"ސިޔާސީ މަގާމުތަކުގައި މީހުން ބައިތިއްބަން ރައްޔިތުންގެ ޖީބަށް އަންނަނީ އަތް ބާނަމުން"
"ދައުލަތަށް ސިޔާސީ މަގާމުތަކުގައި މީހުން ބޭތިއްބުމަށްޓަކައި، އާންމު ރައްޔިތުމީހާގެ ޖީބަށް އަތް ބާނާ، އޭނާގެ ޖީބު ހުސްކޮށްލާތަން ފެންނަނީ،" ފައްޔާޒު ވިދާޅުވި އެވެ.
ސިޔާސީ މަގާމުތަކުގައި ތިބި މީހުން އެ މަގާމުތަކުގައި ބޭތިއްބުމަށް ސަރުކާރުން އާންމު ރައްޔިތުންގެ ޖީބަށް އަތް ބާނަމުން އަންނަ ކަމަަށް އެމްޑީޕީގެ ޗެއާޕާސަން ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލު ވިދާޅުވެއްޖެ އެވެ.
އެމްޑީޕީން ޑިސެންބަރު ދިހަވަަނަ ދުވަހު ބާއްވަން ނިންމާފައިވާ "ގާނޫނޫއަސާސީގެ ދިފާއުގައި" އެއްވުމަށް ތައްޔާރުވުމަށް އެ ޕާޓީން ކުރިއަށްގެންދިޔަ ގާނޫނުއަސާސީގެ ދިފާއުގައި ބޮޑު ސައްލާ ބައްދަލުވުމުގައި ވާހަކަދައްކަވަމުން ފައްޔާޒު ވިދާޅުވީ މިއަދު ފެންނަމުންދަނީ ސިޔާސީ މަގާމުތަކުގައި ތިބި މީހުން އެ މަގާމުތަކުގައި ބޭތިއްބުމަށް ރައްޔިތުންގެ ޖީބަށް އަތް ބާނައި، ޖީބުތައް ހުސްކޮށްލަމުންދާ މަންޒަރު ކަމަށެވެ.
"ދައުލަތަށް ސިޔާސީ މަގާމުތަކުގައި މީހުން ބޭތިއްބުމަށްޓަކައި، އާންމު ރައްޔިތުމީހާގެ ޖީބަށް އަތް ބާނާ، އޭނާގެ ޖީބު ހުސްކޮށްލާތަން ފެންނަނީ،" ފައްޔާޒު ވިދާޅުވި އެވެ.
ދުންފަތުގެ ބާވަތްތަކުގެ ޑިއުޓީ ބޮޑުކުރަން ސަރުކާރުން ނިންމި ނިންމުމަށް ފާޑުވިދާޅުވެ ފައްޔާޒު ވިދާޅުވީ އެފަދަ ބޮޑެތި ބަދަލުތައް އެހެން ގައުމުތަކުގައި ގެންނަނީ ދުންފަތުގެ ގެއްލުން ރައްޔިތުންނަށް ބުނެދީ، އަމިއްލައަށް އެކަމާ ދުރަށް ދިއުމުގެ މުހިއްމުކަން ވިސްނައިދިނުމާއެކު ކަމަށެވެ.
ފައްޔާޒު އިތުރަށް ތުހުމަަތުކުރެއްވި ގޮތުގައި ރައީސް ޑރ.މުހައްމަދު މުއިއްޒު ސަރުކާރު ހިންގަވައި ސިޔާސަތުތައް އެކަށައަޅުއްވަނީ އެއިރެއްގައި އެމަނިކުފާނަށް ފެނިވަޑައިގަންނަވާ ގޮތަކަށެވެ. އެކަމުގައި ގިނަ ބައެއްގެ މަޝްވަރާ ނުހޯއްދަވާކަން ފައްޔާޒު ފާހަގަކުރެއްވި އެވެ.
