ފަސްޓް ނޭޝަނަލް އިން ރިއަލް އެސްޓޭޓުގައި އިންވެސްޓް ކުރާނެ ފަންޑެއް

ފަސްޓް ނޭޝަނަލް ފައިނޭންސް ކޯޕަރޭޝަނުން ރިއަލް އެސްޓޭޓް އެންޑް ހޮސްޕިޓާލިޓީ ފަންޑު ލޯންޗްކޮށްފި އެވެ. 

މި ފަންޑަކީ ރާއްޖޭގެ ކެޕިޓަލް މާކެޓް ރެގިއުލޭޓް ކުރާ ބޮޑީ، ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އިން ލައިސެންސް ދީފައިވާ އިންވެސްޓްމަންޓް ފަންޑެކެވެ.  

ފަސްޓް ނޭޝަނަލް ފައިނޭންސް ކޯޕަރޭޝަންގެ ސީއީއޯ ހަސަން ޒިޔަތު ވިދާޅުވާ ގޮތުގައި މިއީ ގިނަ ބަޔަކަށް އިންވެސްޓް ކުރުމުގެ ފުރުސަތު މަގުފަހިވާނޭހެން ތައާރަފުކުރެވިފައިވާ ފަންޑެކެވެ.

"މި ފަންޑުގައި އިންވެސްޓް ކުރުމަކީ އިންވެސްޓަރުންނަށް ލިބިގެންދާނޭ ވަރަށް ރަނގަޅު ފުރުސަތެއް. 10،000 ރުފިޔާ އިންވެސްޓް ކުރަން ބޭނުންފުޅުވާ ބޭފުޅުންނަށްވެސް މި ފަންޑުގައި އިންވެސްޓް ކުރެވޭނެ"، ޒިޔަތު ވިދާޅުވި އެވެ.

މި ފަންޑަކީ ރާއްޖޭގައި ރިއަލް އެސްޓޭޓް އަދި ޓޫރިޒަމް މި ދެ ދާއިރާއަށް އިންވެސްޓުކުރުމުގެ ހާއްސަ ފުރުސަތެއް ލިބިގެންދާ މިފަދަ ފުރަތަމަ ފަންޑެވެ. މި ފަންޑު ސްޓްރަކްޗާ ކުރެވިފައިވަނީ އިކުއިޓީގައި އިންވެސްޓް ކުރަން ބޭނުންފުޅުވާ ފަރާރްތަކަށް އަދި ޑެޓް އިންސްޓްރުމެންޓްސް ތަކުގައި އިންވެސްޓް ކުރަން ބޭނުންފުޅުވާ ފަރާތްތަކަށް ވެސް އިންވެސްޓް ކުރުމުގެ ފުރުސަތު ތަނަވަސްވާނެ އެވެ.

އިކުއިޓީ އިންވެސްޓްމެންޓް – އިކުއިޓީގައި އިންވެސްޓް ކުރަން ބޭނުންފުޅުވާ ފަރާތްތަކަށް ފަންޑުގެ ހިއްސާ ވިއްކަމުންދާއިރު ފަންޑުގެ ހިއްސާ ގަންނަ ބޭފުޅުންނަށް އަންދާޒާ ކުރެވޭ ގޮތުގައި އަހަރަކު 20 ޕަސެންޓް ލިބިގެންދާނޭ އެވެ. މި ޕޭމަންޓް އިންވެސްޓަރުންނަށް ލިބިގެންދާނީ އަހަރަކު ހަތަރު ފަހަރު ފައިދާ ބެހުމަށް ހަމަޖެހިފައިވެ އެވެ. 

ޑެޓް އިންވެސްޓްމެންޓް – ފަންޑުގެ ބޮންޑް ހޯލްޑަރުންނަށް ހަ އަހަރުވަންދެން އަހަރަކު 12 ޕަސެންޓުގެ ރިޓާންއެއް ލިބިގެންދާނެ އެވެ. ރިޓާންސް އަހަރަކު ހަތަރު ފަހަރު އިންވެސްޓަރުންނަށް ލިބޭނެ އެވެ.