ރައީސްގެ މަސައްކަތްޕުޅުން ރާއްޖެ ބަނގުރޫޓުވުމުގެ ވާހަކަ މިހާރު ހުއްޓިއްޖެ: ޒަަމީރު

ރައީސް މުއިއްޒު ވެރިކަމާ ހަވާލުވެވަޑައިގެންނެވިއިރު ރާއްޖެ އޮތީ ދަރަނި އަދާނުކުރެވުމުގެ ބިރު އޮތް ހާލަތެއްގައިކަން ފާހަގަކުރައްވައި މިނިސްޓަރު ވިދާޅުވީ ރައީސްގެ ހަރުދަނާ ސިޔާސަތުތަކުގެ ސަބަބުން ރާއްޖެ ބަނގުރޫޓުވުމުގެ ބިރު ފިލައިފި ކަމަށެވެ.

ފިނޭންސް މިނިސްޓަރު މޫސާ ޒަމީރު، ފޮޓޯ: ރައްޔިތުންގެ މަޖިލިސް

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ މަސައްކަތްޕުޅުގެ ނަތީޖާއެއްގެ ގޮތުން ބައިނަލްއަގުވާމީ މާލީ އިދާރާތަކާއި ކްރެޑިޓް އެޖެންސީތަކުން ރާއްޖެ ބަނގުރޫޓުވުމުގެ ވާހަކަދެއްކުން ހުއްޓާލާފައިވާކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ. 

ރައްޔިތުންގެ މަޖިލީހުގެ މެންބަރަކު ކުރެއްވި ސުވާލަކަށް ޖަވާބުދެއްވަމުން ޒަމީރު ވިދާޅުވީ އައު ސަރުކާރު ވެރިކަމާ ހަވާލުވިއިރު 124 ބިލިއަން ރުފިޔާގެ ދަރަނި އޮތްކަމަށާއި، އެ ދަރަނީގެ ތެރެއިން ދެބައިކުޅަ އެއްބައާ ގާތްކުރާ މިންވަރަކީ ފާއިތުވި ފަސް އަހަރު އެމްޑީޕީ ސަރުކާރުން އުފެއްދި ދަރަނި ކަމަށެވެ. އަދި ދަރަނި އަދާކުރުމަށް ދައުލަތަށް ލިބޭ އާމްދަނީގެ 24 އިންސައްތައާ ގާތްކުރާ މިންވަރެއް ހަރަދުވާ ކަމަށް މިނިސްޓަރު ވިދާޅުވި އެވެ. 

ޒަމީރު އިތުރަށް ވިދާޅުވީ ވެރިކަމާ ހަވާލުވެވަޑައިގަތުމަށްފަހު ރައީސް މުއިއްޒު ކުރެއްވި މަސައްކަތްޕުޅުން ރައްޔިތުންނަށް ހިދުމަތްތައް ފޯރުކޮށްދިނުމާއެކު ދައުލަތުގެ ދަރަނި އަދާކުރެވޭނެ ގޮތަށް ބަޖެޓު ފަރުމާކުރެވިފައިވާ ކަމަށެވެ. ކުރިން މާލީ އިދާރާތަކުން ބުނެފައި އޮތީ ހުރިހާ ދަރަންޏެއް އަދާކުރަމުން ރައްޔިތުންނަށް ފޯރުކޮށްދޭންޖެހޭ ހިދުމަތްތައް ފޯރުކޮށްދޭން މަސައްކަތްކޮށްފިނަމަ ދައުލަތް ބަނގުރޫޓުވުމުގެ ފުރުސަތު އޮންނާނެ ކަމަށް ކަމުގައިކަން ފާހަގަކުރައްވައި ޒަމީރު ވިދާޅުވީ މިހާރު އެ ހާލަތު ބަދަލުވެފައިވާ ކަމަށެވެ. 

އެ ހާލަތުން ރާއްޖެ ސަލާމަތްކުރެއްވުމަށް ރައީސް އެޅުއްވި ބައެއް ފިޔަވަޅުތަކަށް އަލިއަޅުވައިލައްވައި ޒަމީރު ވިދާޅުވީ އާމްދަނީ ލިބޭނެ އިތުރު މަގުތައް ރައީސް ފަހިކުރައްވާފައިވާ ކަމަށެވެ. އަދި ހަރަދުތައް ރޭޝަނަލައިޒްކުރައްވައި ވަކި މިންގަނޑުތަކެއްގައި މިހާރު ހިފަހައްޓަވަމުންގެންދަވާ ކަމަށެވެ. އޭގެ އިތުރަށް ޒަމީރު ފާހަގަކުރެއްވީ ރައީސްގެ މަސައްކަތްޕުޅުން ބައެއް ދަރަނިތައް އަދާކުރުން މިހާރު ފަސްވެސް ކުރެވިފައިވާ ކަމެވެ. 

