އަސަދުގެ ވެރިކަން ނިމުމަކަށް އައުމުން އެމެރިކާއަށް ސިހުމެއް

ސޫރިޔާގެ އިދިކޮޅު ފަރާތްތަކުން ކުއްލި ހަލުއި ހަމަލާއެއްގައި އެ ގައުމުގެ މުހިއްމު ޝަހަރުތަކުގެ މައްޗަށް ވެރިވެގަނެ، ސަރުކާރު ވައްޓައިލާ އެ ގައުމުގެ ވެރިރަށް ދިމިޝްގު އަތުލައިގަނެ، ރައީސް ބައްޝާރުލް އަސަދު ގައުމު ދޫކުރައްވައި ވަޑައިގަތުމާއެކު، އެ ގައުމުގެ މުސްތަގުބަލު ވަރަށް ބޮޑަށް ބަދަލުވެފައިވެ އެވެ. 

އެތައް އަހަރުތަކަށް ދިގުލައިގެންގޮސްފައިވާ ސޫރިޔާގެ އަހުލީ ހަނގުރާމަ މަޑުޖެހިފައި އޮތުމަށްފަހު ކުއްލި ގޮތަކަށް އައި ބޮޑު ބަދަލަކީ، އެމެރިކާގެ ރައީސް ޖޯ ބައިޑެންގެ ސަރުކާރަށް އަންދާޒާކުރެވިފައި ނެތް ހާލަތެއްކަމަށް މުހައްލިލުންނާ ހަވާލާދީ ބައެއް މީޑިޔާއިން ރިޕޯޓުކޮށްފި އެވެ. އަދި އެއާައެކު ކުރިއަށް އޮތް ހަފުތާތަކުގައި އެމެރިކާއިން ސޫރިޔާއާ ގުޅިގެން އަޅާނެ ފިޔަވަޅުތަކާމެދު ސުވާލުތައްވަނީ އުފެދިފަ އެވެ. 

ވޮޝިންޓަނުގައި މަރުކަޒުވެފައިވާ އެޓްލާންޓިކް ކައުންސިލުގެ ސީނިއާ ފެލޯ ގުތައިބާ އިދްލިބީ ވިދާޅުވެފައިވަނީ، މިހާރު ސޫރިޔާގައި ހިނގަމުންދާ ކަަންކަމުން އެމެރިކާ ސަރުކާރަށް ސިހުމެއް ލިބުނު ކަމަށާއި، އަދި ސޫރިޔާގެ ކަންކަން ދިރާސާކުރާ ފަރާތްތައް ތިބީ އެމެރިކާއިން އަޅާނެ ފިޔަވަޅެއް ނޭނގިފައި ކަމަށެވެ. 

"ބައިޑެން ސަރުކާރުން ޖެހޭނެ ސޫރިޔާއާމެދު މިހާތަނަށް ގެންގުޅެމުން އައި ސިޔާސަތު އަލުން މުރާޖައާކޮށް އެކުލަވައިލަން.،" އިދްލިބީ ވިދާޅުވި އެވެ. އެހެންނަމަވެސް މި ވަގުތަކީ އެމެރިކާގެ ވެރިކަމުގެ ބާރުތައް ބައިޑެންގެ އަތްޕުޅުން އިންތިހާބީ ރައީސް ޑޮނާލްޑް ޓުރަމްޕުގެ އަތްޕުޅަށް ބަދަލުވުމުގެ މަރުހަލާ ހިނގަމުން އަންނަ ވަގުތުކަމުން މިވަގުތު ފިޔަވަޅުތައް އެޅުމަށް ބައިޑަންއަށް ދަތިތަކެއް ހުންނާނެކަން އިދްލިބީ ފާހަގަކުރެއްވި އެވެ. 

"ބިމުގައި ކަންކަން ބަދަލުވަމުންދަނީ އެމެރިކާ ސަރުކާރަށް އެކަންކަމާ ފައިހަމަކޮށް ފިޔަވަޅުއެޅޭ މިންވަރަށްވުރެ މާ ހަލުއިކޮށް،" އިދްލިބީ އިތުރަށް ވިދާޅުވި އެވެ. 

