އޭރު މި މައްސަލައިގެ ތަހުގީގަށް އެއްވެސް ކުރިއެރުމެއް ނުލިބި އޮއްވައި އަހުޒަމް މަސްތުވާތަކެތީގެ މައްސަލައެއްގައި ހައްޔަރު ކުރި އެވެ. އެ ތަހުގީގުގެ ތެރެއިން އޭނާ ވަނީ ނައީމާ މަރާލިކަމަށް އެއްބަސްވެ ގިނަ މައުލޫމާތުތަކެއް ދީފަ އެވެ.
ނ. މަނަދޫގައި އަނިޔާވެރި ގޮތަކަށް މަރާލާފައި އޮއްވާ ފެނުނު އެރަށު އަންނާރުމާގޭ ނައީމާ މޫސާ، 62، ގެ މަރުގެ މައްސަލައިގައި ދައުވާ ކޮށްފައިވާ އަހުޒަމް އަބްދުއްޝުކޫރު ކުރިން ކުށަށް އިއުތިރާފުވީ ފުލުހުން މަޖުބޫރު ކުރުވައިގެން ކަމަށް އޭނާ ކޯޓުގައި ބުނެފި އެވެ.
އޭޕްރީލް 6، 2023 ދުވަހުގެ ދަންވަރު ނައީމާ ނިދާފައި އޮއްވާ އޭނާ ދިރިއުޅޭ ގެއަށް ވަނުމަށްފަހު އަނިޔާވެރިކޮށް މަރާލި މައްސަލައިގައި ދައުވާކޮށްފައި ވަނީ އެރަށު ތިން ޒުވާނުންގެ މައްޗަށެވެ. އަހުޒަމްގެ އިތުރުން ދެން ދައުވާ ކޮށްފައި ވަނީ އަބްދުލްވާހިދު ރިފާސް އަދި ހަސަން ފަވާޒްގެ މައްޗަށެވެ. ތިން މީހުންގެ މައްޗަށް އުފުލާފައި ވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ އާއި މައްޔިތާގެ ބޭނުން ނަހަމަ ގޮތުގަ ބޭނުން ކުރުމުގެ ކުށުގެ ދައުވާ އަދި އަދުލު އިންސާފު ގާއިމް ކުރަން ހުރަސް އެޅުމުގެ ކުށުގެ ދައުވާ އެވެ.
ގިނަ ޒަހަމްތަކާއެކު ނައީމާ ދިރިއުޅޭ ކޮޓަރީގައި އޭނާ މަރާލާފައި އޮއްވާ ފެނުނީ އޭޕްރީލް 7، 2023 ގައެވެ. ގައިގެ އެކި ތަންތަނަށް ތޫނު އެއްޗަކުން ގިނަ ހަމަލާތަކެއް ދީފައިވާއިރު، ކަރު ބުރިކޮށްލަން މަސައްކަތް ކޮށްފައިވާ ކަމަށް ދައުލަތުން ބުނެފައިވެ އެވެ.
އޭރު މި މައްސަލައިގެ ތަހުގީގަށް އެއްވެސް ކުރިއެރުމެއް ނުލިބި އޮއްވައި އަހުޒަމް މަސްތުވާތަކެތީގެ މައްސަލައެއްގައި ހައްޔަރު ކުރި އެވެ. އެ ތަހުގީގުގެ ތެރެއިން އޭނާ ވަނީ ނައީމާ މަރާލިކަމަށް އެއްބަސްވެ ގިނަ މައުލޫމާތުތަކެއް ދީފަ އެވެ. ނަމަވެސް އެންމެ ފަހުން ބޭއްވި އަޑުއެހުމުގައި ދައުލަތުގެ ފަރާތުން ދައުވާތައް އިއްވުމުން އޭނާ ވަނީ އިންކާރު ކޮށްފަ އެވެ.
