ޖުމްލަ ރިޒާވް 744.25 މިލިއަނަށް | ބޭނުންކުރެވޭ ރިޒާވްގަ 46 މިލިއަން ޑޮލަރު

ރާއްޖޭގެ ބޭރު ފައިސާގެ ޖުމްލަ ރިޒާވް 744.25 މިލިއަނަށް އަރައި ބޭނުންކުރެވޭ ރިޒާވް 46.25 މިލިއަން ޑޮލަރަށް އަރައިފި އެވެ. 

ރަސްމީ ރިޒާވް އެސެޓުތަކުގެ ގޮތުގައި ނޮވެންބަރު މަހުގެ ނިޔަލަށް ހުރީ 616.17 މިލިއަން ޑޮލަރެެވެ. މިއީ ބޭރުގެ ބޭންކުތަކުގައި ހުރި އަދަދުތަކާއެކު ބޭރު ފައިސާގެ ރަސްމީ ރިޒާވް އެސެޓުގެ ގޮތުގައި އެމްއެމްއޭއިން ހިސާބުކުރާ އަދަދެވެ. 

ނަމަވެސް ރަސްމީ ރިޒާވް އެސެޓުގެ ބޭރުން "އަދަ ފޮރިން ކަރަންސީ އެސެޓު"ގެ ގޮތުގައި ޖުމްލަ 128.08 މިލިއަން ޑޮލަރު ހުރިކަން އެމްއެމްއޭގެ ޑާޓާއިން ދައްކަ އެވެ. އެއީ ރަސްމީ ރިޒާވް އެސެޓުގެ ތެރޭގައި ނުހިމެނޭ ސެކިއުރިޓީސްގެ ގޮތުގައި ރެކޯޑުކުރެވިފައިވާ 2.39 މިލިއަން ޑޮލަރާއި ރާއްޖޭގެ ބޭންކުތަކުގައި އިންވެސްޓުކޮށްފައި ހުރި 125.69 މިލިއަން ޑޮލަރެވެ. 

ރާއްޖޭގެ ބޭންކުތަކުގައި އެމްއެމްއޭއިން އިންވެސްޓުކޮށްފައި ހުރި ބޭރު ފައިސާއަކީ ބޭނުންޖެހިއްޖެ ހާލަތެއްގަައި ބޭންކަށް ބޭނުންކުރެވޭ ގޮތަށް ހުންނަ ފައިސާއެވެ. އެމްއެމްއޭއިން އަމަލުކުރަމުން އަންނަ އުސޫލަކީ ޖުމްލަ ރިޒާވް ގުނުމުގައި އޮފިޝަލް ރިޒާވް އެސެޓުތަކާއި އަދަ ރިޒާވް އެސެޓުތައް އެއްކޮށް ގުނުމެވެ. 

އޮފިޝަލް ރިޒާވް އެސެޓުތަކާއި އަދާ ރިޒާވް އެސެޓުތައް އެއްކޮށްލުމުން ޖުމްލަ ރިޒާވްއަކީ 744.25 މިލިއަން ޑޮލަރެވެ. އެއިން ބޭނުންކުރެވޭ ރިޒާވްގެ ގޮތުގައި ހުންނާނީ 46.25 މިލިއަން ޑޮލަރެވެ. 

ބޭނުންކުރެވޭ ރިޒާވް އެސެޓުގެ އަދަދު ބަލަނީ "ޕްރިޑިޓަމައިންޑް ޝޯޓް-ޓާމް ނެޓް ޑްރެއިންސް" ނުވަތަ ކުރިއަށް އޮތް 12 މަސްދުވަހުގެ ތެރޭގައި ބޭރު ފައިސާއިން އަދާކުރަންޖެހޭ އަގުދީ (ކޮންޓްރެކްޗުއަލް) އިލްތިޒާމުތައް ޖުމްލަ ރިޒާވްއިން އުނިކޮށްގެންނެވެ. އެފަދަ އިލްތިޒާމުގެ ގޮތުގައި 698.53 މިލިއަން ޑޮލަރު ރެކޯޑުކުރެވިފައިވެ އެވެ. 

އެމްއެމްއޭއިންވަނީ އިންޑިޔާގެ މަރުކަޒީ ބޭންކު ރިޒާވް ބޭންކް އޮފް އިންޑިޔާއާއެކު 400 މިލިއަން ޑޮލަރުގެ ކަރަންސީ ސްވޮޕެއް ހަދާފަ އެވެ. ރިޒާވްގެ ހާލަތު މިހާރު ރަނގަޅުވި މައިގަނޑު ސަބަބަކީ ކަރަންސީ ސްވޮޕުގެ ފައިސާ ލިބުމެވެ. އެ ފައިސާއަކީ ބޭންކުތަކަށް ބޭރު ފައިސާއިން މުއާމަލާތްކުރަން ބޭނުންވާ ޑޮލަރު ދޫކުރުމަށް އެމްއެމްއޭއިން ބޭނުންކުރާ ފައިސާ އެވެ.

ޑޮލަރުގެ ކަރަންސީ ސްވޮޕުގެ އިތުރަށް އެމްއެމްއޭއިންވަނީ 30 ބިލިއަން ރުޕީސްގެ ކަރަންސީ ސްވޮޕެއް އިންޑިޔާގެ ރިޒާވް ބޭންކާއެކު ހަދާފަ އެވެ. މިއީ ދެ ގައުމުގެ މެދުގައި ދެ ގައުމުގެ ފައިސާއިން ވިޔަފާރިކުރުމަށް މަގުފަހިކުރަން ހަދާފައިވާ ކަރަންސީ ސްވޮޕެކެވެ.

ކަރަންސީ ސްވޮޕުގެ އިތުރުން ރިޒާވްއަށް އޮތް ފިއްތުން ވަގުތީ ގޮތުން ކުޑަވީ ނަމަވެސް އެމްއެމްއޭގެ ރެގިއުލޭޓަރީ އޮނިގަނޑަށް ގެނައި ބަދަލުތަކުގެ ތެރެއިން ބޭންކުތަކަށް ޓޫރިޒަމް ވިޔަފާރިތަކަށް ލިބޭ ބޭރު ފައިސާއިން މާރުކުރާ މިންވަރުގެ ތެރެއިން އެމްއެމްއޭއަށް ލިބޭ ފައިސާއާއެކު ރިޒާވްއަށް ދާއިމީ ހައްލެއް ލިބޭނެ އެވެ.