ދައުލަތަށް ލިބެންޖެހި ނުލިބި ހުރި ފައިސާގެ އަދަދު 17 ބިލިއަނަށް އަރައިފި

ޓެކުހާއި އެނޫން ގޮތްގޮތުން ދައުލަތަށް އެކި ފަރާތްތަކުން ދައްކަންޖެހޭ ފައިސާގެ ތެރެއިން ދައުލަތަށް ނުލިބި ހުރި ފައިސާގެ ޖުމްލަ އަދަދު 17 ބިލިއަން ރުފިޔާއަށް އަރާފައިވާކަމަށް މޯލްޑިވްސް އިންލެންޑް ރެވެނިއު އޮތޯރިޓީން ބުނެފި އެވެ. 

ދައުލަތުގެ އާމްދަނީ އެއްކުރުމުގެ މަސައްކަތް ގާނޫނުން މަތިކޮށްފަައިވާ މީރާއިން މިފަދައިން ބުނީ މިއަދު މަޖިލީހުގެ އިގުތިސާދީ ކޮމިޓީގެ ބައްދަލުވުމެއްގައި އެ އޮތޯރިޓީގެ 2022 އަދި 2023 ވަނަ އަހަރުގެ އަހަރީ ރިޕޯޓާ ގުޅިގެން ބައެއް މެންބަރުން ކުރެއްވި ސުވާލުތަކަށް ޖަވާބުދެމުންނެވެ. 

ކޮމިޝަނާ ޖެނެރަލް އޮފް ޓެކްސޭޝަން ހަސަން ޒަރީރު ވިދާޅުވެފައިވަނީ ދައުލަތަށް ލިބެންޖެހޭ ގިނަ އަދަދެއްގެ ފައިސާ ނުލިބި އޮތުމަކީ ވަރަށް ބޮޑު ކަންބޮޑުވުމެއް ކަމަށެވެ. އަދި އެގޮތަށް ނުލިބި ހުރި ފައިސާގެ އަދަދު އަހަރުން އަހަރަށް އިތުރުވަމުންދާތީ އެކަމަށް ހައްލުތަކެއް ހޯއްދަވަން މަސައްކަތް ކުރައްވަމުންދާ ކަމަށް ޒަރީރު ވިދާޅުވި އެވެ. 

ޒަރީރު އިތުރަށް ފާހަގަކުރެއްވި ގޮތުގައި ފާއިތުވި އަހަރުތަކުގައި މީރާއަށް ލިބެންޖެހި ނުލިބި ހުރި ފައިސާގެ އަދަދު އިތުރުވުމުގެ މައިގަނޑު އެއް ސަބަބަކީ ކުރީ ސަރުކާރުން ކޮވިޑާ ގުޅިގެން ވިޔަފާރިތަކަށް ދީފައި ހުރި ލުއިތައް ކަމެވެ. 

މަގާމާ ހަވާލުވެވަޑައިގެން މިފަދައިން ނުލިބި ހުރި ފައިސާ ހޯއްދެވުމަށް ކުރެވި މަސައްކަތްޕުޅަށް އަލިއަޅުއްވައިލައްވަމުން ޒަރީރު ވިދާޅުވީ އެއިރު ފައިސާ ދައްކަންޖެހިފައި ތިބި ފަރާތްތަކުގެ ތެރެއިން އެންމެ ބޮޑެތި އަދަދުތަކުން ފައިސާ ދައްކަންޖެހިފައިވާ 80 ފަރާތާ ބައްދަލުކުރައްވައި، ފައިސާ ދެއްކޭނެ ގޮތަކާމެދު މަޝްވަރާކުރައްވައި 57 ފަރާތަކަށް ބަހާލައިގެން ފައިސާ ދެއްކުމުގެ ފުރުސަތު ދެއްވި ކަމަށެވެ. 