ޒަމީރު ފާހަގަަކުރެއްވި ގޮތުގައި ރައީސް ޑރ.މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ހުށަހެޅުއްވި މެނިފެސްޓޯގައިވެސް މިހާރު އޮތް ދަރަނީގެ ހާލަތުން އަރައިގަތުމަށް ރަނގަޅު ޕްލޭނުތަކެއް ހުރީ އެކަށައަޅާފަ އެވެ. އެކަންކަން މިހާރު ސަރުކާރުން ދަނީ ތަންފީޒުކުރަމުންކަމަށްވެސް ވިދާޅުވި އެވެ. 

އަދި ދަރަނި އަދާކުރުމުގައި ހުރި ގޮންޖެހުންތަކުގެ ސަބަބުން ރާއްޖެ ބަނގުރޫޓުވެދާނެ ފަދަ ހާލަތެއްގައި ކުރިން އޮތް ނަމަވެސް މިހާރު އެ ހާލަތުން އަރައިގަނެވިފައިވާކަން ފާހަގަކުރައްވައި ޒަަމީރު ވިދާޅުވީ އައިއެމްއެފް ފަދަ މާލީ އިދާރާތަކާއި ރާއްޖޭގެ ކްރެޑިޓް ރޭޓިން ހަދާ އެޖެންސީތަކުންވެސް މިހާރު ރާއްޖެ ބަނގުރޫޓުވުމުގެ ވާހަކަނުދައްކާ ކަމަށެވެ. 

"މިހާރު ހުރި ހުރިހާ ދަރަނި ދައްކަން އުޅެ ރައްޔިތުންނަށް ދޭންހުރި ހުރިހާ ހިދުމަތެއް ދޭން މަސައްކަތްކޮށްފިކަމަށްވެއްޖެއްޔާ އައިއެމްއެފްގެ ރިޕޯޓުގައި އޮތް ގޮތަށް ރާއްޖެ ބަނގުރޫޓުވާނެ. އެހެންނަމަވެސް ރައީސްގެ މަސައްކަތްޕުޅުން މިހާރު އެ ސިނޭރިއޯއިން ރާއްޖެ ނެރެ، ރެވެނިއު ސްޓްރީމްތައް ރަނގަޅުކޮށް، ހަރަދުތައް ރޭޝަނަލައިޒްކޮށް، ހަމައެއާއެއްކޮށް އަޅުގަނޑުމެން ދައްކަަންޖެހޭ ބައެއް ލޯނުތަކުގެ މުއްދަތުތައް އިތުރުކޮށްފި،" ޒަމީރު ވިދާޅުވި އެވެ. 

"މިސާލަކަށް އިއްޔެވެސް އައިއެމްއެފް އަދި ރޭޓިން އެޖެންސީތަކުން ވާހަކަދެއްކިއިރުވެސް ބުނެފައި އޮންނާނީ ހަރަދު ކުޑަކުރާށޭ، ހަރަދު ކުޑަކުރާށޭ. އެކަމަކު ރާއްޖޭގެ ބަނގުރޫޓުވުމުގެ ނުވަތަ އިންސޮލްވެންސީއަށް ދިއުމުގެ ވާހަކަ ދެއްކުން ހުއްޓިއްޖެ. އެއީ ރައީސްގެ ހަރުދަނާ ސިޔާސަތުގެ ސަބަބުންނޭ އަޅުގަނޑު ދަންނަވާނީ،"

މި ސަރުކާރު ވެރިކަމާ ހަވާލުވިއިރު ރާއްޖޭގެ ދަރަނި ބޮޑުވެފައިވާއިރު އަންނަ 2025 ގައި 500 މިލިއަން ޑޮލަރުގެ ދަރަނި އަދި ޖެހިގެން އަންނަ 2026 ގައި އެއް ބިލިއަން ޑޮލަރު ދަރަނި އަދާކުރުމަށް ހަރަދުކުރަންޖެހޭތީ ރާއްޖޭގެ ބޭރު ފައިސާގެ ރިޒާވްގެ ހާލަތު ދަށްވަމުންދާކަން ފާހަގަކޮށް ކްރެޑިޓް ރޭޓިން އެޖެންސީތަކުން ރާއްޖޭގެ ރޭޓިން ދަށްކޮށްފައިވެ އެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.