ފުވައްމުލަކުން މިސާލެއް | ކުށުގެ ވެށިން ކުޑަކުދިން ނެރެވޭނެ ގޮތުގެ ނަމޫނާއެއް

ކުށުގެ ވެށީގެ ތެރެއަށް ވަދެވިފައި ތިބި ކުޑަކުދިން ކުށުގެ ވެށިން ސަލާމަތްކޮށް އަނބުރާ މުޖުތަމައަށް އިއާދަކުރުމަށް ޔުނިސެފުން އިސްނަގައިގެން ފުވައްމުލަކު ސިޓީގައި ކާމިޔާބު ޕްރޮގުރާމެއް ހިންގަން ފަށައިފި އެވެ. 

ކުޑަކުދިންގެ ހައްގުތައް ރައްކާތެރިކުރުމުގެ ދާއިރާއިން ޔުނިސެފުން ކުރަމުންދާ މަސައްކަތްތަކުގެ މައުލޫމާތު ހިއްސާކުރުމަށް މިއަދު ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީގައި ވާހަކަދައްކަވަމުން އެ ކޮމިޓީގައި ބައިވެރިވެވަޑައިގެންނެވި ޔުނިސެފުގެ މަސްއޫލުވެރިން ފާހަގަކުރެއްވީ ކުދިން އާއިލާތަކާ ވަކިކޮށްގެން އެ ކުދިން ރަނގަޅުކުރުމަށް ކުރާ މަސައްކަތުގެ ތަޖުރިބާތަކަށް ބަލާއިރު އެދެވޭ ނަތީޖާއެއް ނެރެވޭ ތަން ނުފެންނަ ކަމަށެވެ. 

އެގޮތުން މާފުށީގައި ތިބި ކުޑަކުދިން ވިލިމާލޭގައި ހުރި ހިޔާއަށް ގެނައުމުން ކުރިމަތިވީ ބޮޑެތި މައްސަލަތަކެއްކަން ފާހަގަކުރި އެވެ. އެގޮތުން ވަރަށް ނާޒުކު ހާލަތްތަކުން އައި ކުދިންތަކައި މާފުށީ އިސްލާހިއްޔާއިން އައި ކުދިން މަސްހުނުކުރުމުން ނުކުތް ނަތީޖާ ރަނގަޅު ނޫން ކަމަށް ޔުނިސެފުން ފާހަގަކުރި އެވެ. 

ކުށުގެ ވެށީގައި އުޅޭ ކުދިންތައް މުޖުތަމައުން އެކަހެރިކޮށް ފޭދޫ ފިނޮޅަށް ގެންގޮސް އަނބުރާ މުޖުތަމައަށް ގެނައުމަށް ހިންގި ޕްރޮގުރާމުތަކުންވެސް އެކަށީގެންވާ ނަތީޖާއެއް ނެރެވިފައިނުވާކަން ޔުނިސެފުން ފާހަގަކުރި އެވެ. އެގޮތުން އެ ޖަމްއިއްޔާއިން ފާހަގަކުރި ގޮތުގައި އެތަނަށް ގެންދިޔަ ކުދިން ތެރެއިން އަނބުރާ މުޖުތަމައަށް އިސްލާހުވެގެން ނުކުމެވުނީ ދެ ކުދިންނަށް ކަމަށެވެ. ފޭދޫ ފިނޮޅުގައި ރަނގަޅަށް އުޅުނު ކުދިންވެސް އަނބުރާ ކުރީގެ މާހައުލަށް އިއާދަވުމަށް ކުށުގެ ވެއްޓަށް ވަންނަމުންދާ ކަމަށް އެ ޖަމްއިއްޔާއިން ފާހަގަކުރި އެވެ. 

ޔުނިސެފުން ފާހަގަކުރި ގޮތުގައި ކުށުގެ ވެށިން ކުދިން ނެރުމުގައި އެންމެ ރަނގަޅު ނަތީޖާއެއް ނެރެވޭނީ އާއިލާތަކަށް އެހީތެރިކަން ފޯރުކޮށްދީގެންނެވެ. އަދި ކުދިން ކުށްތަކުގެ ތެރެއަށް ދިއުމަށް މެދުވެރިވާ ސަބަބުތައް ދެނެގަނެ އެކަންކަން ހައްލުކުރުމަށް އާއިލާތަކަށް އެހީތެރިވުމުގެ މުހިއްމުކަން ޔުނިސެފުން ފާހަގަކުރި އެވެ. 

