ވިޔަފާރި ބިންތަކުން އެޗްޑީސީއަށް ލިބެންޖެހޭ 1.4 ބިލިއަން | 226 މިލިއަން ހޯދައިފި

އެޗްޑީސީން އެކި ފަރާތްތަކަށް ވިޔަފާރި ބޭނުމަަށް ކުއްޔަށް ދޫކޮށްފައިވާ ބިންތަކަށް ލިބެންޖެހޭ 1.4 ބިލިއަން ރުފިޔާ ނުލިބި އޮތް ނަމަވެސް އެ ފައިސާގެ ތެރެއިން 226 މިލިއަން ރުފިޔާ މިހާރު އެޗްޑީސީން ހޯދާފައިވާކަމަށް އެ ކުންފުނިން މިއަދު ބުނެފި އެވެ. 

މާލިއްޔަތު ކޮމިޓީގައި މިއަދު މައިގަނޑު ގޮތެއްގައި އޮތީ އެޗްޑީސީން ކުއްޔަށް ދޫކޮށްފައިހުރި ބިންތަކުގެ ކުލީގެ ގޮތުގައި ނުލިބި ހުރި ފައިސާއާ ގުޅޭ ގޮތުން ވާހަކަދެއްކުމެވެ. އެކަމާ ގުޅޭ ގޮތުން ފަޒުލް ވިދާޅުވީ ވިޔަފާރީގެ ބޭނުންތަކަށް ކުއްޔަށް ދޫކޮށްފައިވާ ބިންތަކުގެ ކުލީގެ ގޮތުގައި ލިބެންޖެހޭ 1.4 ބިލިއަން ރުފިޔާ ނުލިބި އެބަހުރި ކަމަށެވެ. 

މަގާމާ ހަވާލުވެވަޑައިގެންނެވި ފަހުން ކުންފުންޏަށް ލިބެންޖެހޭ ފައިސާ ހޯދުމަށް މަސައްކަތްތަކެއް ކުރައްވާފައިވާކަން ފަޒުލް ފާހަގަކުރެއްވި އެވެ. އެގޮތުން އޭނާގެ ބެއްލެވުމުގެ ދަށުން އެ ކުންފުނީގެ އެތެރޭގައި އެކަމަށް ހާއްސަކޮށް ރިކަވަރީ ކޮމިޓީއެއް ގާއިމުކުރައްވާފައިވާކަން ފާހަގަކުރެއްވި އެވެ. 

އަދި އެ ކޮމިޓީން ވަރަަށް ބޮޑެތި މަސައްކަތްތަކެއް ކުރެވި ކޮމާޝަލް ބޭނުންތަކަށް ކުއްޔަށް ދޫކޮށްފަައިވާ ބިންތަކުން ލިބެންޖެހޭ 1.4 ބިލިއަން ރުފިޔާގެ ތެރެއިން 226 މިލިއަން ރުފިޔާ ހޯދާފައިވާކަމަށް ފަޒުލް ވިދާޅުވި އެވެ. 

"އަޅުގަނޑުގެ ބެލުމުގެ ދަށުން ވަކި ރިކަވަރީ ކޮމިޓީއެއް އެޗްޑީސީގެ އިސް މުވައްޒަފުންނާއި މިޑް ލެވެލް މެނޭޖުމެންޓުގެ މުވައްޒަފުން ހިމެނޭ ގޮތަށް އެސްޓަބްލިޝްކުރިން. އޭގެ ފަހުގައި ރިކަވަރީގެ މަސައްކަތް އަޅުގަނޑުމެން ފެއްޓީ ވަރަށް ގާތުން އަޅުގަނޑުގެ ބެލުމުގެ ދަށުން،" ފަޒުލް ވިދާޅުވި އެވެ. 

"އަޅުގަނޑުމެން އިނިޝިއަލީ [އެ މަސައްކަތް] ފަށައިގަތްއިރުގަ 1.4 ބިލިއަން [ނުލިބި] އޮތްއިރުގަ މިއަދު އެ ރިކަވަރީ ކޮމިޓީގެ މަސައްކަތުން 226 މިލިއަން ރިކަވާކޮށްފިން،"

އިތުރަށް ފަޒުލް ވިދާޅުވީ ކުލި ނުދައްކައިހުރި ފަރާތްތަކަށް މިހާރު އެއްބަސްވުން ބާތިލުކޮށް ނޯޓިސް ފޮނުވަމުންދާ ކަމަށެވެ. އަދި ނޯޓިސްއަށް އިޖާބަނުދޭ ފަރާތްތަކާމެދު ފިޔަވަޅުއެޅުމަށް އެ މައްސަލަތައް ކޯޓަށް ހުށަހަޅުއްވަމުންގެންދަވާ ކަމަށްވެސް ފަޒުލް ވިދާޅުވި އެެވެ. 

އަދި ފައިސާ ދައްކަން ބޭނުންވާ ފަރާތްތަކަށް އެ ފަރާތްތަކުން ދައްކަން ބޭނުންވާ ފައިސާ ދިގު މުއްދަތަކަށް ބަހާލައިގެން ދެއްކުމުގެ ފުރުސަތު އެޗްޑީސީން ދެމުންދާކަން ފާހަގަކުރައްވައި ފަޒުލް ވިދާޅުވީ އެގޮތަށް އެ ފުރުސަތު ދެނީ ކޯޓު މަރުހަލާއަކަށް ހިނގައްޖެނަމަ ލިބިދާނެ ގެއްލުންތަކަކުން ސަލާމަތްވުމަށް ކަމުގަ އެވެ. 

އިތުރަށް ފަޒުލް ފާހަގަކުރެއްވީ ކުންފުންޏަށް އެކި ގޮތްގޮތުން ލިބެންޖެހޭ ފައިސާގެ އަދަދު 14 ބިލިއަން ރުފިޔާއަށް އަރާ ކަމަށެވެ. އެ ފައިސާ އެހައި ބޮޑަށް އިތުރުވީ އެ ފައިސާ ހޯދުމަށް އެކަށީގެންވާ މަސައްކަަތްތަކެއް ކުރެވިފައިނެތުމުން ކަމަށްވެސް ފަޒުލް ވިދާޅުވި އެވެ. 

"އެޗްޑީސީގެ ޖުމްލަ ދަރަންޏަކީ ބޭރުން އަޅުގަނޑުމެންނަށް އަންނަންޖެހޭ ކިހައިވަރެއްތޯ ބަލާލާއިރުގައި ޖުމްލަ ދަރަނީގެ ގޮތުގައި 14 ބިލިއަން ރުފިޔާ އެބައޮތް އެކިއެކި ފަރާތްތަކުން ދައްކަންޖެހޭ،" ފަޒުލް ވިދާޅުވި އެވެ.