ނުލިބި ހުރި ފައިސާގެ ތަފުސީލުތަކަށް ބައްލަވައިލައްވަމުން ޒަރީރު ވިދާޅުވީ ޓެކުސްގެ ގޮތުގައި 6.2 ބިލިއަން ރުފިޔާ ނުލިބި އޮތްއިރު ޖޫރިމަނާތަކާއެކު އެ އަދަދު 8.2 ބިލިއަނަށް އަރާ ކަމަށެވެ. އަދި ޓެކުސް ނޫން އެހެނިހެން ގޮތް ގޮތުން ލިބެންޖެހޭ އާމްދަނީގެ ތެރެއިން 4.6 ބިލިއަން އަދި ޖޫރިމަނާތަކާއެކު 8.7 ބިލިއަނަށް އަރާނެ ކަމަށެވެ. 

ޒަރީރު ފާހަގަކުރެއްވި ގޮތުގައި ޓެކުހުގެ ގޮތުގައި ނުލިބި ހުރި ފައިސާއާއި ޓެކުސް ނޫން ގޮތް ގޮތުން ދައުލަތަށް ލިބެންޖެހޭ ފައިސާގެ ތެރެއިން ނުދީ ހުރި ފައިސާގެ އަދަދު އެއްކޮށްލުމުން 17 ބިލިއަން ރުފިޔާއަށް އަރަ އެވެ. 

ޒަރީރު ވިދާޅުވީ މިހާ ބޮޑަށް ފައިސާ ނުދައްކާ މިންވަރު އިތުރުވަނީ ގާނޫނަށް ތަބާވާ މިންވަރު ނުވަތަ ކޮމްޕްލައަންސް ދަށްވުމުން ކަމަށެވެ. އެގޮތުން ޓެކުހާއި އެނޫން ފީތަކާއި ކުލި ފަދަ ކަންކަމަށް ރަޖިސްޓްރީކޮށްފައިވާ ފަރާތްތަކުގެ ތެރެއިން ފައިސާ ނުދައްކާ ފަރާތްތަކުގެ އަދަދު 30 އިންސައްތައަށް އަރާކަމަށް ވިދާޅުވި އެވެ. 

ކޮމިޝަނާ ޖެނެރަލް ފާހަގަކުރެއްވި ގޮތުގައި މައްސަލަ ހައްލުކުރެއްވުމަށް މީރާގެ ބައެއް އިދާރީ އިންތިޒާމުތަކަށްވެސް ބަދަލުތަކެއް ގެންނަވަން މިހާރު ނިންމާފައިވާ ކަމަށެވެ. އެގޮތުން ފައިސާ ނުދައްކާ ފަރާތަކާމެދު ފިޔަވަޅެއް އެޅުމަށް 100 ދުވަސް ނަގާތީ، ކުރިން ދެމުން އައި 30 ދުވަަހުގެ ނޯޓިސްތައް 15 ދުވަހުގެ ދެ ނޯޓިސްއަށް ބަދަލުކޮށް އެ ނޯޓިސްތަކަށްފަހު ފިޔަވަޅުއެޅޭނެ ގޮތް ހަމަޖައްސާފައިވާ ކަމަށެވެ.

ޒަރީރު ވިދާޅުވީ އޭނާ މަގާމާ ހަވާލުވެވަޑައިގެން މިހާތަނަށް ތިން މަސް ތެރޭގައި 20،000 ނޯޓު ފޮނުވައި، 2،700 ފަރާތަށް މީރާއިން ގުޅައިގެން ފައިސާ ދެއްކޭނެ ގޮތް ފަހިކުރަން މަސައްކަތްކޮށްފަައިވާ ކަމަށާއި، އެ އިދާރާއިން 80،000 އަށްވުރެ ގިނަ މެސެޖު ފޮނުވާފައިވާ ކަމަށެވެ. 

ކުރިން ފައިސާ ނުދައްކައި ހުރި ފަރާތްތަކުގެ އަތުން ފާއިތުވި ފަސް މަހުގެ ތެރޭގައި ދެ ބިލިއަނެއްހައި ރުފިޔާ މީރާއަށް ހޯދިފައިވާކަމަށްވެސް ޒަރީޒު ވިދާޅުވި އެވެ.