"ކޮވިޑް ހާލަތުގައި ރައްޔިތުން ނިކަމެތި ނުވާވަރަށް ރައްޔިތުން ނިކަމެތި ވެއްޖެ"

މިހާރު ގައުމު މިދާގޮތަށް ދާނަމަ ދިވެހި ދައުލަތް ބަގުރޫޓުވެ، ރައްޔިތުން ބަޑަށް ޖެހޭނެ ކަމަށާއި، މިއަދު މިފެންނަނީ ކޮވިޑް-19 ގެ ހާލަތުގައި ނިކަމެތި ނުވާވަރަށް ރައްޔިތުން ނިކަމެތިވަމުންދާތަން ކަމަށް ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.

ސަރުކާރުން އަޅަމުންދާ ފިޔަވަޅުތަކާ ދެކޮޅަށް ނުރުހުން ފާޅުކުރައްވަމުން އައްބާސް އެކްސްގައި ކުރެއްވި ޕޯސްޓެއްގައި ވިދާޅުވީ ހަރަދު ކުޑަކުރަން އެއްވެސް މަސައްކަތެއް ނުކުރާ ކަމަށާއި، އެއް ދުވަހުން އަނެއް ދުވަހަށް ސިޔާސީ ވަޒީފާތައް ވެސް އިތުރުވަމުންދާ ކަމަށެވެ.

"އިށީންނާނެ ގޮނޑިއެއް މޭޒެއް ނެތި ކޮންމެ މިނިސްޓްރީ އެއްގައި އެތައްބައިވަރު ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުންނާއި ޕޮލިޓިކަލް ޑިރެކްޓަރުންނާއި ޑެޕިއުޓީ ޕޮލިޓިކަލް ޑިރެކްޓަރުން އެބަތިބި. މީން ކޮންމެ ބޭފުޅަކަށް ރައްޔިތުންގެ ޓެކްސް ފައިސާއިން 25000 އިން ފެށިގެން 45000 ރުފިޔާގެ މުސާރަ ދެމުންދަނީ،" އައްބާސް ވިދާޅުވި އެވެ.

އައްބާސް ވިދާޅުވީ ދައުލަތުގެ އެކި ކުންފުނިތަކުން އެމީހަކައް އަތުޖެހުނު ގޮތަކައް ބޮޑެތި ވައްކަންތައް ކުރަމުންދާ ކަމަށެވެ. އަދި މަސްވެރިކަމުގެ ސިނާއަތު ނެތިގެންދާއިރު، ކޮންސްޓްރަކްޝަން އިންޑަސްޓްރީ ވެސް "ފުނޑިފައި"ވާ ކަމަށެވެ.

"ރައްޔިތުންގެ ޓެކްސް ފައިސާއިން ދައުލަތުގެ މުއައްޒަފުންގެ މުސާރަ ދީފައި އެހެންކަމެއް ކުރާނެ ފައިސާއެއް ދައުލަތުގެ ހަޒާނާގައި ނެތްކަން މިއަދު ގަބޫލު ކުރަންޖެހޭ،" އައްބާސް ވިދާޅުވި އެވެ.

އައްބާސް މިހެން ވިދާޅުވިއިރު، ގޮނޑިއެއް މޭޒެއް ނެތި ސިޔާސީ ވަޒީފާތައް ދެމުންދާކަމުގެ ހަބަރުތައް އިއްޔެ ބައެއް ނޫސްތަކުގައި ވަނީ ރިޕޯޓްކޮށްފަ އެވެ. ނަމަވެސް ސަރުކާރުން ބުނަނީ ސިޔާސީ މުވައްޒަފުންގެ އަދަދު މިހާރުވެސް މަދުކުރުމަށް މަސައްކަތް ކުރަމުންދާ ކަމަށެވެ.