ބެކްލޮގު ސާފުކޮށް ބީއެމްއެލް އެކައުންޓު ހުރި މަސް ދޯނިތަކަށް 48 ގަޑިއިރު ތެރޭ ފައިސާ ދެނީ

މިފްކޯއިން މަސްވެރިންނަށް ނުދެވި ހުރި ފައިސާގެ ތެރެއިން މިހާރު ދޭންޖެހިފައި ހުރިހާ ފއިސާއެއް މިއަދު އޮޑިވެރިންގެ އެކައުންޓުތަކަށް ޖަމާކުރުމާއެކު، މާދަމައިން ފެށިގެން ބީއެމްއެލްގައި އެކައުންޓު ހުންނަ އޮޑިފަހަރަށް 48 ގަޑިއިރު ތެރޭގައި ފައިސާ ލިބޭނެ އިންތިޒާމު ހަމަޖައްސައިފި އެވެ. 

މާލެ އަތޮޅުގެ އެންމެ މަސްވެރި އެއް ރަށްކަމަށްވާ ކ.ގާފަރުގައި މިއަދު އެ ރަށު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ އެމަަނިކުފާނު ވެރިކަމާ ހަވާލުވެވަޑައިގެންނެވިއިރު މަސްވެރިކަމުގެ ސިނާއަތް އޮތީ ވަރަށް ނާޒުކު ހާލަތެއްގަައި ކަމަށެވެ. އެގޮތުން ހަމައެކަނި މަސްވެރިންނަށް ދޭންޖެހޭ ފައިސާއަށް ބަލާއިރުވެސް 250 މިލިއަނެއްހައި ރުފިޔާ ނުދެވިހުރިކަން ރައީސް ފާހަގަކުރެއްވި އެވެ. 

އެ ފައިސާ ދިނުމާއެކު، ލަސްވި ނަމަވެސް މި ސަރުކާރުން އައީ މަސްވެރިންނަށް ފައިސާ ދޫކުރަމުންކަން ފާހަގަކުރައްވައި ރައީސް ވިދާޅުވީ މިހާތަނަށް ކްރެޑިޓަށް ދޫކުރި ޑީސަލާއެކު ޖުމްލަ އެއް ބިލިއަނަށްވުރެ ގިނަ ރުފިޔާ ސަރުކާރުން މަސްވެރިންނަށް ދޫކޮށްފައިވާ ކަމަށެވެ. އެއީ އެމަނިކުފާނު ވައުދުވެވަޑައިގެންނެވި ގޮތް ނޫންކަން ގަބޫލުކުރައްވާކަމަށާއި، ވައުދުފުޅަކީ 48 ގަޑިއިރު ތެރޭ ފައިސާ ދޫކުރުންކަން ހަނދުމަފުޅުހުރިކަމަށާއި މަސައްކަތްކުރައްވަނީ އެ ވައުދު ފުއްދަވަންކަމަށް ރައީސް ވިދާޅުވި އެވެ. 

ރައީސް އިތުރަށް ވިދާޅުވީ އެ ވައުދު ފުއްދެވުމަކީ ހާލަތު އޮތް ގޮތުން ވެރިކަމާ ހަވާލުވެވަޑައިގަންނަވާތާ ދެވަނައަށްވާ ދުވަހު ކުރެވެން އޮތް ކަމެއް ނޫންކަމަށާއި، އެކަމަށް ވަގުތު ނަގާނެ ކަމަށެވެ. އެގޮތުން މިފްކޯއަށްވެސް ބޮޑެތި އިސްލާހީ ބަދަލުތަކެއް ގެންނަންޖެހިފައި އޮތްކަން ރައީސް ފާހަގަކުރެއްވި އެވެ. އެމަނިކުފާނު ވިދާޅުވި ގޮތުގައި އެ ކުންފުނީގެ އިދާރީ އިންތިޒާމުތައްވެސް ހުރީ އެންމެ ރަނގަޅަކަށް ނޫނެވެ. 

