ފެނަކައިގެ ހަރަދުތައް ކުޑަކޮށްގެން އެކަނި ކުންފުނި ސަލާމަތްކުރެވޭކަށް ނެތް: މުޢާޒު

ފެނަކަ ވެއްޓިފައިވާ މާލީ ފުންވަޅުގަނޑުގެ އަޑިގުޑަން ދައުލަތުގެ މީޑިޔާއާއި ހިއްސާކުރައްވާ، ފެނަކައިގެ މެނޭޖިންގ ޑިރެކްޓަރ މުޢާޒް މުޙައްމަދު ރަޝީދު ވިދާޅުވީ މިއަދު ފެނަކަ އޮތީ ހަމައެކަނި ކުންފުނިން ކުރާ ހަރަދުތައް މަދުކޮށްލައިގެން އަރައިގަނެވޭނެ ވަރަށްވުރެން މާ ނާޒުކު ހާލަތެއްގައި ކަމަށެވެ. ހަމައެފަދައިން ކުންފުނިން ދެމުން އަންނަ ހިދުމަތްތަކަކީ އެއްވެސް ހާލެއްގައި ހުއްޓާލެވޭނެ ހިދުމަތްތަކެއް ނޫންކަންވެސް މުޢާޒު ފާހަގަކުރެއްވިއެވެ.

މުޢާޒު ވިދާޅުވީ ކުންފުންޏާއި ހަވާލުވެލެއްވީ ޖުމްލަ 4.3 ބިލިޔަން ރުފިޔާގެ ދަރަންޏަކާއެކުގައި ކަމަށާއި މިދަރަނިތައް ޚަލާޞްކުރުމަށް ކޮންމެ މަހަކު 30 މިލިޔަން ރުފިޔާ ދައްކަން ޖެހިފައިވާ ކަމަށެވެ. އަދި މީގެ އިތުރުން ނިމިދިޔަ ސަރުކާރުން ބޭނުންވާވަރަށް ވުރެން އިތުރަށް ކުންފުންޏަށް މުވައްޒަފުން ނަގާފައިވުމުގެ ސަބަބުން ކުންފުނީގެ އާމްދަނީގެ 38 އިންސައްތަ ހޭދަކުރަން ޖެހިފައިވަނީ މުވައްޒަފުންގެ މުސާރައަށް ކަމަށާއި މިހާރު މިއަދަދު 35 އިންސައްތައަށް ދަށްކުރެވިފައިވާ ކަމަށް މުޢާޒު ވިދާޅުވިއެވެ. މުޢާޒު ވިދާޅުވީ މިމައްސަލަ ހައްލުކޮށް މިއަދަދު 28 އިންސައްތައަށް މަދުކުރުމަށްޓަކައި ކުންފުނީގެ ސްޓްރަކްޗަރ ބަދަލުކުރުމުގެ މަސައްކަތް ކުރައްވަމުން ގެންދަވާކަމަށެވެ.

އޭނާ ފާހަގަކުރެއްވި ގޮތުގައި ތެޔޮގަތުންފަދަ ކުންފުނިން ނުކޮށް ނުވާނެދަފަ ހަރަދުތަކުގެ އިތުރުން ކުންފުނިން ވަނީ ކޯޓުން ބޭރުން މައްސަލަ ހައްލުކުރުމުގެ ގޮތުން އެތައް ފަރާތަކަށް ޖުމްލަ 10.5 މިލިޔަން ރުފިޔާ ކޮންމެ މަހަކު ދައްކަން ޖެހިފައިކަމަށެވެ. ގިނަ މަސްމަހު މިމަގުން ކުރިއަށް ގެންދެވުންކަމުގައި ވީނަމަވެސް މިކަމުގައިވެސް ދަތިތަކެއް ކުރިމަތިވާކަން ފާހަގަކުރެއްވިއެވެ.

މުޢާޒު އިތުރަށް ފާހަގަކުރެއްވި ގޮތުގައި ނިމިދިޔަ ސަރުކާރުން ފެނަކައިގެ މެންޑޭޓުން ބޭރުން އެތައް ބައިވަރު ހަރަދުތަކެއް ކޮށްފައިވާތީ އެކަމުން ލިބުނު ގެއްލުން ފޫބެއްދުމުގެ މަސައްކަތްވެސް ކުރިއަށްދާ ކަމަށެވެ. އެގޮތުން އެފަދަ ހުރިހާ މަސައްކަތްތަކެއް މާކެޓް ރޭޓުން ކުރުމަށް ޕްރައިވެޓް ސެކްޓަރގެ ކުންފުނިތަކާ ހަވާލުކުރައްވަމުން ގެންގަވާކަމަށް އޭނާ ވިދާޅުވިއެވެ. އެކަމުގެ ސަބަބުން މިހާރުވެސް ބޭކާރު އެތައް ހަރަދެއް ނުކޮށް ސަލާމަތްވެއްޖެ ކަމަށާއި ނަމަވެސް ހަމައެކަނި ކުންފުނީގެ ހަރަދު ކުޑަކޮށްގެން ފަރުޖެހެން ނެތްކަމަށް މުޢާޒު ވިދާޅުވިއެވެ. 

މުއާޒު ވިދާޅުވީ ކުންފުނި ވެއްޓިފައިވާ މާލީ ވަޅުގަނޑުން އަރައިގަތުމަށް މަސައްކަތްތަކެއް ކުރައްވަމުން ގެންދެވިނަމަވެސް މި މަސައްކަތްތައް ކާމިޔާބުވުމަށް މަހަކު މަދުވެގެން 45 މިލިޔަން ރުފިޔާ އިތުރަށް ބޭނުންވާކަމަށެވެ. އަދި މިހާރު ކުރެވެމުންދާ މަސައްކަތްތަކާއެކު 2027 ވަނަ އަހަރުގެ ނިޔަލަށް ކުންފުނީގެ ދަރަނިތައް އަދާކޮށް ނިންމާލެވޭނެކަމަށް އޭނާ ވިދާޅުވިއެވެ.