ބައްޝާރުގެ ވެރިކަން ނިމުމަކަށް؛ ދިމިޝްގު އިދިކޮޅުގެ ބާރުގެ ދަށަށް

އިދިކޮޅު ބާރުތަކުން ސޫރިޔާގެ ވެރިރަށް ދިމިޝްގު ހިފުމާއެކު އެ ގައުމުގެ ރައީސް ބައްޝާރުލް އަސަދު އެ ޝަހަރު ދޫކުރައްވައި އެހެން ތަނަކަށް ފިއްލަވައިގެން ވަޑައިގެންފިކަމަށް ބައިނަލްއަގުވާމީ މީޑިޔާއިން ރިޕޯޓުކޮށްފި އެވެ. 

އިދިކޮޅު ހަނގުރާމަވެރިން ދިމިޝްގުގެ އެންމެ ފުނަށް ވާސިލުވެފައިވާއިރު، ގިނަ އަދަދެއްގެ ރައްޔިތުންވަނީ މަގުތަކަށް ނިކުމެ އުފާ ފާޅުކުރަން ފަށާފަ އެވެ. އަދި މިނިވަންކަމުގެ އައު ޒަމާނެއް ސޫރިޔާއަށް އައިސްފައިވާކަން އިއުލާނުކޮށް، ބޭރުގައި ތިބި ސޫރިޔާ ރައްޔިތުން އަނބުރާ ގައުމަށް އައުމަށް އިދިކޮޅުންވަނީ ދައުވަތު ދީފަ އެވެ. 

ސޫރިޔާގެ އިދިކޮޅު ސިޔާސީ ކޯލިޝަނުގެ އިސްވެރިޔާގެ ގޮތުގައި މަސައްކަތްކުރައްވާ ހާދީ އަލްބަހްރާވަނީ ދިމިޝްގު އަލްއަސަދުގެ ކިބައިން މިނިވަންވެފައިވާކަމަށް ވިދާޅުވެ، ސޫރިޔާގެ ރައްޔިތުންނަށް މަރުހަބާ ވިދާޅުވެފަ އެވެ. 

ސޫރިޔާގެ ބޮޑުވަޒީރު މުހައްމަދު ޣާޒީ އަލްޖަލާލީ ވިދާޅުވެފައިވަނީ އޭނާ ހުންނެވީ ގެކޮޅުގައި ކަމަށާއި، ހުންނެވީ އިދިކޮޅާއެކު މަސައްކަތްކުރައްވަން ތައްޔާރަށް ކަމުގަ އެވެ. އަދި އޭނާ ބޭނުންފުޅުވަނީ އާންމު މުއައްސަސާތައް ރަނގަޅަށް ހިނގާކަން ކަށަވަރުކުރެއްވުންކަމަށްވެސް ވިދާޅުވި އެވެ. 

އެއާއެކު އިދިކޮޅު ހަނގުރާމަވެރިންގެ އެންމެ ބޮޑު ޖަމާއަތްކަމަށްވާ ހަޔާތު ތަހުރީރު އައްޝާމްގެ ލީޑަރު އަބޫ މުހައްމަދު އަލްޖުލައިނީވަނީ އެއްވެސް އާންމު މުއައްސަސާއަކަށް އަދި އާންމު ހިދުމަތްތަކަށް ގެއްލުން ލިބޭނެ އަމަލުތައް ނުހިންގުމަށް ހަނގުރާމަވެރިންނަށް އަންގާފަ އެވެ. 

ސޫރިޔާގައި ތިބި ބައިނަލްއަގުވާމީ ނޫސްވެރިން ރިޕޯޓުކުރި ގޮތުގައި ގިނަ އަދަދެއްގެ އާންމުންވަނީ މަގުތަަކަށް ނުކުމެ ބައްޝާރުލް އަސަދާއި އޭނާގެ ބައްޕާފުޅު ހާފިޒުލް އަސަދުގެ ބައި ގަރުނަށްވުރެ ދިގު ވެރިކަން ނިމުމަކަށް އައުމާ ގުޅިގެން އުފާ ފާޅުކޮށް މިނިވަންކަން ލިބުނީތީ ޝުކުރު އަަދާކޮށްފަ އެވެ.