ބައެއް ޓެކުސްތައް ޑޮލަރަށް | ޑޮލަރު ވަންނަ އަދަދަށް އިތުރުވުމެއް

ޑޮލަރުން އާމްދަނީ ލިބުނުނަމަވެސް ގަވައިދުން ލާޒިމްކޮށްފައި ނުވާތީ މިހާތަނަށް ބައެއް ވިޔަފާރިތަކުން ދަނީ "ކަޅު ބާޒާރުގައި" ޑޮލަރު މާރުކޮށް ދިވެހި ރުފިޔާއިން އެ ޓެކްސްތައް މީރާ އަށް ދައްކަމުންނެވެ. ނަމަވެސް ޑޮލަރު ހިފަހައްޓަން ކެބިނެޓުން އެނގި އެންގުމެއް ތަންފީޒު ކުރަން ވަނީ މިދިޔަ މަހުން ފެށިގެން ބައެއް ޓެކުސްތައް ޑޮލަރުން ބަލައިގަންނަން ފަށާފަ އެވެ. 

ޓެކްސް އޮފީސް، މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ހިސާބުތައް ދައްކާ ގޮތުގައި މި ބަދަލާއެކު ޑޮލަރުގެ އާމްދަނީއަށް ވަނީ އިތުރުވުމެއް ލިބިފަ އެވެ. 

ޓެކްސް އޮފީހުގެ ހިސާބު ފޮތްތައް ދައްކާ ގޮތުން މިދިޔަ މަހުގެ ފަހު ހަފުތާ ނޮވެމްބަރު 24 އިން 30 ގެ ނިޔަލަށް ޑޮލަރުން ދައުލަތަށް ވަނީ 48 މިލިއަން ޑޮލަރު ބަލައިގެންފަ އެވެ. މި އިތުރުވުމަކީ މި އަހަރުގެ އޮގަސްޓް މަހުން ފެށިގެން ބަލާނަމަ ހަފުތާއެއްގެ ތެރޭގައި ޑޮލަރުން އާމްދަނީއަށް މިވަރަށް އިތުރުވި ފުރަތަމަ ފަހަރެވެ. މިދިޔަ ތިން މަސް ދުވަހަށް ބަލާއިރު ޑޮލަރުން އާމްދަނީ މިހާތަނަށް ހަފުތާއެއްގެ ތެރޭ އެންމެ ބޮޑު އިތުރުވުމެއް އައިސްފައިވަނީ އޮގަސްޓް މަހުގެ 25 އިން 30 ގެ ނިޔަލަށެވެ. އެ ފަހަރު ލިބިފައިވަނީ 38 މިލިއަން ޑޮލަރެވެ. 

ބޭރު ފައިސާ އިން އާމްދަނީ ލިބޭ ފަރާތްތަކުން އިންކަމް ޓެކްސް ޑޮލަރުން ދައްކަންޖެހޭ ގޮތަށް ޓެކްސް އިދާރާ އިން ބަދަލު ގެނެސްފަވަނީ ސެޕްޓެމްބަރު މަހުގެ 12 ވަނަ ދުވަހު އެވެ. އަދި ފަހުން ނޮވެމްބަރު އެކަކުން ފެށިގެން ވަނީ ވިތުހޯލްޑިން ޓެކްސްތައް ޑޮލަރުން ދައްކަން ޖެހޭ ގޮތަށް ލާޒިމްކޮށް ޑޮލަރުން ބަލައިގަންނަން ފަށާފަ އެވެ. 

ޑޮލަރުން އާމްދަނީ ލިބޭ ކުންފުނިތަކުގެ އިންކަމް ޓެކްސް ޑޮލަރުން ނަގަން ގަވާއިދަށް އިސްލާހު ގެނައީ ޑޮލަރުގެ ތާށިކަމުގެ ސަބަބުންނެވެ. މި ބަދަލު ގެންނަން ކެބިނެޓުން ނިންމާފައިވަނީ އޯގަސްޓް 25 ވަނަ ދުވަހު އެވެ. މި ބަދަލާއެކު ޑޮލަރުން އާމްދަނީ ލިބޭ ކުންފުނިތަކުން ޕެންޝަން ފައިސާ އާއި ކަސްޓަމްސް ޑިއުޓީ ވެސް ދައްކަން ޖެހޭނީ ޑޮލަރުންނެވެ. 

މި ބަދަލު އިއުލާނ ުކުރައްވަމުން ބަންޑާރަ ނައިބު އަހުމަދު އުޝާމް ވިދާޅުވެފައިވާ ގޮތުގައި ޑޮލަރުން މުސާރަ ދޭނަމަ ޕެންޝަން ފައިސާ ވެސް ޑޮލަރުން ދައްކަން ޖެހޭ ގޮތަށް ބަދަލު ގެންނާނެ އެވެ. އެކަން ކުރަން ގާނޫނުތަކަށް އިސްލާހު ގެންނާނެ ކަމަށް ބަންޑާރަނައިބު ވިދާޅުވެފައިވެ އެވެ. 