މިއަދު ކްރިމިނަލް ކޯޓުގައި ބޭއްވި އަޑުއެހުމުގައި އިންކާރު ކުރި ސަބަބު ސާފުކޮށްދެއްވަމުން އަހުޒަމްގެ ދިފާއީ ވަކީލް ޝަހުނީމް ވިދާޅުވީ އަހުޒަމް އޭރު ކުށަށް އިއުތިރާފުވީ މަސްތުގެ ހާލަތުގައި ހުރެގެން ކަމަށެވެ. އޭގެ ފަހުން އިއުތިރާފް އަނބުރާ ދެން ނުގެންދެވޭނެ ކަމަށް ފުލުހުން ވިސްނައިދީފައިވާ ކަމަށާއި، ދައުލަތުގެ ފަރާތުން އޭރު އޭނާއަށް ހަމަޖައްސައިދިން ވަކީލު ވެސް ގާނޫނީ ލަފާ އޭނާއަށް ދީފައި ނުވާ ކަމަށެވެ.
އަހުޒަމްގެ ދިފާއު ސާބިތު ކުރުމަށް ދިފާއީ ހެކި ހުށަހަޅަން އިތުރު ފުރުސަތެއް ދިނުމަށް ވެސް ޝަހުމީން ވަނީ އެދިވަޑައިގެންފަ އެވެ. ދިފާއީ ވަކީލް އެދުނު ގޮތަށް، އަންނަ އާދީއްތަ ދުވަހުގެ މެންދުރު ފަހު 2 ޖަހާއިރަށް ގާޒީ އަލީ އާދަމް ވަނީ ފުރުސަތު ދެއްވާފަ އެވެ.
މި މައްސަލައިގައި ދެން ދައުވާ ކޮށްފައިވާ ރިފާސް އާއި ފަވާޒް ވެސް ވަނީ ދައުވާތަކަށް އިންކާރުކޮށްފަ އެވެ. އެ ދެ މީހުން ވަނީ ދިފާއު ސާބިތުކުރަން ހެކި ހުށަހަޅާފަ އެވެ. ދައުލަތުން ވަނީ ދައުވާ ލިބޭ ތިން މީހުންނާ ދެކޮޅަށް ވެސް ގިނަ ހެކިތަކެއް ހުށަހަޅާފަ އެވެ.
ދައުވާތައް އިއްވަމުން ދައުލަތުން ބުނެފައި ވަނީ ނައީމާގެ ކަރަށާއި ބުރަކައްޓަށް ގިނަ ޒަހަމްތަކެއް ދީފައިވާ ކަމަށެވެ. އޭގެ ފަހުން މި މައްސަލައިގައި ދައުވާ ލިބޭ ފަވާޒްގެ ކާރުގައި ގޮސް، ހަމަލާ ދޭން ގެންގުޅު ވަޅިތަކާއި، އަންގިތަކާއި އިސްޓާކީނުތައް، އަދި ލައިގެން ތިބި އަންނައުނު ވެސް އަންދާލާފައިވާ ކަމަށެވެ. އެތަކެތި އަންދާލާފައިވުމުން، ހެކި ނައްތާލަން މަސައްކަތް ކޮށްފައިވާކަމުގެ ތުހުމަތު އެމީހުންގެ މައްޗަށް ކޮށްފައިވެ އެވެ.
މައްޔިތާގެ ބޭނުން ނަހަމަ ގޮތުގައި ހިފުމުގެ ދައުވާ ކޮށްފައި ވަނީ، ނައީމާ މަރާލުމަށްފަހު އޭނާ އޮތް ކޮޓަރި ތަޅުލާފައި ދިއުމުންނެވެ. ދައުލަތުން ބުނީ ލޭތަކާއެކު ނައީމާގެ ހަށިގަނޑު ކުނިވާން ދޫކޮށްލާފައިވާ ކަމަށާއި، ހަށިގަނޑު ފެނުނީ މަރުވިތާ 40 ގަޑިއިރު ފަހުން ކަމަށެވެ.