ރިސޯޓު ބެޑުނައިޓު އިތުރުވިއިރު ގެސްޓުހައުސް އަދި ހޮޓާތަކުގެ ބެޑްނައިޓު ދަށަށް

ރިސޯޓުތަކުގެ ބެޑްނައިޓްސް %3 އިތުރުވި ނަމަވެސް ހޮޓާތަކާއި ގެސްޓުހައުސްގެ ބެޑްނައިޓްސް ދަށްވުމުގެ ސަބަބުން ޖުމްލަ ބެޑްނައިޓްސްއަށް ހެޔޮ ބަދަލެއް ނާދެ އެވެ.

ވެލާނާ އިންޓަނޭޝަނަލް އެއާޕޯޓުގައި އިންޑިއާ ފަތުރުވެރިންތަކެއް، ފޮޓޯ: ސަން

ފާއިތުވި އޮކްޓޯބަރު މަހުގައި ރިސޯޓުތަކުގެ ބެޑްނައިޓްސް މަތިވި ނަމަވެސް ގެސްޓުހައުސްތަކާއި ހޮޓާތަކުގެ ބެޑްނައިޓްސް ދަށްވެފައިވާކަމަށް މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީން ބުނެފި އެވެ. 

މަރުކަޒީ ބޭންކުން މަހަކު އެއްފަހަަރު ނެރޭ އިގުތިސާދީ އަދާހަމަ ނުވަތަ އިކޮނޮމިކް އަޕްޑޭޓު ރިޕޯޓުގައި ބުނެފައިވާ ގޮތުން އޮކްޓޯބަރު 2024 ގައި 172،621 ޓޫރިސްޓުން ރާއްޖެއަށް އައިސްފައިވެ އެވެ. އެއީ 2023 ގެ އޮކްޓޯބަރާ އަޅާބަލާއިރު އަށް އިންސައްތަ އިތުރު އަދަދެކެވެ. 

ޓޫރިސްޓުން އައި މިންވަރު އިތުރުވި ނަމަވެސް ނިމުނު އަހަރާ އަޅާބަލާއިރު މި އަހަރު ބެޑްނައިޓްސް އިތުރުވެފައިނުވެ އެވެ. ބެޑްނައިޓްސް އިތުރުނުވި ސަބަބެއްގެ ގޮތުގައި އެމްއެމްއޭއިން ފާހަގަަކުރަނީ ހޮޓާތަކާއި ގެސްޓުހައުސްތަކުގެ ބެޑްނައިޓްސް ދަށްވުމެވެެ. 

އެމްއެމްއޭއިން ފާހަގަކުރި ގޮތުގައި ރިސޯޓުތަކުގެ ބެޑްނައިޓްސް އިތުރުވި ނަމަވެސް ހޮޓާތަކާއި ގެސްޓުހައުސްތަކުގެ ބެޑްނައިޓްސް ދަށްވުމުގެ ސަބަބުން ޖުމްލަ ބެޑްނައިޓްސްއަށް ކުރިއެރުމެއް އައިސްފައިނެތެވެ. 

އެގޮތުން އޮކްޓޯބަރު މަހު ރިސޯޓުތަކުގެ ބެޑްނައިޓްސް ތިން އިންސައްތަ އިތުރުވި ނަމަވެސް އެ މުއްދަތުގައި ހޮޓާތަކުގެ ބެޑްނައިޓްސް %6 އިން ދަށްވިއިރު ހޮޓާތަކުގެ ބެޑްނައިޓްސްވަނީ %41 ދަށްވެފައިކަމަށް އެމްއެމްއޭއިން ބުނެ އެވެ. 

ނަމަވެސް އަހަރުން އަހަރަށް ޓޫރިސްޓުން އައި މިންވަރު އިތުރުވެފައިވާކަން ފާހަގަކޮށް އެމްއެމްއޭއިން ބުނީ ޓޫރިސްޓުން އިތުރުވި މައިގަނޑު ސަބަބަކީ ޔޫރަޕާއި ޗައިނާއިން އައި ޓޫރިސްޓުންގެ އަދަދު އިތުރުވަމުންދިއުން ކަމަށެވެ. 

ބެޑްކެޕޭސިޓީ ދަށަށް

އެމްއެމްއޭގެ ރިޕޯޓުގައި ފާހަގަކޮށްފައިވާ އަނެއްކަމަކީ މި އަހަރުގެ އޮކްޓޯބަރު މަހު ޓޫރިޒަމް ސިނާއަތުގެ ބެޑް ކެޕޭސިޓީ ދަށްވުމެވެ. އެގޮތުން ފާއިތުވި އަހަރުގެ އޮކްޓޯބަރާ އަޅަބަލާއިރު ބެޑްކެޕޭސިޓީން 555 އެނދު އުނިވިކަން އެ ރިޕޯޓުގައި ފާހަގަކުރި އެވެ. 

ބެޑްކެޕޭސިޓީ ދަށަށްދިޔަ ނަމަވެސް އޮކިއުޕަންސީ ރޭޓަށް ބޮޑު ބަދަލެއް އައިސްފައިނުވެ އެވެ. ނިމުނު އަހަރެކޭ އެއްފަދައިން މި އަހަރުގެ އޮކްޓޯބަރުގައިވެސް އޮކިއުޕަންސީ ހުރީ 56 އިންސައްތައިގަ އެވެ. 

މުޅި އަހަރަށް ބަލާއިރު ފަތުރުވެރިން އައި މިންވަރު %10 އިތުރުވެ، ބެޑްނައިޓްސް %4 އިތުރުވި އެވެ. އަދި ފަތުރުވެރިން އެވެރެޖުކޮށް ރާއްޖޭގައި ހޭދަކުރާ ދުވަހުގެ އަދަދު 7.6 އިން 7.7 އަށް މި އަހަރު އިތުރުވެފައިވެ އެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.