ރާއްޖޭގެ ޑޮލަރުގެ މައްސަލަ ހައްލު ކުރަން މަރުކަޒީ ބޭންކުންވެސް ވަނީ ފިޔަވަޅުތަކެއް އަޅަން ނިންމާފަ އެވެ. 

އެމްއެމްއޭ އިން މިހާރު އެކުލަވައިލާ އަމަލުކުރަން ފަށާފައިވާ ފޮރިން ކަރަންސީގެ ގަވާއިދަށް ގާނޫނެއްގެ ބާރު ދިނުމުގެ ގޮތުން އެ އިދާރާ އިން ބިލެއް އެކުލަވައިލައި އާއްމުންގެ ހިޔާލަށް ވަނީ ހުޅުވާލާފަ އެވެ. މި ބިލުގައި ބޭންކުތަކަށް ޑޮލަރު މާރުކުރުމުގައި މިހާރުގެ ގަވާއިދުގައި އަމަލުކުރަންޖެހޭ އުސޫލަށް ބަދަލެއް ގެނެސްފައިނުވެ އެވެ. އެގޮތުން ބިލުގެ އަށްވަނަ މާއްދާގައި ބަޔާންކޮށްފައިވަނީ ޓޫރިޒަމް ވިޔަފާރިތަކަށް ބޭރު ފައިސާއިން ލިބޭ އާމްދަނީ އެކުގައި ރާއްޖޭގައި ރަޖިސްޓްރީކޮށްފައިވާ ބޭންކަކަށް ޖަމާކުރަންޖެހޭނެ ކަމަށެވެ. މިހާރު ގަވާއިދުގައި އޮންނަނީވެސް އެގޮތަށެވެ. 

އަލަށް ބިލުގައި ހިމަނާފައިވަނީ ޓޫރިޒަމް ވިޔަފާރި ނޫން ވިޔަފާރިތަކުގެ ތެރެއިން އަހަރަކު މަދުވެގެން 20 މިލިއަން ޑޮލަރުގެ އާމްދަނީ ލިބޭ ވިޔަފާރިތަކުންވެސް އެ ފަރާތްތަކށް ލިބޭ ބޭރު ފައިސާގެ އާމްދަނީ ދިވެހިރާއްޖޭގެ ބޭންކަކަށް ޖަމާކުރަންޖެހޭނެ ކަމުގައި ބަޔާންކޮށްފއި އޮތް މާއްދާ އެވެ. ގަވާއިދުގައި މިހާރު އޮންނަ ގޮތުން ރިސޯޓުތަކާއި އިންޓަގްރޭޓެޑް ރިސޯޓުތަކާއި، ރިސޯޓު ހޮޓާތަކުގެ އިތުރަށް 50 އެނދަށްވުރެ ގިނަ އެނދު ހުންނަ ގެސްޓުހައުސްތަކާއި ސިޓީ ހޮޓާތަކާއި، ޓޫރިސްޓު އުޅަނދުފަހަރުން އެތަންތަނަށް އަންނަ ކޮންމެ ފަތުރުވެރިއެއްގެ ބޮލަކަށް 500 ޑޮލަރު މާރުކުރަންޖެހެ އެވެ. މީގެ އިތުރުން މަނީ އެކްސްޗޭންޖު ކުރާ ވިޔަފާރި ހަރުދަނާ ކުރުމުގެ ގޮތުން މަނީ އެކްސްޗޭންޖު ކުރަން ހުއްދަ ލިބިފައިވާ ތަންތަން މަދުކޮށް ބެލެހެއްޓޭނެ މެކޭނިޒަމެއް ގެނައުމަށް ގަވައިދު ހަރުދަނާކޮށް އަލުން ހުއްދައަށް ހުޅުވާލުމުން ވަނީ ކުރިން ތިބި 200 އަށްވުރެ ގިނަ މަނީ އެކްސްޗޭންޖު ވިޔަފާރީގެ އަދަދު މަދުވެފަ އެވެ. އެކަމަށް އެދި  98 ފަރާތަކުން ވަނީ ހުށަހަޅާފަ އެވެ. މިހާރު އެމްއެމްއޭއިން ފަަށާފައިވަނީ މި ފަރާތްތައް އިވެލުއޭޓް ކުރުމުގެ މަސައްކަތްތަކެވެ. ހުއްދަ ދޭނީ މީގެ ތެރޭން 50 ފަރާތަކަށެވެ.