"ރައީސަށް އެ ވަގުތަކު ފެނިވަޑައިގެންނެވި ގޮތެއް، ގޭތެރެއިން ދެކެވޭ ވާހަކައަކަށް ބިނާކުރައްވާ ޓްވީޓު މި ކުރައްވަނީ ރާއްޖޭގެ ސިޔާސަތުތައް ކަނޑައަޅުއްވަން. މިއީ ރާއްޖޭގެ ގާނޫނުއަސާސީއިން ރައީސަށް ނޫނީ ދައުލަތަށް ދީފައިވާ ބާރެއް ނޫން،"
ފައްޔާޒު ފާހަގަކުރެއްވި ގޮތުގައި ރައްޔިތުންނާ ގުޅުންހުރި ބޮޑެތި ކަންކަން ނިންމުމުގައި ރައްޔިތުންނާ މަޝްވަރާކޮށް ރައްޔިތުންގެ ހިޔާލާއި ވިސްނުމާއި ބައިވެރިވުން ހޯދަންޖެހޭނެ އެވެ. ނަމަވެސް މިހާރު ކަންކަން ހިނގާ ގޮތަކީ ރައީސަށް ކަމެއް ކުރައްވަން ފެނިވަޑައިގަތުމުން އެކަމެއް ތަޅުއަޅުވާފައި އޮންނަ ރައްޔިތުންގެ މަޖިލީހަށް ފޮނުއްވައިގެން ފާސްކުރައްވަނީ ކަމަށް ފައްޔާޒު ވިދާޅުވި އެވެ.
"ރައީސަށް މިއަދު ގަބޫލުކުރެވެނީ ސިޔާސީ ޕާޓީ އޮވެގެން ނުވާނެޔޭ. އެހެންވިއްޔާ ހަމަ ޓްވީޓަކުން އެކަން އިއުލާނު ކުރައްވާ ތަޅު އެޅިފައި އޮތް މަޖިލީހަކަށް އެކަން ހުށަހަޅުއްވައިގެން އެކަން އެހެނެއް ނުކުރެވޭނެ. ގާނޫނުއަސާސީއިން އެގޮތަށް ތަނެއް ނުދޭ،" ފައްޔާޒު ވިދާޅުވި އެވެ.
ގާނޫނުއަސާސީ ހޯދީ އެތައް ގުރުބާނީއެއްވެގެންކަން ފާހަގަކުރައްވައި ފައްޔާޒު ވިދާޅުވީ އެ ގާނޫނުއަސާސީ ދިފާއުކުރަން ކުރަންޖެހުނު ކޮންމެ މަސައްކަތެއް އެމްޑީޕީން ކުރާނެ ކަމަށެވެ. އެތައް ބަައެއްގެ ފުރާނައިން ގުރުބާންވެގެން ހޯދި ގާނޫނުއަސާސީ ނޮޅައިލަން އެއްވެސް ބަޔަކަށް ފުރުސަތު ނުދެއްވާނެކަމަށް ފައްޔާޒު ވިދާޅުވި އެވެ.
ރާއްޖޭގެ އިގުތިސާދީ ހާލަތަށް އަލިއަޅުވައިލައްވައި ފައްޔާޒު ވިދާޅުވީ މިއަދު މަސްވެރިކަން އެކީ ފުނޑުފުނޑުވެފައިވާއިރު، އިމާރަތްކުރުމުގެ ދާއިރާވެސް މިހާރު އޮތީ ނެތިދިއުމުގެ ތުންފަތްމަތީގައި ކަމަށެވެ. އަދި ވިޔަފާރިތައް މިހާރު ނުހިނގާަކަން ފާހަގަކުރައްވައި ފައްޔާޒު ވިދާޅުވީ ފައިސާ ޗާޕުކޮށްގެންވިޔަސް އެ ހާލަތުން ގައުމު ސަލާމަތްކުރުމަކީ ރައީސަކަށް ހުންނަވާ ބޭފުޅެއްގެ ޒިންމާއެއް ކަމަށެވެ.
ކޮމެންޓް
Republic of Maldives