ހދ.ކައުންސިލުގެ ބެންކޮކު ދަތުރު | އޮޑިޓު ރިޕޯޓަކީ ފަޟީހަތްކުރުމުގެ އަމަލެއް

އަތޮޅު ކައުންސިލުން ފާހަގަކުރި ގޮތުގައި އޮޑިޓު ރިޕޯޓުގައި ފާހަގަކުރި އެއްވެސް ކަމަކީ ރަނގަޅު އަސާސެއްގެ މައްޗަށް ބިނާކޮށް ފާހަގަކޮށްފައިވާ ކަންކަމެއް ނޫނެވެ.

ހދ.އަތޮޅު ކައުންސިލުން ނުވަލައްކައަށްވުރެ ގިނަ ރުފިޔާ ހަރަދުކޮށްގެން ތައިލޭންޑުގެ ބެންކޮކަށް ކުރި ދަތުރާ ގުޅޭ ގޮތުން އެ ކައުންސިލުގެ އޮޑިޓު ރިޕޯޓުގައި ފާހަގަކޮށްފައިވާ ކަންކަމަކީ ކައުންސިލު ފަޟީހަތްކުރުމަށް ހިންގާފައިވާ އަމަލެއްކަމަށް ހދ.އަތޮޅު ކައުންސިލުން ބުނެފި އެވެ. 

އޮޑިޓު ރިޕޯޓުގައި ފާހަގަކޮށްފައިވާ ކަންކަމުގެ ތެރޭގައި ބޮޑު ހަރަދުކޮށްގެން ކުރި ދަތުރަކީ ފިނޭންސް މިނިސްޓްރީން ހުއްދަ ހޯދުމެއް ނެތި ކުރި ދަތުރެއް ކަމަށާއި، އެ ދަތުރުގައި ލިބުނު މަންފާއެއް ނުވަތަ ފައިދާއެއް ކައުންސިލަށް ބަޔާންކޮށްދެވިފައިނުވުން ހިމެނެ އެވެ. 

އޮޑިޓު ރިޕޯޓާ ގުޅިގެން ކައުންސިލުން ނެރުނު ބަޔާނެއްގައި ބުނެފައިވަނީ އެ ދަތުރަކީ ތައިލެންޑުގެ އެޑްވާންސް އިންޓަނޭޝަނަލް ޓްރެއިނިން ނެޓްވޯކާ ގުޅިގެން ކައުންސިލު މެންބަރުންނާއި އިސް މުވައްޒަފުންނަށް ބެންކޮކުގައި ހިންގުނު ގާބިލުކަން އިތުރުކުރުމުގެ ޕްރޮގުރާމެއްގައި ބައިވެރިވުމަށް ކުރި ދަތުރެއް ކަމަށެވެ. 

އަދި އޮޑިޓު ރިޕޯޓަކީ ފިނޭންސް މިނިސްޓްރީން ނެރެފައިވާ މާލިއްޔަތާ ބެހޭ ސާކިއުލާއާ ހިލާފަށް ތައްޔާރުކޮށްފައިވާ އަދި އޮޑިޓާ ޖެނެރަލްގެ މަސްއޫލިއްޔަތުތަކާ ހިލާފަށް އެކުލަވައިލާފައިވާ ރިޕޯޓެއްކަމަށް ކައުންސިލުން ތުހުމަތުކޮށްފައިވެ އެވެ. 

އެގޮތުން ކައުންސިލުންވަނީ އޮޑިޓު ރިޕޯޓާަ ގުޅިގެން ފަސް ނުކުތާއެއް ފާހަގަކޮށްފަ އެވެ. އެއީ 

  • 1.އޮޑިޓު ރިޕޯޓުގައި ހަވާލާދީފައިވާ ފިނޭންސް މިނިސްޓްރީގެ ސާކިއުލާއަކީ ކައުންސިލުތައް ފިޔަވައި އެހެނިހެން އިދާރާތަކުން އަމަލުކުރުމަށް ނެރެފައިވާ ސާކިއުލާއަކަށްވާއިރު، އެ ސާކިއުލާއާ ހިލާފުވިކަން އޮޑިޓު ރިޕޯޓުގައި ފާހަގަކޮށްފައި އޮތުން.
  • 2.އޮޑިޓުގައި އެ ދަތުރުން މަންފާއެއް ހާސިލުވެފައިނުވާކަމަށް ބުނެފައިވަނީ އަސާސެއް ނެތި، އަތޮޅު ކައުންސިލަށް ގާނޫނުން ލިބިދޭ ބާރުތަކާއި ޒިންމާތަކަށް ރިއާޔަތްކުރުމެއް ނެތި، ދަތުރުން ހާސިލުކުރެވުނު ތަޖުރިބާތައް މިންކުރުމެއްވެސް ނެތި، ކައުންސިލުގައި ހިމެނޭ އަތޮޅުގެ 12 ރަށުގެ ކައުންސިލުތަކުގެ ރައީސުންގެ ބަހެއްވެސް ހޯދުމެއް ނެތި.
  • 3.މިފަދަ ތަމްރީނުތައް އޮންލައިންކޮށް ހާސިލުކުރުމަކީ އެންމެ ރަނގަޅު ގޮތްކަމަށް އޮޑިޓު ރިޕޯޓުގައި ބަޔާންކޮށްފައިވަނީ ކޮން އަސާސެއްގެ މައްޗަށް ބިނާކޮށްކަން ކައުންސިލަށް ސާފުނުވުން
  • 4.ކައުންސިލުތަކުގެ ތަރައްގީގެ ޕްލޭނާައި މަސައްކަތުގެ ތާވަލުގައި ހިމަނައިގެން ހިންގާ ހަރަކާތްތަކަށް ހުރަސައަޅައި ސިޔާސަތުތަކަށް ފާޑުކިޔުމަކީ އޮޑިޓާ ޖެނެރަްލގެ ޒިންމާއެއް ނޫން
  • 5.އޮޑިޓު ރިޕޯޓުތަކަކީ ގަވާއިދާއި ގާނޫނަށް ފެތޭ ސުލޫކީ މިންގަނޑުތަކާ އެއްގޮތަށް ޒިންމާދާރުކަމާއެކު ޖަވާބުދާރީވަނިވި ގޮތަކަށް ނެރޭ ރިޕޯޓުތަކަށް ވާންޖެހޭނެ ކަމަށް ކައުންސިލުން ދެކޭ

އެއާއެކު ކައުންސިލުން ބުނެފައިވަނީ މި ރިޕޯޓު އެކުލަވައިލާ މީޑިޔާތަކަށް ދޫކޮށްލާފައިވަނީ އިދާރީ ދާއިރާގައި ހިމެނޭ ރަށްތަކުގެ ރައްޔިތުން އަދި މުޅި ރާއްޖޭގެ ކުރިމަތީގައި އެ ކައުންސިލު ފަޟީހަތްކުރުމުގެ މަގުސަދުގައި ކަމަށެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.