އަޒާން ގޮވައިލެއްވީ އެމްޑީޕީގެ އިސްވެރިން ފުލުހަށް އަދި މަޖިލީހަށް ހާޒިރުކޮށް ތަހުގީގުކުރަން

އެމްޑީޕީގެ އިސްވެރިން މަޖިލީހަށާއި ފުލުހަށް ހާޒިރުކޮށް އެ ޕާޓީން މިރޭ ބާއްވަން އުޅޭ އެއްވުމުގައި ކުރަން އުޅޭ ކަމަކީ ކޮބައިތޯ ބެލުމަށް ތަހުގީގެއް ހިންގުމަށް އައްޑޫ ހިތަދޫ މެދު ދާއިރާގެ މެންބަރު އަހްމަދު އަޒާން ގޮވާލައްވައިފި އެވެ. 

ރައީސް ޑރ.މުހައްމަދު މުއިއްޒަށް ރާއްޖޭގެ ފުރަތަމަ ރައީސް މުހައްމަދު އަމީނަށް ހެދި ގޮތް ހެދުމަށް އެމްޑީޕީން ގޮވައިލާފައިވާތީ މިލަންދޫ ދާއިރާގެ މެންބަރު ހަސަން މުފީދު ހުށަހެޅުއްވި ކުއްލި މައްސަލައަށް ބަހުސްކުރައްވަމުން އަޒާންވަނީ ތާރީހުގައި ކަންކަން ހިނގާފައިވާ ގޮތަށް އަލިއަޅުވައިލައްވާ ވާހަކަދައްކަވާފަ އެވެ. 

އަޒާން ފާހަގަކުރެއްވި ގޮތުގައި ރައީސް އަމީން އަވަހާރަކޮށްލުމަކީ އެމަނިކުފާނު ދިވެހި ރައްޔިތުންނަށް ދެރައެއް ދެއްވައިގެން ހިނގި ކަމެއް ނޫނެވެ. އެއީ ވެރިކަމުގެ ދަހިވެތިކަމުގައި ރައްޔިތުންގެ ހިތްތަކުގައި ރުޅިވެރިކަމާއި ނަފުރަތު އުފައްދައިގެން ބަޔަކު ރައްޔިތުން ލައްވައި ހިންގުވި އަނިޔާވެރި އަމަލެއްކަން އޭނާ ފާހަގަކުރެއްވި އެވެ. 

އަޒާން އިތުރަށް ވިދާޅުވީ މިހާރު އިވެމުންދާ އަޑުތަކާއި ފެންނަ މަންޒަރުތަކަށް ބަލާއިރު އިދިކޮޅު އެންމެ ބޮޑު ޕާޓީގެ ގޮތުގައި އޮތް އެމްޑީޕީން، އެއިރު އަމީނާމެދު ހިނގި ފަދަ ކަމެއް އަލުން ހިންގުމަށް ރާވަމުންދަނީތޯ ސުވާލު އުފެދޭ ކަމަށެވެ. އަދި އެ ނިޔަތް އެ ޕާޓީގައި އޮތްކަން ނުވަތަ ނޫންކަން ބެލުމަށް ތަހުގީގެއް ކުރަންޖެހޭ ކަމަށް އަޒާން ވިދާޅުވި އެވެ. 

ރައީސް މުއިއްޒަށް އަނިޔާވެރިވުމުގެ ވާހަކަ އެމްޑީޕީގެ އެކްޓިވިސްޓުން ތަކުރާރުކޮށް ދައްކަމުން ދަނިކޮށް، އެ ޕާޓީގެ ޗެއާޕާސަން އަދި ކުރިއަށް އޮތް ރިޔާސީ އިންތިހާބުގައި އެ ޕާޓީގެ ފަރާތުން ވާދަކުރެއްވުމަށް މަސައްކަތްކުރައްވާ ފައްޔާޒު އިސްމާއީލުވެސް އެ ވާހަކަދައްކަވާފައިވާކަން ފާހަގަކުރައްވައި އަޒާން ވިދާޅުވީ އެ ވާހަކަ ދައްކަވަމުންދަނީ ޕާޓީގެ އާދައިގެ މެންބަރެއް ނޫން ކަމަށެވެ.

"އެމްޑީޕީން ވެރިކަމުގެ ދަހިވެތިކަމުގައި ހަމަ އެފަދަ ކަމެއް ކުރަން ރާވަނީ ބާއޭ އަޅުގަނޑު ހިތަށް އަރާ. ހަމަ އަސްލުވެސް އެ ބޭފުޅުން ގެނެސް ތަހުގީގުކުރަންޖެހޭ ވަރުގެ ސީރިއަސް މައްސަލައެއް މިއީ. އެމްޑީޕީގެ އެކްޓިވިސްޓުން މިވާހަކަ އެބަދައްކާ. އެމްޑީޕީގެ ޗެއާޕާސަން އަދި އެމްޑީޕީގެ ރިޔާސީ ކެންޑިޑޭޓަށްވުމަށް މަސައްކަތްކުރައްވާ ބޭފުޅަކު އެވާހަކަ ދައްކަވާ،" އަޒާން ވިދާޅުވި އެވެ. 

އަޒާން އިތުރަށް ވިދާޅުވީ އެމްޑީޕީއަކީ އަނިޔާވެރި މާޒީއެއް އޮތް ހަރުކަށި ފިކުރުގެ ޕާޓީއެއް ކަމަށެވެ. އެގޮތުން އެ ޕާޓީގެ ފުރަތަމަ ވެރިކަން ނިމުމަށްފަހު ރާއްޖޭގެ ބައެއް ސިޔާސީ ލީޑަރުން ދަންޖައްސައި މެރުމަށް ގޮވައިލިކަމަށާއި، އަދި އޭގެ ފަހުން ރައްޔިތުންގެ މުދަލާއި ފުރާނައަށް އެތައް ގެއްލުމެއް ދީ ޓެރަރިޒަމުގެ އެތައް އަމަލެއް އެ ޕާޓީން ހިންގާފައިވާކަމަށް އަޒާން ވިދާޅުވި އެވެ. 

މިރޭ ކާނިވާ ސަރަހައްދުގައި އެމްޑީޕީން ބާއްވަން އުޅޭ އެއްވުމުގައި އެ ޕާޓީގެ ގައުމީ މަޖިލީހުގެ ބައްދަލުވުމެއް ބާއްވަން އުޅޭކަމުގެ އަޑުތައް ފެތުރިފައިވާއިރު އާންމުކޮށް އެ ޕާޓީން ހިންގާފައިވާ އަނިޔާވެރިކަމުގެ އަމަލުތައް ފަށައިގަންނަނީ ގައުމީ މަޖިލީހުގެ ބައްދަލުވުމަކަށްފަހުކަން ފާހަގަކުރައްވައި އަޒާން ވިދާޅުވީ މި ބައްދަލުވުމުގައި އެޕާޓީން ކުރަން އުޅޭކަމެއް އޮޅުންފިލުވުމަށް ޕާޓީގެ އިސްވެރިން މަޖިލީހަށް އަދި ފުލުހަށްވެސް ހާޒިރުކުރަންޖެހޭ ކަމަށެވެ.