އެގޮތުން މިސާލެއްގެ ގޮތުގައި ޔުނިސެފުން ފާހަގަކުރީ އޭޕްރީލު މަހުން ފެށިގެން ފުވައްމުލައް ސިޓީގައި ކުރިއަށްގެންދާ ޕްރޮގުރާމެކެވެ. ފުވައްމުލަކުގައި ހަރަކާތްތެރިވާ ގޭންގުތަކުން ނާޖާއިޒު ގޮތުގައި ބޭނުންކުރަމުން އަންނަ ކުދިން ދެނެގަނެ، ސަރުކާރުގެ އިދާރާތައް އެއްތަނަކަށް ގެނެސް އެ ކުދިންނަށާއި އެ ކުދިންގެ އާއިލާތަކަށް އެހީތެރިކަން ފޯރުކޮށްދިނުމުގެ މަސައްކަތް ފަށާފައިވާ ކަމުގައި އެ ޖަމްއިއްޔާއިން ބުންޏެވެ. 

އެ އާއިލާތަކަށް މަދުވާ ކަންކަން ދެނެގަނެ އެކަންކަން ހައްލުކުރުމަށް ކޮންމެ އިދާރާއަކުން ކުރެވޭނެ ކަންކަން ބަލައި އެ އެހީތެރިކަން ފޯރުކޮށްދިނުމުގެ މަސައްކަތް ފަށާފައިވާކަމަށް ޔުނިސެފުން ބުންޏެވެ. ކޮންމެ މަހަކުވެސް ރިވީއުކޮށް އެ މަސައްކަތްތައް ކުރިއަށްދާ މިންވަރު ބަލަމުންދާކަން އެ ޖަމްއިއްޔާއިން ފާހަގަކުރި އެވެ. 

އެ ޕްރޮގުރާމުގައި ބަލަމުންދާ ކުދިން ފަހަތުން ފުލުހުން ދާންޖެހޭ އަދަދު މަދުވެ އެކުދިން ސުކޫލަށް ދާ މިންވަރު އިތުރުވެފައިވާކަން ފާހަގަކުރަމުން ޔުނިސެފުން ބުނީ މި ނަތީޖާތައް ހާސިލުކުރީ ދައުލަތުގެ އިދާރާތަކުން ފޯރުކޮށްދޭންޖެހޭ ހިދުމަތްތައް އެ ކުދިންގެ އާއިލާތަކަށް ލިބޭކަން ކަށަވަރުކޮށްދީގެންކަމަށްވާތީ އިތުރު ހަރަދުތަކެއް ދައުލަތުން ކުރަންނުޖެހޭ ކަމަށެވެ. 

އަދި އެކަަނިވެރި މަންމައަކު ބަލަަހައްޓަމުން އަންނަ ނަފްސާނީ މައްސަލަތައް ހުރި މަންމަައަކަށް ބޭނުންވާ ނަފްސާނީ އެހީތެރިކަން ފޯރުކޮށްދިނުމުން މިހާރު އެ މަންމަ ވަޒީފާއަށް ނުކުންނަން ފަށައި، ދަރިފުޅު ބަރާބަރަށް ސުކޫލަށް ދާން ފަށާފައިވާ ކަމަށް ޔުނިސެފުން ބުންޏެވެ. 

ކޮންމެ އާއިލާއަކަށް ސަމާލުކަން ދީގެން ކޮމިއުނިޓީ ބޭސްޑް ރިހިބިލިޓޭޝަން ޕްރޮގުރާމުތައް ހިންގައި އާއިލާތަކުގެ ހާލަތު ރަނގަޅުކުރެވޭނަމަ ކުދިން ކުށުގެ ވެށިން ނެރެވި އަނބުރާ މުޖުތަމައަށް ނެރެވޭކަން މިޕްރޮގުރާމުން ފެންނަކަމަށް ޔުނިސެފުން ފާހަގަކުރި އެވެ.