއްޓެނެވި ތިމާވެއްޓެއް ނަގަހައްޓައި ފޯރުކޮށްދިނުމަށް އަަޒުމް ކަނޑައަޅައިގެން،"  އިންސާނީ ހައްގުތައް ރައްކާތެރިކޮށްދެއްވާނެކަމުގެ ޔަގީންކަން ދެއްވަމުން ރައީސް ވިދާޅުވި އެވެ.