"އަޅުގަނޑު ދަންނަވާނީ 2024 ވަނަ އަހަރަކީ ރާއްޖޭގެ އިސްލާމީ ކަންތައްތަކަށް ވަރަށް ބޮޑު ދިރުމެއް، އިންޝާﷲ ގެނަ އަހަރެއްކަމުގެ އިހުސާސް އަޅުގަނޑަށް ކުރެވޭ،"
ރައީސް ޑރ. މުހައްމަދު މުއިއްޒުގެ މެނިފެސްޓޯގައި ދީނީ ކަންތައްތަކާ ގުޅޭ ގޮތުން ހިމަނާފައިވާ ހުރިހާ ކަންކަމެއްގެ މަސައްކަތް މި ވޭތުވެދިޔަ އެއް އަހަރު ތެރޭގައި ފަށާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އެމްއެމް ޓީވީއަށް ރޭ ދެއްވި އިންޓަވިއުއެއްގެ އެ މިނިސްޓްރީން ވޭތުވެ ދިޔަ އެއް އަހަރު ދުވަހުގެ މަސައްކަތްތަކަށް އަލިއަޅުއްވާލަމުން މިނިސްޓަރު ޝަހީމް ވިދާޅުވީ މެނިފެސްޓޯގައި ހިމަނާފައިވާ ގޮތަށް ފަގީރުން ހައްޖަށް ފޮނުވުމުގެ މަސައްކަތް މިއަހަރު ފަށާފައިވާ ކަމަށެވެ.
އޭގެ އިތުރުން މިސްކިތްތައް މަރާމާތު ކުރުމާ،އި މިސްކިތްތަކާ ގުޅޭ ކަންކަމުގައި ސަރުކާރަށް އިޝްތިހާރީ ލަފާ ދޭނެ ކޮމެޓީއެއް އެކުލަވާލުމުގެ މަސައްކަތް ވެސް ފަށާފައިވާ ކަމަށެވެ.
"އަދި އޭގެ އިތުރަށް ވެސް އިސްލާމް ދީނާ ގުޅޭ ދާއިރާތަކުން މިނިސްޓްރީގެ މެންޑޭޓުގަ ހިމެނޭ މުހިންމު ކަންކަން އެބަ ކުރިއަށް ދޭ. އަޅުގަނޑު ދަންނަވާނީ 2024 ވަނަ އަހަރަކީ ރާއްޖޭގެ އިސްލާމީ ކަންތައްތަކަށް ވަރަށް ބޮޑު ދިރުމެއް، އިންޝާﷲ ގެނަ އަހަރެއްކަމުގެ އިހުސާސް އަޅުގަނޑަށް ކުރެވޭ،" މިނިސްޓަރު ވިދާޅުވި އެވެ.
އެންމެ މުހިންމު އަދި އެންމެ ތާރީ ކަމެއްގެ ގޮތުގައި މިނިސްޓަރު ފާހަގަކުރެއްވީ މި ސަރުކާރުން އުފައްދާފައިވާ ޒަކާތު ހައުސްގެ މަސައްކަތްތަކެވެ. މިނިސްޓަރު ވިދާޅުވީ އިސްލާމް ދީނުގެ އެ ރުކުނަށް ފުޅާ ދާއިރާއެއްގައި މިއަހަރު މީހުން ހޭލުންތެރިކޮށްފައިވާ ކަމަށެވެ. އޭގެ ތެރޭގައި ސްކޫލު ދަރިވަރުންނާއި ވިޔަފާރި ވެރިންނަށް ހިންގި ސެޝަންތައް ފާހަގަކުރެއްވި އެވެ.
މި މަސައްކަތުގެ ނަތީޖާއެއްގެ ގޮތުން މިނިސްޓަރު ފާހަގަކުރެއްވީ މިއަހަރު ވެގެންދާނީ އެންމެ ގިނަ މީހުން މުދަލު ޒަކާތް ނެރުނު އަހަރަށް ކަމަށެވެ. މުދަލު ޒަކާތުގެ ގޮތުގައި ދެއްކި ފައިސާގެ އަދަދު މިދިޔަ އަހަަރާ އަޅާބަލާއިރު މި އަހަަރު 17 ޕަސެންޓް ވަނީ އިތުރުވެފަ އެވެ.
"މިއީ ތާރީހީ ކަމެއްގެ ގޮތުގަ އަޅުގަނޑު ފާހަގަކުރަން. ރައީސުލްޖުމްހޫރިއްޔާއަށް ވެސް އަޅުގަނޑު ޝުކުރު ދަންނަވަން އިސްލާމް ދީނުގެ ކަންތައްތަކަށް ދެއްވާ މުހިންމު ކަމަށްޓަކާ،" މިނިސްޓަރު ވިދާޅުވި އެވެ.