ވަރިވާން ދިޔަ އަންހެނަކަށް ގުޅަައިގެން ވަކިކުރި ނިންމުން ބާތިލުކޮށްދޭން ކުރީގެ މެޖިސްޓްރޭޓު އެދިއްޖެ

ވަރިވާން ދިޔަ އަންހެނަކަށް ގުޅި މައްސަަލައެއްގައި ފަނޑިޔާރުކަމުން ވަކިކުރުމަށް ރައްޔިތުންގެ މަޖިލީހުން ނިންމި ހދ.ކުޅުދުއްފުށި ސިޓީ މެޖިސްްޓްރޭޓު ކޯޓުގެ މެޖިސްޓްރޭޓު އަލީ އާދަމް، އެ ނިންމުން ބާތިލުކޮށްދީ މެޖިސްޓްރޭޓުކަމށް އިއާދަކޮށްދިނުން އެދިވަޑައިގެން މަޖިލީހުގެ ޖުޑީޝަރީ ކޮމިޓީއަށް ސިޓީއެއް ފޮނުއްވައިފި އެވެ. 

މިއަދު އޮތް ޖުޑީޝަރީ ކޮމިޓީގެ ބައްދަލުވުމުގައި އާދަމް މުހައްމަދު ފޮނުއްވި ސިޓީވަނީ އިއްވަވާފަ އެވެ. އެ ސިޓީއާމެދު ގޮތެއް ކަނޑައެޅުމުގެ ގޮތުން ކޮމިޓީގެ މުގައްރިރުވަނީ އެ މައްސަލާގައި ކަންކަން ހިނގާފައި އޮތް ގޮތް އޮޅުންފިލުވައިދޭން ކޮމިޓީގެ އިދާރީ މޭޒުގައި އެދިވަޑައިގެންފަ އެވެ. 

ކޮމިޓީގެ އިދާރީ މޭޒުން ބުނެފައިވަނީ އެފަދަ މައްސަލަތަކުގައި ފުރަތަމަ ބަލަނީ އިޖުރާއާތު ފުރިހަމަކޮށްފައިވޭތޯ ކަމަށެވެ. އެގޮތުން އެ މައްސަލައިގެ ލިޔެކިޔުންތައް ބެލި ބެލުމުގައި ޖޭއެސްސީގެ ގާނޫނުން ލިބިދޭ ހައްގުތަކުގެ ތެރެއިން އެއް ހައްގު ލިބުނުކަން ކަށަވަރުކުރުމަށް ޖޭއެސްސީން މައުލޫމާތު އޮޅުންފިލުވި ކަމަށެވެ. 

އަދި އެކަން އޮޅުންފިލުވުމަށްފަހު ކޮމިޓީން މެޖިސްޓްރޭޓާަ ބައްދަލުކުރިކަމަށާއި އެ ބައްދަލުވުމުގައި އާދަމް މުހައްމަދުގެ ވަކީލުވެސް ބައިވެރިވެވަޑައިގެންނެވި ކަމަށާއި، އެ މައްސަލާގައި އޭނާއަށް ކުރެވުނު އެއްވެސް ތުހުމަތެއް ދޮގުނުކުރައްވާކަމަށް އިދާރީ މޭޒުން ފާހަގަކުރި އެވެ. 

އިދާރީ މޭޒުން މައުލޫމާތު ދިން ގޮތުގައި ތުހުމަތުތަކަށް އިންކާރުނުކުރައްވައި އާދަމް މުހައްމަދު ވިދާޅުވީ އެ މައްސަލައަކީ މަގާމުން ވަކިކުރެވިދާނެ މައްސަލައެއްކަމަށް ގަބޫލުނުކުރައްވާކަމަށާއި، ސުލޫކީ ފިޔަވަޅު އެޅިދާނެކަމަށް އެއްބަސްވެވަޑައިގަންނަވާ ކަމަށެވެ. 

އިދާރީ މޭޒުން ފާހަގަކުރި ގޮތުގައި ފަނޑިޔާރަކު ވަކިކުރުމަށް ޖޭއެސްސީން ނިންމާ ހާލަތުގައި މަޖިލީހުގެ ކޮމިޓީއަށް ކުރެވޭނެ ހަމައެކަނި ކަމަކީ އިޖުރާއާތު ފުރިހަމަކޮށްފައިވާކަން ކަށަވަރުކުރުމެވެ. 

"މައްސަލާގައިވާ އެއްވެސް ތުހުމަތަކަށް މެޖިސްޓްރޭޓު އިންކާރުކުރައްވާފައިނުވޭ. މައްސަލައިގެ ރިޕޯޓުގައި ހިމެނޭ ބަޔާންތަކުންވެސް އެކަން ސާފުވޭ. މެޖިސްޓްރޭޓު ފާހަގަކުރައްވާ ހަމައެކަނި ކަމަކީ މަގާމުން ވަކިކުރާވަރު ކަމެއް ނޫނޭ، ސުލޫކީ ފިޔަަވަޅުއެޅިދާނޭ،" އިދާރީ މޭޒުން ބުންޏެވެ.

މި މައްސަލާގައި ހޮޅުދޫ ދައިރާގެ މެންބަރު އަބްދުއްސައްތާރު މުހައްމަދު ވިދާޅުވީ ފަނޑިޔާރަކު މަގާމުން ވަކިކުރުމަށްފަހު އެ މަގާމަށް އިއާދަކުރެވޭނެ ހަމައެއް ނޯންނާނެ ކަމަށެވެ. އެ މައްސަލާގައި ކަން ހިނގާފައި އޮތް ގޮތަށް ބަލައި އަލީ އާދަމް އެދިވަޑައިގެންނެވި ގޮތަށް ކަންކަން ކުރެވެން ނެތްކަން އަންގަވަން ސައްތާރު ހުށަހެޅުއްވި އެވެ. 

އެ ހުށަހެޅުއްވުމަށް ތާއީދުކުރައްވައި މެންބަރު އަލީ ފަޒާދު ވިދާޅުވީ މި މައްސަލާގައި އަލީ އާދަމް ހުށަހެޅުއްވި ގޮތަށް ކަންކަން ކޮށްފިނަމަ ވަރަށް ނުރަނގަޅު ނަތީޖާތަކެއް ނުކުމެދާނެ ކަމަށެވެ. އެގޮތުން ކުރީގެ މަޖިލިސްތަކުން ވަކިކޮށްފައި ތިއްބެވި ސުޕްރީމް ކޯޓުގެ ފަނޑިޔާރުންނާއި އުއްތަމަފަނޑިޔާރުން އަލުން މަގާމަށް އިއާދަވާ ހާލަތެއް އުފެދިދާނެ ކަމުގައި ފަޒާދު ވިދާޅުވި އެވެ. 

ކޮމިޓީ މެންބަރުންގެ އިއްތިފާގުން ނިންމާފައިވަނީ ސައްތާރު ހުށަހެޅުއްވި ގޮތަށް އެ މައްސަލަ އިތުރަށް ބެލެން ނެތްކަމަށް ނިންމަައި ފައިލް ކުރުމަށެވެ.