މިހާރު ސަރުކާރުން ކުރަމުން އައި މަސައްކަތްތަކާއެކު މިއަދު ފާއިތުވި ހަފުތާތަކުގައި މަސްވެރިން ކިރުވި މަހަށް ނުދީ ހުރި ފައިސާ މިއަދު ޖަމާކޮށްދެވިފައިވާކަމަށް ރައީސް ވިދާޅުވި އެވެ. އެގޮތުން ފާއިތުވި ދެ ހަފުތާއަށް ދޫކުރަންޖެހިފައި ހުރި 38 މިލިއަން ރުފިޔާ މިހާރު ދޫކޮށްފައިވާކަން ރައީސް އިއުލާނުކުރެއްވި އެވެ. 

"އެންމެ ފަހުން މިދިޔަ 14 ދުވަަހުގެ ތެރޭގައި ގާތްގަނޑަކަށް 38 މިލިއަން ރުފިޔާ ހުރި ޕެންޑިންގައި މަސްވެރިންނަށް ދޭން. އެ 38 މިލިއަން ރުފިޔާ ދާދި ދެންމެއަކުވަނީ އޮޑިވެރިންނަށް ޖަަމާކޮށްދެވިފައި،" ރައީސް ވިދާޅުވި އެވެ. 

ރައީސް ވިދާޅުވީ މިއަދު ފައިސާ ދޫކުރެވުމާއެކު މަސްވެރިންނަށް ފައިސާ ދޫކުރުމުގައި އޮތް ބެކްލޮގު ސާފުކޮށް މަސްވެރިންނަށް ދޭންޖެހޭ ފައިސާ ދީ ހަލާސްކުރެވުނީ ކަމަށެވެ. އަދި ކުރިއަށް އޮތް ތަނުގައި މަސްވެރިންނަށް ފައިސާ ނުދެވި ލަސްވުމުގެ ސަބަބުން ބެކްލޮގެއް ނުއުފެދޭނެކަމުގެ ޔަގީންކަން ރައީސް ދެއްވި އެވެ. 

އެމަނިކުފާނު އިތުރަށް ވިދާޅުވީ މަސްވެރިންނަށް ފައިސާ ދޫކުރުމާ ގުޅޭ ގޮތުން މިނިސްޓްރީ އޮފް ފިނޭންސްއާއި މިފްކޯ އަދި ބޭންކް އޮފް މޯލްޑިވްސްގެ މެދުގައި މުހިއްމު އެއްބަސްވުމެއް ގާއިމުކުރެވިފައިވާ ކަމަށެވެ. އެ އެއްބަސްވުމުގެ ދަށުން ބީއެމްއެލްގައި އެކައުންޓު ހުންނަ ދޯނިފަހަރަށް 48 ގަޑިއިރުގެ ތެރޭގައި ފައިސާ ލިބޭނެ އިންތިޒާމު ހަމަޖެހިފައިވާކަމަށް ރައީސް ވިދާޅުވި އެވެ. 

އެކަމުގައި ބީއެމްއެލްއިން ވެދިން އެހީތެރިކަން ފާހަގަކުރައްވައި ރައީސްވަނީ ބޭންކުން އަންނަނީ އެއީ ރައްޔިތުންގެ ބޭންކެއްކަން ސާބިތުކޮށްދެމުން ކަމަށް ވިދާޅުވެ ބޭންކަށް އެމަނިކުފާނުވަނީ ވަރަށް ބޮޑަށް ޝުކުރު އަދާކުރައްވާފަ އެވެ. 

"މާދަމައިން ފެށިގެން ބީއެމްއެލްގައި އެކައުންޓެއް އޮވެއްޖެނަމަ ކޮންމެ ދޯންޏަކުން މަސްކިރާތާ 48 ގަޑިއިރު ތެރޭގައި އެ ދޯނީގެ އެކައުންޓަށް ފައިސާ ޖަމާވަމުންދާނެ،" ރައީސް ވިދާޅުވި އެވެ.