އިދިކޮޅު ހަޔާތު ތަހްރީރް އައްޝާމް (އެޗްޓީއެސް)ގެ ހަނގުރާމަވެރިން ދިމިޝްގަށް ވަދެގަނެ އެ ޝަހަރު އެމީހުންގެ އަތް ދަށަށް ގެނައުމާއި، ރައީސް ބައްޝާރު ގައުމު ދޫކުރައްވައި ފިއްލެވިތާ ގަޑިއިރުތަކެއް ފަހުން އާދީއްތަދުވަހު މީޑިޔާއާ ވާހަކަދައްކަވަމުން ބައިޑަން ވިދާޅުވީ އެ ބަދަލަކީ ތާރީހީ ފުރުސަތެއް ކަމަށާއި ނަމަވެސް ހިރާސްތަކާއި މުސްތަގުބަލާމެދު ޔަގީންކަމެއް ނެތުމުގެ މައްސަލަތައް ފެންމަތިވާނެ ކަމަށެވެ. 

ބައިޑަން ވިދާޅުވީ ބައްޝާރުގެ ވެރިކަން ނިމުމަކަށް އައީ އެމެރިކާއިން އިސްރާއީލުން ޣައްޒާގައި ކުރަމުންދާ ހަނގުރާމައާއި ހިޒްބުﷲއާ ދެކޮޅަށް ކުރި ހަނގުރާމައިގައި ފޯރުކޮށްދިން އެހީތެރިކަމާއި، އިރާގާއި ސޫރިޔާގައި ހަރަކާތްތެރިވާ ގުރޫޕުތަކަށް ދިން މަދަދުގެ ސަބަބުން ބައްޝާރުގެ އެންމެ ގާތް މަދަދުވެރިޔާ އީރާން ބަލިކަށިވުމުން ކަމށެވެ. 

އޭގެ އިތުރަށް ރަޝިޔާއާ ދެކޮޅަށް ޔޫކުރެއިނަށް އެމެރިކާއިން ދެމުން އައި މަދަދުގެ ސަބަބުން ބައްޝާރުގެ ހިމާޔަތުގައި ކަމެއް ކުރާނެ ވަސީލަތާއި ގާބިލުކަން ރަޝިޔާގައި ނެތިވުމަކީވެސް ބައްޝާރުގެ ވެރިކަން ވެއްޓުމަށް މެދުވެރިވި ސަބަބެއްގެ ގޮތުގައި ބައިޑެން ފާހަގަކުރެއްވި އެވެ. 

"މިހުރިހާ ކަމެއް ނަތީޖާއަކީ ފުރަތަމަ ފަހަރަށް، ރަޝިޔާއަށް އަދީ އީރާނާއި ހިޒްބުﷲއަށްވެސް ބައްޝާރުގެ އަނިޔާވެރި ވެރިކަން ދިފާއުކުރަން އެހީތެރިވުމުގެ ފުރުސަތަު ނުލިބުން،" ބައިޑެން ވިދާޅުވި އެވެ. 

ބައްޝާރުގެ ވެރިކަން ނިމުމަކަށް ގެނައުމުގައި ބައިވެރިވި ގުރޫޕުތަކުގެ ތެރޭގައި ޓެރަރިޒަމުގެ ރެކޯޑު އޮތް ގުރޫޕުތައް ހިމެނޭކަން ފާހަގަކުރައްވައި ބައިޑަން ވިދާޅުވީ އައިސިސްއާ ދެކޮޅަށް ކުރުދީން ކުރާ ހަނގުރާމައިގަ އެހީތެރިވުމަށް ސޫރިޔާގެ އުތުރުއިރުމަތީގައި ތިބި އެމެރިކާގެ 900 އެއްހައި ސިފައިން އެ ސަރަހައްދުގައި ދެމިތިބޭނެ ކަމަށެވެ.